Ɣöth 16 - RUAC KUƆTH IN RƐL RƆ

Muɔ̱c Kuɔth kɛ I-thɛ-rɛl mana kɛnɛ kaaŋkuɔ̱ɔ̱t

¹ Cu duɔl ji̱ I-thɛ-rɛl kɛɛliw nyuɔŋ kä E-lim, kä kɛ cäŋ kä wäl dhieec kä pay in cɔal i̱ pɛt ni jiɛnädiɛn ro̱o̱l I-jëp, cukɛ ben rɛy dɔaar Thin, mi te kam E-lim kɛnɛ Thi-nay.

² Cu duɔl ji̱ I-thɛ-rɛl ni kɛɛliw göny kɛ Muthɛ kɛnɛ Ä-ron rɛy dɔaar,

³ cukɛ kɛ jiök i̱, “Görkɔ ni mi ci Kuoth Nhial kɔ näk mëëdan, mëë ta̱kɔ kä I-jëp guäth ëë la nyuɔ̱ɔ̱rkɔ gëëkni cuɔ̱ɔ̱knikɔ tin te gɔɔl, kä ro̱ŋ ri̱ŋda kɛnɛ kuända, a bakɔ mi̱th a bi nɛy ria̱ŋ ɛlɔ̱ŋ, ɛnɔ no̱o̱ŋɛ ni kɔ raar kɛ jɛ mɔ, kɛ ɣöö bi buɔth nɛy ben näk rɛy dɔaar mi ce̱tkɛ nɛ, bia lar.”

⁴ Cu Kuoth Nhial Muthɛ jiök i̱ nɛnɛ, “Ɣän bä mi̱eth yuɔr piny nhial kɛ kui̱dun, bi naath mi̱th ti ro̱ŋ kɛ mi̱eth ca̱ŋ kɛl la wä kuany ciaŋ, kɛ ɣöö göörä themdiɛn, mi bikɛ ruaacnikä käp, kiɛ /cɛ bia̱ jɛn.

⁵ Kɛ cäŋ in bäkɛliɛn mi wäkɛ mi̱th tin la cam kɛ ni ciaŋ wä no̱o̱ŋ a mi lɛm mat kɛ thi̱n kɛ kui̱ ca̱ŋ in rɛwdɛ.”

⁶ Cu Muthɛ kɛnɛ Ä-ron ji̱ I-thɛ-rɛl diaal ku jiök i̱, “Ɛn thiaaŋni mi, bia jɛ ŋa̱c ɛn ɣöö ɛ Kuoth Nhial ɛ nëë no̱o̱ŋ yɛ raar muun I-jëp,

⁷ kä kɛ runwaŋ bia gɔɔy Kuɔth Nhial nɛn, kɛ ɣöö cɛ go̱o̱nynikun kɛ jɛ liŋ, kɛ Ɣöö ɛpuc, yɛn /cia gɔny ni kɔ, gɔanyɛ ni Kuoth Nhial puɔ̱nydɛ.”

⁸ Cu Muthɛ kɛ jiök i̱, “Mi la Kuoth Nhial yɛ a mooc ri̱ŋ kɛ thiaŋ, kä muoocɛ yɛ mi̱eth mi riääŋ yɛ kɛ runwaŋdɛ kɛ ɣöö cɛ go̱o̱nynikun liŋ, kuakɔ la ŋaani, mɔ dërɛ göny kɛ kɔ mɔ? Nɔmɔ ɛ mi go̱o̱ny ni yɛn kɛ Kuoth Nhial kä /cɛ dëë me̱t a kɔn.”

⁹ Cu Muthɛ Ä-ron ku jiök i̱, “Jio̱kni duɔl ji̱ I-thɛ-rɛl kɛɛliw i̱, ‘Bia, ti̱eecɛ rɔ̱ nhiam Kuɔth Nhial kɛ ɣöö cɛ go̱o̱nynikun liŋ.’ ”

¹⁰ Gua̱a̱th ëë ruac Ä-ron kɛ duɔl ji̱ I-thɛ-rɛl diaal, cukɛ därdɔaar di̱el gui̱c, nɛnɛ cu buay Kuɔth Nhial jɔɔc rɛy puɔ̱rä.

¹¹ Cu Kuoth Nhial Muthɛ jiök i̱,

¹² “Cä go̱o̱nyni gan I-thɛ-rɛl tin ca gɔny liŋ. Jio̱kni kɛ i̱, ‘Mi̱rä kɛ thiaŋ, camɛ ri̱ŋ, kɛ runwaŋdɛ mi̱ethɛ kɛ mi̱eth a bia ria̱ŋ, bia cu ŋa̱c pa̱ny i̱ ɛ ɣän Kuoth Nhial Kuothdun.’ ”

¹³ Ɛn thiaaŋ ëë cu ŋɛcni ben wi̱c, cukɛ wec kum kɛɛliw. Kä kɛ runwaŋ cu thäc jɔk wec thiäŋ ɛliŋ.

¹⁴ Kä mëë wä thäc jiɛn, jɔk wec cuɛ tekɛ mi nyiŋnyiŋ mi ce̱tkɛ pät mi cu jɔɔc rɛy dɔaar kä cɛ rɔ kɔl piny.

¹⁵ Mëë wä ji̱ I-thɛ-rɛl ɛ nɛn, cukɛ wee i̱, “Ɛ le̱e̱ŋu ɛn nɛmɛ?” Kɛ ɣöö kueckɛ jɛ i̱ ɛŋu. Kä cu Muthɛ kɛ jiök i̱, “Nɛmɛ ɛ mi̱eth mi ci Kuoth Nhial ɛ ka̱m yɛ kɛ ɣöö bia cam.

¹⁶ Kä nɛmɛ ci Kuoth Nhial jɛ la̱r yɛ i̱, ‘Lapɛ jɛ la ma̱a̱tɛ yɛn diaal ɛwic, a ram ɔ kän pe̱k in de̱rɛ cam. Bia liɛɛr kɛl la ka̱nɛ kɛ kui̱c raam kɛl kä nɛy tɔ̱ te cieŋ tɔ̱.’ ”

¹⁷ Cu ji̱ I-thɛ-rɛl ɛ la̱t ni nɔ. Cu tha̱a̱ŋdiɛn ti ŋuan ma̱a̱t, kä cu tha̱a̱ŋdiɛn ti tɔt ma̱a̱t.

¹⁸ Kä mëë wäkɛ kɛ thɛm kɛ lieeri cu ram ëë ci ti ŋuan ma̱a̱t thil rëpdiɛn mi cɛ je̱k, kä ram ëë ci ti tɔt ma̱a̱t, cuɛ thil mi te jɔ̱ɔ̱r kä jɛ. Cu kɛn diaal ma̱a̱t ni pe̱k ëë ro̱ŋ kɛ mi̱eth raam ɔ kɛl ɔ.

¹⁹ Cu Muthɛ kɛ jiök i̱, “A thil ram mi bäny duɔthdɛ piny a bɛ runwaŋ cop.”

²⁰ Kä /ken kɛ ruac Muthɛ liŋ, cu tha̱a̱ŋdiɛn tha̱a̱ŋ nyinikiɛn ba̱ny piny amäni mëë ruɔ̱ndɛ, kä cukɛ thia̱a̱ŋ kɛ lɔa̱a̱t, kä cuɛ ŋuɔ̱th. Cu Muthɛ kɛ̈c kɛ kɛ.

²¹ Cukɛ jɛ cua kuany kɛ runwaŋ ni ciaŋ, kuany ram ɔ ni pe̱k in bɛ cam, kä mi ci cäŋ le̱e̱th bɛ ler.

²² La luɔckɛ kue̱ny kua̱n kä rɛɛw kɛ cäŋ in bäkɛliɛn rɛy ni̱ni lätni. Themni omɛrä da̱ŋ rɛw kä ram ɔ. Mëë wä bööth dolä min ci tuɔɔk ben la̱r Muthɛ,

²³ cu Muthɛ kɛ jiök i̱, “Nɛmɛ ɛ jɛn mëë ci Kuoth Nhial ɛ lar, iruun ɛ cäŋ lɔ̱ŋä mi ca gok a bum, ɛ cäŋ lɔ̱ŋä mi rɛl rɔ kɛ kui̱ Kuɔth Nhial, thalɛ mi thalɛ, kä la̱nyɛ mɔ la̱nyɛ mɔ, kiɛ pua̱rɛ mɔ ro̱ŋ kɛ pua̱r ɔ kä duɔthkiɛn tɔ̱wɛ kɛ amäni runwaŋ.”

²⁴ Cukɛ kɛ tɔ̱w ni nɔ amäni runwaŋ, ce̱tkɛ mëë ci Muthɛ ɛ gi̱ek kɛ, kä /ken kɛ ŋuɔ̱th kä ken kɛ tëë lɔa̱a̱t.

²⁵ Cu Muthɛ wee i̱, “Camɛ jɛ wa̱lɛ, kɛ ɣöö cäŋ ɛmɛ ɛ cäŋ lɔ̱ŋä kɛ kui̱ Kuɔth Nhial. /Cia jɛ bi je̱k rɛy dɔaar ɛn wa̱lɛ.

²⁶ Bia jɛ la kuanyɛ rɛy ni̱ni da̱ŋ bäkɛl ti̱ti̱, kä kɛ bärɔw ni̱ni, min ku la cäŋ lɔ̱ŋä, bɛ thil mi bia je̱k.”

²⁷ Cu tha̱a̱ŋ nath wä raar kɛ cäŋ lɔ̱ŋä, ɛ kɛn i̱ wäkɛ go̱r, thilɛ mi cua wä je̱k.

²⁸ Cu Kuoth Nhial Muthɛ jiök i̱, “Yɛn bia lueekä kɛnɛ ruaacnikä yuɔ̱pdiɛn lo̱k amäni nɛy?

²⁹ Nɛ̈nɛ jɛ, ɣän, Kuoth Nhial, cä yɛ ka̱m cäŋ lɔ̱ŋä, kä kɛ bäkɛl ni̱ni bä yɛ a ka̱mä mi̱eth ni̱ni da̱ŋ rɛw. A ram ɔ kä yɛ la te guäthdɛ min tëë thi̱n. A raan /ci wä raar kɛ bärɔw ni̱ni.”

³⁰ Cu naath kua lɔ̱ŋ kɛ bärɔw ni̱ni.

³¹ Cu ji̱ I-thɛ-rɛl ciötdɛ cɔl i̱ mana. Ce̱t ciaaŋdɛ kɛ ruɔŋ mi bilbil, ɛ mi bo̱r, kä liɛmdɛ ce̱tdɛ kɛ pampam mi ca pat kɛ tuaar.

³² Cu Muthɛ wee i̱, “Nɛmɛ ɛ min ci Kuoth Nhial jɛ gok. ‘A liɛɛr mi̱eth ba tɔ̱a̱w kuaykun diaal, kɛ ɣöö bikɛ mi̱eth ëë cä te̱e̱k ni yɛ rɛy dɔaar mëë ka̱mä yɛ raar muun I-jëp cu nɛn.’ ”

³³ Cu Muthɛ Ä-ron jiök i̱, “Käni tuɔ̱k, a them liɛɛr mi̱eth manakä wä rɛydɛ kue̱ŋni jɛ nhiam Kuɔth Nhial ala duundɛ mi ba yop kɛ kui̱ kuaynikɔn diaal.”

³⁴ Cu Ä-ron ɛ la̱th nhiam thanduɔ̱k gukä Kuɔth ala mi yuɔpkɛ.

³⁵ Cu Gaat I-thɛ-rɛl mi̱eth mana cam kɛ run ti jiɛn ŋuaan amäni cuɔ̱pdiɛn muun in ciaŋkɛ. Cukɛ jɛ cam amäni cuɔ̱pdiɛn ke̱th muɔ̱ɔ̱n Kɛ-naan.

³⁶ (Theem ŋɔaani ti ko̱o̱t ɛn guäth ëë ɛ dhaar mi tëë lieeri wäl.)