Ɣocä 8 - RUAC KUƆTH IN RƐL RƆ

Luk Kuɔth kɛ I-thɛ-rɛl kɛ kui̱ palä kuth guäyni

¹ Kuɔth ɛ kaaŋ läärä kɛ ɣöö nyoŋgol a wi̱i̱ luaakdä Kuɔth Nhial. Kɛ ɣöö ci naath gukdä töl, kä ca ŋuɔ̱tkä ba̱ny piny ɛ kɛn.

² A cäŋ cɔl kɛn ɣä i̱, “Kuothda, kɔn ŋa̱ckɔ ji̱, kɔn ji̱ I-thɛ-rɛl.”

³ Kä kɛ ɣöö ci I-thɛ-rɛl mi gɔaa lo̱k, bi gua̱n tɛ̈r ɛ guɔ̱r.

⁴ Muɔckɛ rɔ kua̱r, ti /ka̱n ka̱m kɛ, kä muɔckɛ rɔ bööth ti kuecä. Kä ta̱th kɛ rɔ kuth baaŋ kɛ da̱a̱pdiɛn kɛnɛ ciɛkdiɛn in ciɛk in bo̱r, kɛ kui̱ däkädiɛn.

⁵ Cä kɛ lo̱k, lö Tha-mɛ-ria, kɛn kuth da̱a̱pniku, kɛ̈cdä akɛ kɛ. A ku amäni nɛy, bɛ thil dueer ɔ ɛn I-thɛ-rɛl?

⁶ Ɛ bel tääth ɛmɔ, /ciɛ Kuoth. Kä ɛn kuth tha̱a̱k dääpä Tha-mɛ-ria ɛmɔ ba däk!

⁷ Kɛn piɛthkɛ ni jiɔam, kä ba ŋɛr ni thul, bɛl thilɛ kɛ wuɔ̱th, kä mi wä kɛ te wäŋ, ba kɛ cam ɛ nɛy ti kɔ̱kiɛn.

⁸ Ca I-thɛ-rɛl bät ɛ nɛy ti kɔ̱kiɛn, ta̱a̱dɛ rɛydiɛn, cɛ cua̱ mi thil luɔt kä ɣä.

⁹ Kɛ ɣöö cikɛ wä kɔŋ ni A-thi-ri-ya, ce̱tnikɛ muul dɔaar mi ga̱y kärɔa. Cu Ɛ-pa-rim rɔ kök nhöökɛ.

¹⁰ A cäŋ ni mi kɔakɛ rɔ̱ kam ni nath ɔ, niɛ täämɛ bäkɛ ruɔl guäth kɛl. Kä bikɛ kueny kua̱rikiɛn ka̱p cuɔ̱ŋ kɛ gua̱a̱th mi tɔt.

¹¹ A cäŋ ni mɔ ci Ɛ-pa-rim yi̱kni ti ŋuan täth ɛ kɛ kui̱ mucni dui̱rä, kɛn ci cua̱ yi̱knikɛ tɔ̱ kɛ kui̱ dui̱rä.

¹² Kä mi wa̱a̱ kɛ gɔ̱a̱r ŋuɔ̱tkä ti̱i̱ bathdɔɔri da̱ŋ wal, ɛ ni ɣöö bikɛ kɛ lo̱k i̱ kɛ ti gööl.

¹³ Nhɔk kɛn ɣöö käm kɛn ɣä muc, kä cam kɛn ri̱ŋdɛ, ɛ ni ɣöö /ci lɔcdä tɛth kɛ kɛ ɣän Kuoth Nhial. Kä ɛn täämɛ bä dueerkiɛn tim, kä bäkɛ duäc kɛ kui̱diɛn, bikɛ loc kä I-jëp.

¹⁴ Kɛ ɣöö ci ji̱ I-thɛ-rɛl cääkdiɛn pa̱l ruëc, ca täth ni lueek ti di̱t. Kä ci Juda cu yiath ni ti̱ec ti buɔ̱m buɔ̱ɔ̱m piny. Ɛni ɣöö bä ti̱eckiɛn jäk kä mac, mi bikɛ pɛt ɛ pɛt.