Ɣocä 6 - RUAC KUƆTH IN RƐL RƆ

Riet I-thɛ-rɛl mi thil luɔt kɛ rɔ

¹ “Bia luɔcnɛ kä Kuoth Nhial, cɛ kɔn duäc, kä duundɛ ɣöö bɛ kɔn kän, kä bɛ buɔ̱ɔ̱tkɔn ben yiɛn.

² Kä kɛ kɔr ni̱ni da̱ŋ rɛw bɛ kɔn ben tëk, kɛ cäŋ in diɔ̱ɔ̱kdiɛn bɛ kɔn ben jiɛc kä banɛ cu tëk nhiamdɛ.

³ Wanɛ kä jɛ kɛ ɣöö banɛ jɛ ŋa̱c ɛn Kuoth Nhial, kɛ ɣöö bendɛ jɔcɛ ce̱tnikɛ käny ca̱ŋ. Bɛ ben kä kɔn ce̱tkɛ nhiaal, ce̱tkɛ nhiaal mi yi̱k piny kɛ ruel.”

⁴ Ɛŋu mi bä lät kä yɛ, yɛn ji̱ Ɛ-pa-rim? Kɛnɛ yɛn ji̱ Juda? Kä nhökdun cärɛ nikɛ lunhruun kɛnɛ thäc in la jiɛn ni bakä ɣɔaa.

⁵ Kɛ kui̱c ɛmɔ cä kɛ ŋuɔ̱k ni dhoon kɛ göökä. Kä kɛ lɛpdä cä kɛ näk. Ci lukdä cu lät ce̱tnikɛ bo̱l maac rɛydun.

⁶ Kɛ ɣöö ɣän göörä ni nhök mi thil pëk a /ci mɔ a muc, kɛnɛ ŋäc Kuɔth kä /ci mɔ a luuri ti waŋkɛ.

⁷ Duundɛ ɣöö ca ŋuɔ̱t töl ce̱tkɛ A-dam, ɛ jɛn thilkɛ kɛ ŋa̱th kɛ ɣä mɔ.

⁸ Kɛ ɣöö Gil-yad ɛ wec mi lät ji̱kɛ ni ti jiäk, ci rɛydɛ thia̱ŋ kɛ riɛm.

⁹ Ce̱tkɛ kɛ buɔ̱n kuëëli ti ca naath nyurikä dup. Inɔ bä bööth palä duɔlkɛ rɔ, kä na̱k kɛ naath, dup Cɛ-kɛm ɛ la̱tkɛ ti jiäk thi̱n.

¹⁰ Cä ti bɛ̈c bɛ̈ɛ̈c nɛn dhɔɔr I-thɛ-rɛl, leer Ɛ-pa-rim a thi̱n, kä ci ji̱ I-thɛ-rɛl rɔ̱ nyon.

¹¹ Amäni ji̱n Juda, ca gua̱th ŋër rialikä kɛ kui̱du. Gua̱a̱th in wa̱a̱ jɛ wä go̱r i̱ bä nɛɛkä luɔ̱c ta̱a̱diɛn ëë wenkä.