Ɣocä 13 - RUAC KUƆTH IN RƐL RƆ

Guut luɔ̱k I-thɛ-rɛl

¹ Mëëdan, mi ruac thok duel Ɛ-pa-rim luɔ̱thkɛ jɛ ɛ naath, kä liak kɛ jɛ kä I-thɛ-rɛl, kä jëkɛ duer kɛ palɛ kɛ Baal, kä cɛ li̱w.

² Kä ɛn täämɛ wä ni dueerkiɛn kɛ mi rëpkɛ ni rɔ̱, ta̱thkɛ rɔ kuth yieethä kɛ ciik, ta̱th kɛ kɛ ni kuurä ɛ bel, kä laar kɛn ɛ i̱, “Kuanɛ kɛ moc muc!” Ciim naath kɛ!

³ Kä inɔ kɛn nɛy ɛ ti bikɛ bath ce̱tnikɛ rur ruɔ̱nwaaŋ, kiɛ thäc in la jiɛy nikɛ runwaŋ, kiɛ ce̱tnikɛ jil guäth kɔ̱a̱m kɛnɛ tol mi bä raar kɛ wernyin.

⁴ Cu Kuoth Nhial ɛ lar i̱, “Ɛ ɣän Kuoth Nhial Kuothdu, ni kä I-jëp. Ɛn täämɛ thilɛ yɛ Kuoth dɔ̱diɛn, ɛ ni ɣän. Ɣän kä rɔaadä la käändun ɔ.

⁵ Kä ɛ ɣän ɛ nëë tiit yɛ rɛy dɔaar mun rɛ̈w.

⁶ Kä mëë cikɛ coth muun mi gɔaa, cukɛ cu ria̱ŋ, kä cukɛ rɔ cu liak, a päl kɛn ɣä rueec.

⁷ Inɔ bäkɛ ma̱k ce̱tnikɛ lony, bä tɔ̱ɔ̱c duɔ̱pnikiɛn ce̱tnikɛ kuac.

⁸ Kä bä ce̱tnikɛ lɛt mi ca dɛykɛ ka̱n, bä lo̱ckiɛn lëp ɣööŋ, bäkɛ cu cam ce̱tnikɛ lony. Kä bäkɛ ŋuɔk ni dhoon ce̱tkɛ ley dɔaar.

⁹ “Ɣän bä yɛ nor yɛn ji̱ I-thɛ-rɛl! Kä ɛŋa mi bi yɛ ku lɛ luäk?

¹⁰ Kä täämɛ jɛn ni ɛn kuääru, min dëë ji̱ ben kän? Kä ka ni kɛn bööthku diaal tin ba ji̱ ben gaŋ? Tin ruaci kɛ kui̱diɛn i̱, ‘Mocä kuäär kɛnɛ bööth.’

¹¹ Kɛ gakdä cä yɛ moc kua̱r, kä kɛ ŋɛ̈ɛ̈nydä cä kɛ woc.

¹² Ca jiääk Ɛ-pa-rim gɔ̱a̱r piny, kä ca kɛ tɔ̱w ɛ bum.

¹³ Ci mäc dapädɛ man käp, duundɛ ɣöö ɛ gat mi dɔ̱a̱r, mi lo̱k ɣöö bɛ thok waath lot.

¹⁴ “A dëë kɛ ku kän rɛy bumä ɣɔaa ɛ jëk ɛmɛ? Kua dëë kɛ kän kä lia̱a̱? Kä bɛ̈cdu a ni kä lö lia̱a̱? Kä däkdu a ni kä lö cieŋ jɔɔkni? Bia kä kɛ, kɛ ɣöö thilɛ ɣä kɔ̱a̱c lɔaac kɛ kɛ.

¹⁵ “A cäŋ bi piith I-thɛ-rɛl ce̱tkɛ wal, bi jiɔam Kuoth Nhial ben, jiɔam känyä ca̱ŋ, putdɛ bëë därdɔaar. Bi yiërku kɛnɛ puɔ̱lku kööt, kä bɛ gɔy riäŋädu diaal naŋ.

¹⁶ Kä bi Tha-mɛ-ria jiäkɛ rut, kɛ ɣöö lo̱kɛ Kuothdɛ. Ba ji̱kɛ näk kɛ mut ba gaatkiɛn ŋuɔk ni dhoon, kä ba ruëtni määnkiɛn rɛ̈t kä piny bä.”