Ɣöth 20 - RUAC KUƆTH IN RƐL RƆ

Luëëk Kuɔth da̱ŋ wäl

¹ Cu Kuoth laat ti̱ti̱ lat, cuɛ wee i̱,

² “Ɛ ɣän Kuoth Nhial Kuothdun ëë käm yɛ raar muun I-jëp, due̱e̱l yie̱e̱nä.

³ “/Cu kuth kɔ̱kiɛn pal ɛ ni ɣän kä rɔa.

⁴ “/Cu rɔɔdu täth kuth piɛny kiɛ mi cäät puɔ̱nydɛ kɛ mi te puɔ̱rä cieŋ nhial, kiɛ mi te piny wi̱i̱ muɔ̱ɔ̱n, kiɛ ti te pi̱i̱ni piny muɔ̱ɔ̱n,

⁵ /cu rɔɔdu goŋ kɛ kɛ kä /cu kɛ lät kä ŋɔaani kɛ ɣöö ɣän Kuoth Nhial min la Kuothdu, ɛ ɣän Kuoth mi gua̱n tiilä. La no̱o̱ŋä rik nɛɛni tin nyiɛrkɛ ɣä gaatkiɛn a räth ni kä käth in diɔ̱ɔ̱kdiɛn, kɛnɛ ŋuaandiɛn,

⁶ kä la nyuɔ̱thä nhökdä mi /ci rɔ wany ka̱a̱th ti kur ti bath dɔɔr kä nɛy tin nhɔakɛ ɣä kä ka̱pkɛ laatkä.

⁷ “/Cu ciötdä la cɔɔli baaŋ ɣän Kuoth Nhial Kuothdu. Kɛ ɣöö ɣän Kuoth ram mi cɔɔl ciötdä baaŋ ba duäc.

⁸ “Tit cäŋ lɔ̱ŋä Kuɔth in gɔaa in rɛl rɔ.

⁹ Ni̱n da̱ŋ bäkɛl lätni kä cak lätku diaal thi̱n,

¹⁰ Kä cäŋ in bärɔwdiɛn, ɛ cäŋ lɔ̱ŋädä Kuothdu ni Kuoth Nhial. /Cu lät thi̱n, ji̱n amäni gaatku, kɛ nyieeku, kiɛ wutni kɛnɛ män tin la̱a̱tku, kä cu amäni ɣɔ̱ɔ̱ku, kɛ ja̱l wecdu min ci dhɔru nyuɔ̱ɔ̱r.

¹¹ Kɛ ɣöö ɣän Kuoth cä nhial kɛnɛ piny cak, kɛ yieer a amäni tin te rɛydiɛn kɛ ni̱n da̱ŋ bäkɛl, kä cua̱ lɔ̱ɔ̱ŋ kɛ bärɔwdiɛn. Kɛ kui̱c ɛmɔ, ɣän Kuoth Nhial cua cäŋ lɔ̱ŋä poth kä cuɛ jɛ jak kä mi gɔaa mi rɛɛl rɔ.

¹² “Luthni guur kɛnɛ muɔɔr kɛ ɣöö bi tëkdu jääny wi̱i̱ muɔ̱ɔ̱n, ro̱o̱l in käm ɣän Kuoth Nhial Kuothdu jɛ ji̱.

¹³ “/Cu raan näk.

¹⁴ “/Cu dho̱m.

¹⁵ “/Cu kue̱l.

¹⁶ “/Cu raan naŋ luɔm kɛ kac.

¹⁷ “A lɔcdu /ci di̱t kɛ cieeŋ raam mi thie̱e̱k kɛ ji̱. /Cu ciek raam mi thie̱e̱k kɛ ji̱ bɛc, kiɛ lätku kɛɛl, kiɛ thääkdɛ, kiɛ muulɛ, kiɛ mi dɔ̱ŋ mi la duundɛ, /cu jɛ go̱r kɛ lɔcdu.”

Lath pua̱nyni nath

¹⁸ Täämɛ mëë ci nɛy diaal ma̱a̱r ku guic kɛnɛ yie̱l, kɛ riɛɛr kaaŋä, kä tol päm, cukɛ dual, kä cuɛ kɛ kuer lath. Cukɛ rɔ̱ ke̱k ni nänä.

¹⁹ Cukɛ Muthɛ jiök i̱, “Ruacni kɛ kɔ ji̱n puɔ̱nydu kä bakɔ ruacdu liŋ, kä /cu Kuoth jak kä ruac ni jɛn kɛ kɔ, mi wa jɛn, bakɔ rɔ̱ pär ni kɛ lia̱a̱.”

²⁰ Cu Muthɛ kɛ jiök i̱, “/Cuɔrɛ dual. Ci Kuoth ben kɛ ɣöö bɛ ben thɛm ni yɛ, kɛnɛ ɣöö bi luthdun kɛ jɛ cu te thi̱n ni ciaŋ. Bi nɛmɛ yɛ ge̱l, /cia bi la duerɛ.”

²¹ Cu naath cuɔ̱ŋ ni nänä, kä wä Muthɛ kɛ wä thiekä guäth in te Kuoth thi̱n rɛy puɔ̱rä mi di̱rdi̱r.

Ŋuɔ̱t kɛ kui̱ yi̱kni

²² Cu Kuoth Nhial Muthɛ jiök i̱, “Jio̱kni ji̱ I-thɛ-rɛl inɛ, ‘Cia jɛ nɛn kɛ pua̱nykun ɛn ɣöö cä ben ruac kɛ yɛ ni nhial.

²³ /Cuɔrɛ kuth yieethä täth rɔ̱, kä /cuɔrɛ rɔ̱ täth kuth da̱a̱pni.

²⁴ Kä yi̱kdä biɛ täth kɛ mun. Bia luuri ti waŋkɛ ka̱m ɣä wi̱i̱dɛ, kɛ luuri nyuaakädu, kɛ luuri detku kɛ thääku, gua̱thni diaal tɔ̱ bä naath ka̱m ti̱em cio̱tädä thi̱n ɔ, bä ben thi̱n, bä jɛ ben poth.

²⁵ Kä mi wi̱i̱ täth ni yi̱k pa̱a̱m, /cu jɛ täth kɛ pääm ti ca kuac, kɛ ɣöö mɔ ci te̱tku kuëŋ puɔ̱ɔ̱nydɛ mɔ, cia jɛ ya̱r.

²⁶ Kä /cuɔrɛ yi̱kdä moc ko̱tni, kɛ ɣöö /cia bi wä thi̱n juutdä.’ ”