Ɣocä 14 - RUAC KUƆTH IN RƐL RƆ

Riet mi nööŋ puɔ̱th

¹ Kua rɔ riet Kuoth Nhial in la Kuothdun yɛn ji̱ I-thɛ-rɛl, kɛ ɣöö dueerkun ca yɛ jak kä pɛn.

² Kä ka̱nɛ riet kɛ yɛ kɛɛl, kä rietdɛ rɔ Kuoth Nhial jiökɛ jɛ i̱, “Woc jiäkɔ diaal, kä nhɔk ni gɔy kɔ, kä bakɔ ji̱ liak.

³ Kɛ ɣöö /ci A-thi-ri-ya kɔ dee me̱t kän, ca̱kɔ bi ŋäth ni buɔ̱m jiöŋkööri. Kä /ca̱kɔ kolaaŋkɔ tëë ca̱kɔ la̱t kɛ tetkɔ bi me̱t nyɔk kɛ ciöt i̱ kuthkɔ, kä lapi gua̱n kɔ̱a̱c lɔaac kɛ rɛɛt.”

⁴ “Bä thil ŋäthädiɛn jak kä gɔaa, kä bäkɛ nhɔk kɛ lɔcdä kɛ li̱w, kɛ ɣöö cä bi lɛ ŋot kɛ mi gakä kɛ kɛ.

⁵ Kä bä cu ce̱tnikɛ thäc kɛ ji̱ I-thɛ-rɛl, kä bi gɔɔydiɛn ce̱tnikɛ tual wi̱i̱ pi̱i̱ni, kä bɛ ciökɛ yiath piny ce̱tkɛ jiɛn.

⁶ Kä bikɛ piith rɛy teekä mi pay tuɔɔk, kä bi gɔɔydɛ ce̱tnikɛ dɛy jiaath, kä bi ŋuänydɛ pa̱a̱r nikɛ ŋuäny jiaath Lɛ-ba-nɔn.

⁷ Kɛn bikɛ ben cieŋ rɛy ti̱pkädä, kä bikɛ ciɛk ce̱tnikɛ kak wal kɛ kui̱ kɔaŋ. Kä bi gɔɔydiɛn ce̱tkɛ jiath mi kuir day, kä bi kɛ̈kdiɛn ce̱tnikɛ kɔaŋ Lɛ-ba-nɔn.

⁸ “Kä ji̱n Ɛ-pa-rim, ɛŋu bä lɛ la̱t kɛ kuth jiɛn ti̱ti̱ ɔ? Ɛ ɣän ɛn nëë loc palun, kä ɛ ɣän tiit ji̱ mɔ. Kɛ ɣöö ce̱t ta̱a̱dä kɛ jiath mi /ci rɔl, kä puɔ̱thdun bëë kä ɣä.”

Guk ruac

⁹ A dee nɛy tin ŋa̱ckɛ ŋɔak ti̱ti̱ mal liŋ, ti ca gɔ̱r wa̱nɛ mɔ ti, a dee kɛn kɛ cu käp kɛ lo̱ckiɛn. Kɛ ɣöö dup Kuɔth Nhial cuŋkɛ, kä nɛy tin ŋa̱th kɛ jɛ jälkɛ thi̱n. Kä nɛy tin ji̱ dueeri kɔ̱th kɛ kɔ̱a̱a̱th ikä, a teth kɛ.