Ɣöth 17 - RUAC KUƆTH IN RƐL RƆ

Pi̱ rɛy pa̱a̱m

¹ Cu duɔl ji̱ I-thɛ-rɛl ɣo̱th rɛy dɔaar Thin ɛ lɛm lɛm ni kɛ mëë ci Kuoth Nhial ɛ guɔ̱k kɛ, kä cukɛ ben pua̱t kä Rɛ-pi-dim, kä cu ɣɔw thil pi̱ ti mathkɛ ɛ naath ɛn wanɛ mɔ.

² Kɛ kui̱c ɛmɔ, cu naath Muthɛ bɛl, cukɛ jɛ cu jiök i̱, “Moc kɔ kɛ pi̱ ti mathkɔ.” Cu Muthɛ kɛ jiök i̱, “Ɛŋu mɔ bɛ̈lɛ ɣä mɔ? Ɛŋu mɔ ɣɔ̱a̱nɛ Kuoth Nhial ɔ?”

³ Cua naath näk ɛ rɛw ɛn wan i̱ kɛ ɣöö thilɛ pi̱, kä cukɛ göny kä Muthɛ, cukɛ wee i̱, “Ɛŋu ɛ nëë kämi ni kɔ raar kä I-jëp ɛ bi kɔ ben näk kɛ rɛw kɛɛl kɛ gaatkɔ, kɛ ɣɔ̱ɔ̱kɔ?”

⁴ Cu Muthɛ Kuoth Nhial lo̱ŋ, cuɛ wee i̱, “Ɣän bä nɛy ti̱ti̱ lɛl i̱di, mi ci duɔth ni ɣöö ba ɣä bök kɛ pääm ɛ?”

⁵ Kä cu Kuoth Nhial Muthɛ jiök i̱, “Kacni nhiam nath, kä naŋ tha̱a̱ŋ di̱tni ji̱ I-thɛ-rɛl, kä käp kɛɛtdu ëëdan ëë yɔ̱ɔ̱tdi ni yi̱er kɛ tetdu, kä wiaa.

⁶ Nɛn ɛ, ɣän bä cuɔ̱ŋ nhiamdun wi̱i̱ Pa̱a̱m Thi-nay, bi päm yɔ̱t, kä bi pi̱ wuɔ̱th thi̱n, bi naath kɛ math.” Kä cu Muthɛ ɛ la̱t inɔ nhiam bööthni I-thɛ-rɛl.

⁷ Cuɛ gua̱a̱th ɛmɔ moc ciööt, cuɛ jɛ cɔl i̱ Matha kɛnɛ Mɛ-ri-baa, kɛ ɣöö ci gaat I-thɛ-rɛl Kuoth Nhial bɛl kɛnɛ ɣöö cikɛ jɛ ɣɔ̱n, kɛ mëë la larkɛ jɛ i̱, “Cak Kuoth Nhial te rɛydan?”

Ko̱r kɛ ji̱ A-ma-lek

⁸ Mëë wee tëë nɔ, cu ji̱ A-ma-lek ben, cukɛ ben nyiëëny kɛ ji̱ I-thɛ-rɛl kä Rɛ-pi-dim.

⁹ Cu Muthɛ Jɔ-cua jiök i̱, “Kuenyni kɔn wutni, bia wä raar bia wä nyiëëny kɛ ji̱ A-ma-lek iruun, ɣän bä ku lɛ cuɔ̱ŋ wi̱i̱ pa̱a̱m ɛmɛ te kɛɛt Kuɔth te̱tädä.”

¹⁰ Cu Jɔ-cua ɛ la̱t ni nɔ ni kɛ mëë ci Muthɛ ɛ la̱r jɛ. Cukɛ nyiëëny kɛ ji̱ A-ma-lek. Cu Muthɛ kɛnɛ Ä-ron kɛ Ɣur wä wi̱i̱ pa̱a̱m.

¹¹ Kä mɔ ci Muthɛ te̱tkɛ kap nhial ɔ bi ji̱ I-thɛ-rɛl kɛ joc, kä mɔ cɛ te̱tkɛ ka̱m piny ɔ bi ji̱ A-ma-lek kɛ joc.

¹² Kä cuɛ Muthɛ wuɔ̱ɔ̱kɛ luaŋ. Kä cukɛ päm ka̱n, cukɛ jɛ jak kä nyuurɛ thi̱n. Cu Ä-ron kɛnɛ Ɣur te̱tkɛ thak nhial, ram ɔ kui̱c ɔ, ram ɔ kui̱c ɔ. Cu te̱tkɛ cu cuɔ̱ŋ ɛpi̱c a /cɛ lath amäni kony ca̱ŋ.

¹³ Cu Jɔ-cua ji̱ A-ma-lek gi̱t kɛ ko̱r.

¹⁴ Cu Kuoth Nhial Muthɛ jiök i̱, “Gɔ̱ri nɛmɛ rɛy buɔk kɛ ɣöö ba jɛ tit, kä nyɔkɛ kɛ lat Jɔ-cua, kɛ ɣöö ba kɛ̈k ji̱ A-ma-lek woc ni kä kɛɛl rɛy ɣɔaa.”

¹⁵ Cu Muthɛ yi̱k täth kä cuɛ ciötdɛ cɔl i̱ Kuoth Nhial ɛ jɛn Bɛɛrä,

¹⁶ kɛ ɣöö ɛ jɛn i̱ tëë kɛ ram mi ci tetdɛ la̱th bɛ̈r Kuɔth Nhial. Kɛ kui̱ ɛmɔ, bi Kuoth Nhial tëë tɛr kɛ ri̱c ji̱ A-ma-lek diaal.