Ɣöth 21 - RUAC KUƆTH IN RƐL RƆ

Ŋuɔ̱t kɛ kui̱ ja̱a̱ŋni

¹ “Täämɛ ti̱ti̱ kɛ kɛn ŋuɔ̱t tin bi ka̱m naath.

² Mi wiaa ja̱ŋ Ɣi-bɛ-ru wä kɔk, bɛ lät kɛɛl kɛ raan kɛ run bäkɛl, kɛ bärɔwdiɛn bɛ jiɛn baaŋ a thil mi lonyɛ ni rɔɔdɛ.

³ Mi bëë kɛ puɔ̱nydɛ kärɔaadɛ mëë copɛ gɔɔlu, bɛ jiɛn kɛ puɔ̱nydɛ kärɔa. Kä mi bëë gɔlu a cɛ kuɛɛn, bɛ wä raar gɔɔlu kɛɛl kɛn ciekdɛ.

⁴ Mi ci kuäärɛ jɛ moc nyam kuɛɛn ɛ, kä bɛ dhɔɔl kɛnɛ nyi̱er di̱eth kɛ ciek ɛmɔ, bi ciek kɛnɛ gaat a nyin kua̱rɛ.

⁵ Kä mi wä ja̱ŋ ɛmɔ jɛ wä pa̱a̱l nhiam nath i̱, ‘Ɣän nhɔakä kuäärä, kä nhɔakä ciekdä kɛnɛ gaatkä, ɣän /cä jiɛy,’

⁶ bi kuäärɛ jɛ cu naŋ guäth palä kä bɛ jɛ no̱o̱ŋ thok thi̱ekdɛ kiɛ wääthä, kä ba ji̱thdɛ muɔ̱t puɔ̱ɔ̱ny thi̱ek kɛ rip, bɛ cua ja̱ŋdɛ kɛ pe̱k te̱e̱kädɛ.

⁷ “Mi wä raan nyaadɛ wä kɔak ala ja̱ŋ, /cɛ bi jiɛn lɔrä kä ram in ci jɛ kɔk ce̱tkɛ ta̱a̱ in la jiɛy ja̱ŋ mi wut lɔrä.

⁸ Mi ci kuäärɛ mëë ci jɛ go̱r rɔ ala ciek kä jɛ ci lɔcdɛ tɛth kɛ jɛ.

⁹ Mi cɛ jɛ go̱r gatdɛ ala ciek, bɛ jɛ ciɛŋ ce̱tkɛ nyaadɛ.

¹⁰ Mi wëë rɔɔdɛ kuen ciek mi dɔ̱ŋ, /cɛ jɛ bia giŋɛ mi̱thnikɛ, kä /cɛ jɛ bi a giŋɛ bieynikɛ, kä /cɛ jɛ bi bo̱ŋ cuŋ kuëndɛ.

¹¹ Kä mi /cɛ ciek ɛmɔ bi lät kä diɔ̱k tɔ̱tɔ̱, bi ciek ɛmɔ wä raar baaŋ a thil yio̱w ti bɛ luɛl ni rɔɔdɛ.

Ŋuɔ̱t ciɛŋni ti jiäk

¹² “Täämɛ, ram mi wä raan yɔ̱t a bɛ tho̱ŋ, ba näk.

¹³ Kä mi näkɛ jɛ kɛ guäc mi la guäc Kuɔth, ɣän bä jɛ moc gua̱a̱th mi bɛ rɔɔdɛ lɛ̱̈ny thi̱n.

¹⁴ Kä mi bi raan gua̱n thie̱e̱kädɛ näk bi̱mä, bia jɛ woc cäŋ cɛ riŋ ni gua̱a̱th yi̱kädä kɛ ɣöö bɛ kään, ba wä näk.

¹⁵ “Kä ram mi bi gua̱n kiɛ man pi̱m, kiɛ bɛ jɛ pa̱t kiɛ duäc kɛ tetdɛ, ba näk

¹⁶ “Kä mi bi raan ram mi wut kual, cäŋ ba je̱k cɛ jɛ kɔak kiɛ ŋotdɛ kɛ jɛ kɛɛl, ba näk.

¹⁷ “Ram mi wä gua̱n kiɛ man kuɛth, ba näk.

¹⁸ “Mi wä naath nyiëëny, kä bi raan ram in dɔ̱diɛn pi̱m kɛ döl kiɛ ɛ tetdɛ, mi /ken raan li̱w kä bɛ te piny,

¹⁹ kä mi lɛ raamɔ rɔɔdɛ jiɛc kä bɛ rɔɔdɛ nhiɛt, a bɛ wä ja̱l jɔk cieeŋdɛ, ci ram in ci jɛ pi̱m cu thuɔ̱k kä min dëë lät kä jɛ, kä bɛ col ni gua̱a̱th ëë cɛ bath ni lätkɛ, kä bɛ jɛ ŋɔ̱th a bi puɔ̱nydɛ pual ɛ ko̱k.

²⁰ “Mi wä raan ja̱ŋdɛ mi wut kiɛ ciek yɔ̱t kɛ kɛɛt, kä bɛ li̱w te̱tädɛ, ba jɛ duäc.

²¹ Kä mi bi ja̱ŋ ɛmɔ ɣɔ̱r a bɛ tëk kɛ cäŋ kɛl kiɛ ni̱n da̱ŋ rɛw, /ca raamɔ bi duäc, kɛ ɣöö ja̱ŋ ɛmɔ ɛ duŋ yio̱o̱nikɛ.

²² “Mi nyiëëny wutni da̱ŋ rɛw kä bikɛ ciek mi rue̱t thiäm, a bɛ gat ka̱m raar, kä /ka̱n ciek moc buɔ̱t dɔ̱diɛn, ba raamɔ moc karaam, kɛ pe̱k in bi cɔw ciɛk ɛ go̱r kä jɛ, kä bɛ jɛ col kɛ pe̱k mi bi kua̱r luɔ̱ɔ̱kni jɛ car.

²³ Kä mi wee tëë buɔ̱t mi ca la̱th, bia tëk ku col kɛ tëk,

²⁴ kɛ waŋ kɛ waŋ, kɛ le̱y kɛ le̱y, kɛ tet kɛ tet, cio̱o̱k kɛ cio̱o̱k,

²⁵ buɔ̱t waŋä kɛ buɔ̱t waŋä, buɔ̱t kɛ buɔ̱t, kɛ yɔ̱a̱t kɛ yɔ̱a̱t.

²⁶ “Mi wä raan ja̱ŋdɛ yɔ̱t waaŋ, a bɛ muɔ̱t, mi ɛ ciek kiɛ wut, bɛ ja̱ŋ ɛmɔ pa̱l wä lɔrä kɛ kui̱ waŋdɛ.

²⁷ Mi cɛ le̱y jäŋädɛ ar piny, mi ɛ wut kiɛ ciek, bɛ ja̱ŋ ɛmɔ jak kä wä baaŋ kɛ kui̱ lɛ̈c mi cɛ ar.

Ŋuɔ̱t gua̱n kä duɔ̱ɔ̱r

²⁸ “Mi wä thäk wut kiɛ ciek yiɛth a bɛ jɛ tho̱ŋ, ba thäk näk, kä /ca ri̱i̱ŋdɛ bi cam, kä /ci lia̱a̱ raamɔ bi a wi̱c gua̱n tha̱a̱k.

²⁹ Kä mi thäk ɛmɔ yie̱thɛ ni wen, kä ca gua̱ndɛ kɔŋ la̱r theŋ kä thilɛ mi cɛ la̱t thi̱n, mi wä thäk ɛmɔ wut näk kiɛ näkɛ ni ciek, ba thäk ɛmɔ bök kɛ pääm, kä ba gua̱ndɛ näk.

³⁰ Mi wa jɛ thi̱ec mi luɛlɛ ni rɔɔdɛ, bɛ dhil thöp ni pe̱k ɔ ca kuëŋ wi̱i̱dɛ mɔ kɛ kui̱ te̱e̱kädɛ.

³¹ Mi wëë yiɛth ni gat ran kiɛ nya ran, ba la̱t ni kɛ jɛn la̱t ɛmɔ.

³² Mi wä thäk yiɛth ni ja̱ŋ mi wut kiɛ ciek, bi gua̱n tha̱a̱k gua̱n jäŋä nɔmɔ ka̱m yio̱w ti jiɛn diɔ̱k, kä ba thäk bök kɛ pääm.

³³ “Mi wä raan pul wä pa̱l ɣööŋ, kiɛ bɛ jɛ tɛt a /cɛ wi̱cdɛ bi kum, mi wä thäk kiɛ muul pɛn thi̱n,

³⁴ bi gua̱n jiɛw cuɔ̱t, bɛ gua̱n lɛ̱̈ɛ̱̈ moc yio̱w, kä bi le̱y in ci li̱w cua duundɛ.

³⁵ “Mi wä thäk ran thäk raadɔ̱diɛn näk, bikɛ thäk ɔ tëk ɔ kɔak, bikɛ pe̱k yio̱o̱ni tin cɛ no̱o̱ŋ da̱a̱k, kä bikɛ ri̱ŋ lɛ̱̈ɛ̱̈ in ci li̱w ni da̱a̱k bä.

³⁶ Kiɛ mi ca thäk ɛmɔ ŋa̱c i̱ yie̱thɛ ni wen, kä /ken gua̱ndɛ jɛ yiɛn, bɛ thäk col kɛ thäk, kä bi le̱y in ci li̱w a duundɛ.”