Ɣocä 9 - RUAC KUƆTH IN RƐL RƆ

Duäc I-thɛ-rɛl

¹ A lɔcdu /ci tɛth lö I-thɛ-rɛl! A /ci gɔaa ɛlɔ̱ŋ ce̱tkɛ nɛy tin kɔ̱kiɛn, cia̱ ler mi ci Kuothdɛ pa̱l rueec. Ci nhɔk ni ɣöö bi rɔ kɔak ce̱tnikɛ ler mi dua̱ckɛ kä piny gua̱th kɔ̱a̱mni bɛɛl diaal.

² Ɛn gua̱th kɔ̱a̱mni kɛnɛ dha̱a̱ri kɔaŋ /ca kɛ bi mi̱eth. Kä bi kɔaŋ in pay la̱t thil.

³ Kä /cikɛ bi lɛ te rɛy muɔ̱ɔ̱n Kuɔth Nhial, bi Ɛ-pa-rim cu loc kä I-jëp, kä bɛ cu cam ni mi̱th mi /ci rɔ lot kä A-thi-ri-ya.

⁴ Kä /ca kɔaŋ bi̱lɛ muɔc piny ala muc Kuɔth Nhial, amäni luurikiɛn /ca lɔc Kuɔth bi jak kä tɛth. Kä kɛn luuri ɛ tɔ̱ bikɛ ce̱tkɛ, mi̱eth jiɛthkä lɔaac kä kɛ, kä nɛy diaal tin wä kɛ wä cam, bikɛ nyuɔn. Kä ɛn mi̱th ɛmɔ ba duŋ buath pua̱nynikiɛn kärɔa, /cikɛ bi cop rɛy luaak Kuɔth Nhial ala muc.

⁵ Kä ɛŋu ɛnɔ bia la̱t ɔ kɛ cäŋ ŋarä min ca mɛk, cäŋ ŋarä Kuɔth Nhial?

⁶ Nɛ̈nɛ jɛ wäkɛ, lënykɛ rɔ kä A-thi-ri-ya, bi ji̱ I-jëp kɛ rol. Bikɛ kɛ kony ɛn wi̱ni rɛɛkdiɛn kä Mɛm-pith! Kä ba ria̱ŋdiɛn min la yiëëth in bo̱r can ɛ kuäk, kä ba ti̱eckiɛn ka̱n ɛ kuiy.

⁷ Ci gua̱a̱th kɛ kui̱ duäcä cop, gua̱a̱th in bi ram ɔ min ro̱ŋ kɛ jɛ jek. Mi wee tuɔɔk ɛn nɔmɔ, bi I-thɛ-rɛl ɛ ŋa̱c! Kä bikɛ wee i̱, “Gök ɛmɛ ɛ dɔ̱a̱r, kä ɛn ramɛ tekɛ yiëë ɛ yɔŋ.” Kɛ ɣöö ŋuan dueerkun kɛnɛ nyi̱er di̱tdun.

⁸ Gök ɛ gääŋ ji̱ Ɛ-pa-rim tin la nɛɛ Kuɔthdä, duundɛ ni ɣöö te dhuur duɔ̱pnikɛ diaal, kä te nyir luaak Kuɔth bä.

⁹ Cikɛ rɔ nyon kɛ dueerkiɛn ce̱tnikɛ mëë tekɛ kä Giba. Bi Kuoth dueerkiɛn tim kä bɛ kɛ duäc kɛ kui̱diɛn.

Dueer I-thɛ-rɛl kɛnɛ rikɛ

¹⁰ Kä mëë jëkä I-thɛ-rɛl ce̱tdɛ nikɛ thoŋɛdit därdɔaar, kä mëë nɛ̈ɛ̈nä guuri, ce̱tkɛ nikɛ dɛy jiaath ŋɔa̱a̱p tin nhiam. Min cikɛ ben kä Baal-pɛ-or, cikɛ rɔ cu ley kuoth ni Baal. Kä cikɛ cu jiääk ce̱tnikɛ min nhɔk kɛn ɛ.

¹¹ Bi wuɔ̱t Ɛ-pa-rim rɔ bar ce̱tnikɛ dit, bɛ thil dap, kä bɛ thil ruët, kä /ci ruët bi tuɔɔk.

¹² A cäŋɛ mi wä kɛ gaat dap bä, bäkɛ naŋ ni kɛn diaal a thil kɛl mi bä ba̱ny piny a tëk. Kä mi wa̱a̱ kɛn diaal wä ba̱ny piny, riɛk akɛ kɛ.

¹³ Kä gaat Ɛ-pa-rim, kɛ nën in nɛ̈ɛ̈näkɛ, luɔtdiɛn ɣöö kɛ ti bi duɔ̱p. Bɛ gaatkɛ nöŋ ŋuut nath ɛn Ɛ-pa-rim.

¹⁴ Kä ɛŋu mi dëë thiec kä Kuoth Nhial i̱ derɛ lät kɛ nɛy ɛti? Jak ni mänkiɛn kä rol! Kä ɛ thinkiɛn thil cak!

Luk Kuɔth kɛ I-thɛ-rɛl

¹⁵ Kɛ ɣöö lät jiäknikiɛn diaal tuɔɔkɛ kä Gil-gal, kä niɛ wa̱a̱ni cä kɛ tok kɛ lo̱k thi̱n. Kɛ kui̱ lätnikiɛn ti jiäk, bäkɛ tuɔɔk raar cieeŋdä. Kä /cä bi lɛ ŋot kɛ mi nhɔakä kɛ, ci bööthkiɛn diaal ɣä lo̱k.

¹⁶ Ɛ-pa-rim ce̱tdɛ kɛ juac mi ci tharɛ kööt, mi /ci dɛy dee kuir, kä /cikɛ bi tekɛ gaat. A cäŋ wä kɛ tekɛ gaat, kä nhɔk kɛn kɛ, bäkɛ näk.

¹⁷ Bi Kuothdä kɛ cu lo̱k, kɛ ɣöö /ka̱n ruac Kuɔth liŋ ɛ kɛn, bikɛ cu ga̱y rɛy nath.