Ɣöth 19 - RUAC KUƆTH IN RƐL RƆ

Ji̱ I-thɛ-rɛl pääm Thi-nay

^1-2 Täämɛ cu ji̱ I-thɛ-rɛl jiɛn kä Rɛ-pi-dim, kä kɛ cäŋ in jio̱liɛn kɛ diɔ̱ɔ̱k päthni mëë bä kɛ raar muun I-jëp, cukɛ cop ɛn cäŋ ɛmɔ rɛy dɔaar Thi-nay. Cukɛ cu pua̱t thaar Pa̱a̱m Thi-nay.

³ Cu Muthɛ wä kä Kuoth wi̱i̱ pa̱a̱m. Cu Kuoth Nhial jɛ cɔl rɛy pa̱a̱m, cuɛ wee i̱, “Nɛmɛ ɛ jɛn mi la̱rä ji̱, biɛ wä la̱r gaat I-thɛ-rɛl tin la kuay Je-kɔb i̱,

⁴ ‘Yɛn cia min cä lät kä ji̱ I-jëp nɛn kɛnɛ yuɔ̱p ëë yuɔɔpä yɛ mëë kapä yɛ ce̱tkɛ cuɔɔr in la kap dɛykɛ kä cä yɛ nöŋ rɔɔdä.

⁵ Kɛ kui̱ ɛmɔ, mi wiaa jɔwdä niɛk kä tiɛtdɛ ruacdä min cä la̱th piny, yɛn bia cua nɛɛkä tin di̱eel tin leenyä ni nɛy diaal cäŋɛ min ɣɔw ɛ duŋdä kɛɛliw bä.

⁶ Kä bia cua̱ do̱r bööthni ŋuɔ̱tni kä ɣä, kä bia a do̱rä mi gɔaa mi rɛl rɔ.’ Tɔ̱tɔ̱ kɛ kɛn rieetkä tin bi la̱t ji̱ I-thɛ-rɛl.”

⁷ Cu Muthɛ luny, cuɛ bööth cɔl. Cuɛ rieet diaal tëë ca no̱o̱p jɛ la̱t naath ni kɛ pe̱k ëë ci Kuoth Nhial ɛ la̱r jɛ.

⁸ Cu nɛy diaal ɛ loc kɛɛl i̱, “Ti diaal ti ci Kuoth Nhial kɛ la̱t ji̱, bakɔ kɛ lät kä jɛ.” Kä cu Muthɛ thok luɔ̱c Kuoth Nhial kɛ min ci naath ɛ lar.

⁹ Kä cu Kuoth Nhial Muthɛ jiök i̱, “Nɛn ɛ, ɣän ba̱a̱ kä ji̱ rɛy puɔ̱rä mi di̱rdi̱r kä mi wä naath jɔwdä liŋ ruacä kɛ ji̱, bikɛ ruacdu cu ŋäth amäni cäŋ kɛl.” Cu Muthɛ ruac nath cu kuën Kuoth Nhial.

¹⁰ Cu Kuoth Nhial ɛ cu jiök i̱, “Wër kä naath kä jakni kɛ kä gɔw ɛn wa̱lɛ mi kɛnɛ cäŋ i̱ ruɔ̱n i̱. Akɛ ba bieynikiɛn lak.

¹¹ Kɛ ɣöö imuɔlä ba kɛ je̱k cikɛ rɔ̱ rial ikä, kɛ ɣöö ɛn cäŋ ɛmɔ, ɣän Kuoth Nhial bä ben piny wi̱i̱ Pa̱a̱m Thi-nay nhiam nath diaal.

¹² Kä bi naath moc ke̱k kɛ thar pa̱a̱m, kä bi kɛ jiök i̱, ‘Niɛkɛ rɔ̱ ɛn ɣöö /cia päm bi kɔt kiɛ bia puɔ̱nydɛ thiap. Ram mi wä jɛ gueer, ba näk a cɛ bi pa̱k.

¹³ Thilɛ ram mi bi tetdɛ la̱th thi̱n, ɛn ram ɔ, ba bök kɛ pääm ɔ kiɛ ba bär ɔ, cäŋ ba le̱y kiɛ raan, cɛ bi tëk.’ Mi wa kaaŋ koth kɛ jɔw mi bäär, bikɛ ben wi̱i̱ pa̱a̱m.”

¹⁴ Cu Muthɛ jiɛn wi̱i̱ pa̱a̱m, bëë kä naath, cuɛ kɛ jak kä puɔth pua̱nykiɛn kä cukɛ bieynikiɛn lak.

¹⁵ Cuɛ naath jiök i̱, “Yuɔpɛ rɔ̱ inɔ amäni muɔlä, /cuarɛ nin kɛ män.”

¹⁶ Kɛ diɔ̱ɔ̱k ni̱ni bakä, cuɛ tëë ma̱r kɛnɛ yie̱l mi di̱i̱t kä cu wi̱c pa̱a̱m tëë pua̱r mi gärgär, kä cuɛ tekɛ jɔw kaaŋä mi riɛɛr ɛlɔ̱ŋ mi cu nɛy tëë te wi̱c moc lath.

¹⁷ Kä cu Muthɛ naath no̱o̱ŋ raar rɛy wec, wäkɛ Kuoth lor, kä cukɛ cuɔ̱ŋ thaar pa̱a̱m.

¹⁸ Cu päm Thi-nay kɛɛliw thia̱a̱ŋ kɛ tol kɛ ɣöö ci Kuoth Nhial nyuur wi̱i̱dɛ kɛ mac. Cuɛ tolɛ biɛr ni pua̱a̱r ce̱tkɛ tol tuɔɔp mi buɔ̱lkɛ. Kä cuɛ päm lath ɛ ri̱p ri̱p.

¹⁹ Mëë wä kaaŋ kɛ mi re̱e̱pɛ rɔ, cu Muthɛ ruac, kä cu Kuoth ruacdɛ loc kɛ ma̱a̱r.

²⁰ Cu Kuoth Nhial ben wi̱i̱ Pa̱a̱m Thi-nay, kä cuɛ Muthɛ cɔal biikä pa̱a̱m, cu Muthɛ wä nhial.

²¹ Kä cuɛ jɛ jiök i̱, “Wër piny läri naath lär i̱ akɛ /ca rɔ̱ bur ɣä kɛ ɣöö bikɛ ɣä go̱r kɛ nyinkiɛn mi wäkɛ jɛ bar ji̱th, bi ri̱wdiɛn ti ŋuan li̱w.

²² Amäni kɛn bööth palä tin bi ben nhiamdä, akɛ jakɛ rɔ̱ kä puɔth lo̱ckiɛn, mi wa kui̱c tha̱a̱ŋ, bä kɛ duäc.”

²³ Kä cu Muthɛ Kuoth Nhial jiök i̱, “/Ci naath dëë ben wi̱i̱ Pa̱a̱m Thi-nay kɛ ɣöö ci kɔ gok i̱ lätni key piny pa̱a̱m, bɛ cua mi thɛ̈kɛ.”

²⁴ Kä cu Kuoth Nhial ɛ jiök i̱, “Wër piny, wër bër kɛɛl kɛ Ä-ron, kä /cu bööth palä kɛnɛ naath jak kä buɔ̱rkɛ rɔ̱ ɣä, kɛ ɣöö dëë kɛ duäc.”

²⁵ Cu Muthɛ cu wä kä naath, cuɛ kɛ wä la̱t laat diaal.