Ɣöth 2 - RUAC KUƆTH IN RƐL RƆ

Da̱p Muthɛ

¹ Täämɛ cu wut mi la raan Lii-bay nyaadiɛn wä kuɛn.

² Cu ciek ɛmɔ ruët kä cuɛ dap kɛ gatdɛ. Mëë cɛɛ nɛn i̱ ɛ dho̱o̱l mi gɔaa, cuɛ jɛ tɛ̱̈ɛ̱̈ kɛ päth da̱ŋ diɔ̱k.

³ Kä mëë cɛ jɛ nɛn i̱ /cɛ dëë ŋot kɛ lua̱ŋ kɛ teeydɛ, cuɛ di̱eny gutdä tak, cuɛ jɛ diɛl kɛ mun mi dɔ̱k kɛnɛ mun mi dik dik, kä cuɛ gat la̱th thi̱n, cuɛ jɛ la̱th rɛy gutdä gekä yiëër.

⁴ Kä cu nyiman cuɔ̱ŋ a na̱n, guicɛ mɔ ba lät kä jɛ mɔ.

⁵ Täämɛ cu nyaa Pɛro ben puaak thook waath, cu nyi̱er tin la̱a̱tkɛ ja̱l kɛ wi̱c yiëër. Cuɛ di̱eny nɛn rɛy gutdä kä cuɛ nya la̱tdɛ ja̱k kɛ ɣöö bɛ wä no̱o̱ŋ.

⁶ Mëë cɛ jɛ lɛp, cuɛ gat nɛn, kä cuɛ cu nɛn ro̱tdɛ. Cu lɔcdɛ ŋɛ̈p kɛ jɛ kä cuɛ jɛ lar i̱, “Nɛmɛ ba ni kɛl kä gaat ji̱ Ɣi-bɛ-ru.”

⁷ Ɛ jɛn, cu nyiman gatdä nɔmɔ nyaa Pɛro cu jiök i̱, “Cä dëë wä, kɛ ɣöö dëë ciek mi ro̱o̱m gan kä män ji̱ Ɣi-bɛ-ru wä cɔl kɛ ɣöö derɛ gatdu ben röm ji̱?”

⁸ Cu nyaa Pɛro nyam ɛmɔ jiök i̱, “Wër.” Ɛ jɛn cu nyal wä kä cuɛ man gatdä wä cɔl.

⁹ Kä mëë cɛ ben, cu nyaa Pɛro ɛ ben jiök i̱, “Naŋ gat ɛmɛ kä wër rɔm ɛ kɛ kui̱dä, kä bä ji̱ kɔk.” Ɛ jɛn, cu ciek gat ɛmɔ naŋ, kä cuɛ jɛ wä luëëth.

¹⁰ Cu gat piith. Mëë cɛ ku di̱t, cuɛ jɛ nöŋ nyaa Pɛro, kä cuɛ cua gatdɛ. Kä cuɛ ciötdɛ cɔl i̱ Muthɛ, kɛ ɣöö cɛ lar i̱, “Ka̱mä jɛ raar rɛy pi̱i̱ni.”

Bar Muthɛ kɛ rɔ kä Mid-yan

¹¹ Kɛ cäŋ kɛl mëë ci Muthɛ kua wut, cuɛ nɛɛkɛ wä gui̱l kä cuɛ di̱t lätnikiɛn wä nɛn. Cuɛ raan I-jëp nɛn duääcɛ raan Ɣi-bɛ-ru mi raan nɛɛnikɛ.

¹² Cuɛ kui̱c ɔ kɛnɛ kui̱c ɔ liɛc, mëë thilɛ ram mi cɛ nɛn, cuɛ raan I-jëp ɛmɔ näk, kä cuɛ jɛ muɔl piny rɛy litdä.

¹³ Kä mëë cɛ lɛ wä raar mëë ruɔ̱ndɛ, cuɛ wutni Ɣi-bɛ-ru da̱ŋ rɛw je̱k nyieenykɛ, kä cuɛ ram in tekɛ duer jiök i̱, “Ɛŋu duääci dämuɔɔr ɔ?”

¹⁴ Cuɛ jɛ loc i̱, “Ɛŋa mi jak ji̱ kä rueec kä mɔ luukda? Go̱o̱ri ɣöö bi ɣä näk kɛ näk ëë näki ni raan I-jëp?” Cu Muthɛ cu dual, kä cu lɔcdɛ ti̱r kɛ ɣöö ca nɔmɔ dhil ŋa̱c.

¹⁵ Täämɛ mëë ci thok cop kä Pɛro cuɛ cu go̱r i̱ bɛ Muthɛ näk, ɛni ɣöö cu Muthɛ rɔɔdɛ bar kɛ Pɛro, kä cuɛ wä ciɛŋ ni ro̱l Mid-yan, cuɛ nyuur wi̱i̱ jiɛw.

¹⁶ Täämɛ tëë kɛ bo̱o̱th palä kä Mid-yan mi tekɛ nyi̱er da̱ŋ bärɔw. Nyi̱er tɔ̱tɔ̱ cukɛ ben jiɔam pi̱i̱ni wi̱i̱ jiɛw. Cukɛ pa̱ny ti ca tɛt thia̱ŋ kɛ pi̱ kɛ kui̱ bunä de̱e̱t gua̱ndiɛn.

¹⁷ Cu yiëën deet ti kɔ̱kiɛn ben. Cukɛ nyier bööth palä Mid-yan joc, cu Muthɛ rɔɔdɛ ku jiɛc kä cuɛ kɛ ɣɔr, cuɛ buɔ̱n de̱e̱tkiɛn ma̱a̱th.

¹⁸ Mëë wäkɛ luny cieŋ, cu gua̱ndiɛn ni Yith-ro kɛ thi̱ec, “Ɛŋu cia mal luny cieŋ wa̱lɛ mɔ?”

¹⁹ Cukɛ jɛ loc i̱, “Tëë kɛ raan ji̱ I-jëp mi ci kɔ kän te̱tni yiëëni de̱e̱t, kä cuɛ pi̱ ni jɔm bä kɛ kui̱da, kä cuɛ detkɔ ma̱a̱th.”

²⁰ Kä cuɛ nyieekɛ thiec i̱, “Kä jɛn a nikä? Ɛŋu ba̱nyɛ jɛ piny ɔ? Cɔalɛ jɛ kɛ ɣöö bɛ ben mi̱th kɛ kuän.”

²¹ Kä cu Muthɛ jɛ nhɔk i̱ wëë cieŋ kɛɛl kɛ Yith-ro, kä cuɛ Muthɛ ka̱m nyaadɛ ni Dhi-pö-ra.

²² Cu ciek ɛmɔ dap kɛ gat dhöl, kä cu Muthɛ jɛ cɔl i̱ Ger-com, kɛ ɣöö ɛ jɛn i̱, “Ɣän lapä ja̱l ro̱o̱l mi guä.”

²³ Kɛ gua̱a̱th mi bäär, cu kuäär I-jëp li̱w, cu ji̱ I-thɛ-rɛl lɔcdiɛn ŋot kɛ dɛ̈t kɛ yaakdiɛn, kä cukɛ wiee kɛ ɣöö baak kɛ luäk, kä cu wieediɛn cop nhiam Kuɔth.

²⁴ Kä cu Kuoth lulliɛn liŋ, kä cuɛ ruac ëë cɛ gok kɛnɛ A-bɛ-ram, kɛ Ay-dhɛk, kɛ Je-kɔb tim.

²⁵ Cuɛ ji̱ I-thɛ-rɛl guic kɛ lɔc mi kɔ̱c, cuɛ ciaaŋdiɛn je̱k kɛ lɔcdɛ.