Ɣöth 22 - RUAC KUƆTH IN RƐL RƆ

Yäri duŋä ran

¹ “Mi ci raan thäk kual kiɛ dɛl, kä bɛ jɛ luc kiɛ bɛ kɔak ni jɛ, bɛ thäk col kɛ thääk dhieec, kä mi ɛ dɛl, bɛ jɛ col kɛ det ŋuaan. Bɛ col, kä mi thilɛ jɛ duɔ̱ɔ̱r, ba raamɔ kɔak kɛ ɣöö cɛ kual.

^2-4 Mi wa le̱y in ca kual je̱k te̱tädɛ a tëk, mi ɛ thäk kiɛ muul kiɛ dɛl, bɛ jɛ col kɛ rɛw. Mi wa wään wä je̱k to̱lɛ ti̱c, kä ba yɔ̱t a bɛ li̱w, thilɛ cut. Kä mi lätdɛ jɛ a ci cäŋ käny, /ca ram in näk jɛ bi päl, bɛ jɛ col.

⁵ “Mi bi raan kak bɛɛlkɛ kiɛ kak jiɛnkɛ luɔ̱ny le̱y, kä bi le̱ykɛ räth kakä raadɔ̱diɛn, bɛ kak ɛmɔ col kɛ bɛl kakädɛ kiɛ jiɛn kakädɛ tin gɔw ni kɛn pa̱ny.

⁶ “Mi wa waŋ cua̱th, kä bɛ pal a bɛ ji̱th bɛɛl kɛnɛ mi kɛ rɔny bɛɛl, kiɛ bi kak waaŋ kɛɛliw, ram ɔ cuäth mac ɔ bɛ cuɔ̱t amäni pe̱kdɛ.

⁷ “Mi wä raan gua̱n thie̱e̱kädɛ wä tɔ̱a̱w yio̱w kiɛ kuak, kä ba kɛ kual due̱e̱lɛ, mi ca wään je̱k, bɛ cuɔ̱t ni kä rɛɛw.

⁸ Mi /ka̱n wään je̱k, bi gua̱n duëël ben guäth palä, kɛ ɣöö bɛ jɛ ben lar mi cɛ tetdɛ kuëŋ nyinä määthdɛ kiɛ /kenɛ jɛ kuëŋ thi̱n.

⁹ Kä mi gäk naath ni thäk ikä, kiɛ muul kiɛ dɛl, kiɛ bi̱i̱, kiɛ kɛl ɔ ci bath ɔ rɛy nyinäkɛ, kä bɛ wee i̱, ‘Duŋdä jɛ mɛn,’ kɛn da̱ŋ rɛw bikɛ ben guäth palä. Ram mi wa kuɛth ɛ Kuoth bɛ määthdɛ culikä ni kä rɛɛw.

¹⁰ “Mi bi raan gua̱n thie̱e̱kädɛ yien muulɛ kiɛ thääkdɛ kiɛ dɛlɛ kiɛ le̱ykɛ tin kɔ̱kiɛn, mi ci le̱y li̱w kiɛ ca moc buɔ̱t kiɛ ca kɛl cuac dɔɔr a thilɛ ram mi ci jɛ nɛn,

¹¹ bikɛ rɔ̱ yac nhiam Kuɔth Nhial, bɛ cu jɔɔc kamädiɛn, ba cu ŋa̱c mi /ken raamɔ tetdɛ kuëŋ kä duŋ gua̱n thie̱e̱kädɛ, kä jɛn gua̱n kä duɔ̱ɔ̱r bɛ ya̱c nhɔk, /ci raamɔ bi cuɔ̱t.

¹² Kä mi kualkɛ jɛ kä jɛ, bɛ gua̱n kä duɔ̱ɔ̱r culikä.

¹³ Mi camɛ le̱y a jɛ no̱o̱ŋɛ ba ben nɛn. Kä /cɛ mi cam le̱y bi col.

¹⁴ “Mi wä raan le̱y yiɛn kä gua̱n thie̱e̱kädɛ, kä ba le̱y ɛmɔ moc gua̱r, kiɛ bɛ li̱w a te gua̱ndɛ jɔ̱ɔ̱r, bɛ pe̱k cuɔ̱t kɛɛliw thöp.

¹⁵ Kä mi te gua̱ndɛ thi̱n, /cɛ jɛ bi col, kä mi ɛ duɔ̱ɔ̱r mi thöpkɛ gua̱ndɛ yio̱w thi̱n, bi pe̱k in la thöpkɛ cu ro̱ŋ kɛ cut kɛ ɣöö nyuakɛ jɛ kɛɛl.

Ŋuɔ̱t kɛ kui̱ ciɛŋni ti gɔw

¹⁶ “Mi bi raan nya thör mi /ka̱n gueer ɛ wut pɛl a bɛ tɔ̱ɔ̱c kɛ jɛ, a jɛ ku nyin kuën thöp, bɛ cu kuɛn ala ciekdɛ.

¹⁷ Kä mi wä gua̱n nyaal ɛ lo̱k i̱ kämɛ jɛ nyaadɛ, bɛ pe̱k yio̱o̱ni ti päär kɛ nyin kuën thöp kɛ kui̱ nya thör mi /ka̱n kɔŋ gueer ɛ wut.

¹⁸ “/Cuɔrɛ ti̱et nho̱k tëk.

¹⁹ “Ram mi bi ni̱n le̱y ikä, ba näk.

²⁰ “Ram mi bi kuth kɔ̱kiɛn pal a /cɛ bi pal ni ɣän Kuoth Nhial kärɔa, ba däk.

²¹ “/Cia ja̱l bi la̱t jiäk, kä /cia jɛ bi ciɛŋ ɛ yak yak, kɛ ɣöö cia kɔŋ ɛ ja̱a̱l ti rööl mëëdan muun I-jëp.

²² “/Cia ciek jɔkä bi la̱t jiäk, kä /cia gat mi rɛɛt bi moc kɛ mi bɛc.

²³ Mi bia kɛ lät kä mi bɛc cäŋɛ ni gue̱e̱riɛn, kä bikɛ ɣä cɔl, ɣän bä wieediɛn liŋ a thil diw.

²⁴ Kä bi waŋ lɔaacdä di̱t ɛlɔ̱ŋ kɛ yɛ, kä bä yɛ näk kɛ mut. Bi mänkun a män jɔɔkni, kä bi gaatkun duɔth rɛɛtdä.

²⁵ “Mi wä ram mi can kä nɛɛkä yio̱w wä dɛn kä raan, /cu rɔ ciɛŋ ce̱tkɛ gua̱n ŋua̱l kä jɛ, /cu jɛ thieec ni rep yio̱o̱ni ti bɛ mat wi̱i̱ nyinäku.

²⁶ Mi wi̱i̱ bi̱i̱ gua̱n thie̱e̱kädu wä ka̱p guäth kä duɔ̱ɔ̱r mi bɛ ŋun, biɛ luɔ̱c bi̱i̱ ɛmɔ a /ken cäŋ ni kony,

²⁷ kɛ ɣöö nɔmɔ ɛ jɛn kuumdɛ min kɛl kärɔa, kä ɛ jɛn duŋ pua̱a̱nydɛ. Der ku lɛ niɛn kɛ ŋu? Kä mi wëë röt, a ro̱lɛ ɣä, ɣän bä lulɛ liŋ, kɛ ɣöö ɣän lapä ram mi kɔ̱c lɔc.

²⁸ “/Cuɔrɛ ɣä yɔ̱r kä /cuɔrɛ rui̱i̱c mi ruaac nɛɛkun lam.

²⁹ “Bia ɣä luɔr nhial kɛ ŋɛ̈ɛ̈r ka̱a̱knikun kɛ baapdiɛn, amäni pi̱ dɛɛni wal tin la nhiackɛ. “Kä bia ɣä ka̱m key gankun tin dhɔɔl.

³⁰ Bia la̱t ni nɔ kɛ thääkun kɛ de̱tkun. Bɛ la tëë kɛɛl kɛ man kɛ ni̱n bärɔw, kɛ bädäkdiɛn bia jɛ ben buɔ̱k ɣä.

³¹ Bia la nɛy ti ca buɔ̱k ɣä, kɛ kui̱c ɛmɔ, /cia ri̱ŋ mi ci le̱y ɛ cam dɔɔr bi cam, bia jɛ yuɔ̱r jio̱o̱k.”