Ɣocä 12 - RUAC KUƆTH IN RƐL RƆ

¹ Ɛ-pa-rim ɛ yieen jiɔam, kä butdɛ ni kɔɔr jiɔam kui̱ känyä ca̱ŋ, ŋuan ni ka̱a̱cni kɛnɛ ko̱o̱ri rɛydiɛn. La̱tkɛ ca̱p mɛɛtda kɛ A-thi-ri-ya kä naŋkɛ liɛɛth kä I-jëp.

² Kuoth Nhial bɛ Juda nöŋ luk, bɛ I-thɛ-rɛl duäc kɛ kui̱ lätnikɛ, kä bɛ luɔ̱c ɛ nikɛ lät kɛ.

³ Kɛ ɣöö Je-kɔb cɛ kueer kɛ cuɛ̈kdɛ ni ji̱ man a /ka̱n kɛ ni dap, kä mëë ca wut cɛ lɛni kueer kɛ Kuoth.

⁴ Cɛ lɛni kueer kɛ jääk Kuɔth kä cuɛ puɔ̱t, cuɛ wiee kä cuɛ jɛ thiec kɛ puɔ̱th. Kä Beth-ɛl cuɛ röm kɛ Kuoth, ɛn wi̱ni cu Kuoth ruac kɛ jɛ.

⁵ Nɔmɔ ɛ jɛn Kuoth Nhial ni Kuoth in la Ruey Ɣɔaa, Kuoth Nhial ɛ jɛn ciötdɛ.

⁶ Kä yɛn kua rɔ riet Kuothdun kɛ luäkdɛ ɛ lat yɛn nhök kɛnɛ thuɔ̱k, kä liɛpɛ Kuothdun ni ciaŋ.

Riet luɔ̱k tin kɔ̱ŋ

⁷ Ce̱tdɛ kɛ köök mi te tetdɛ kɛ theemni kacä, nhɔkɛ ni mac nath.

⁸ Kä laar Ɛ-pa-rim jɛ i̱, “Ɣän cä ria̱ŋ, ɣän cä rɔ jek ŋɔak ti ŋuan.” Kä ria̱ŋdä /ca dueer dee jek thi̱n.

⁹ Kuɛ la ɣöö ɛ ɣän Kuothdu ni Kuoth Nhial ni kä I-jëp. Bä ji̱ nyɔk kɛ jak kä cieŋ rɛy kɛmɛni, ce̱tnikɛ ni̱n ti̱mä Kuɔthdu.

¹⁰ Ɛ jɛn ɣän Kuoth ëë ruac kɛ göök, kä mockɛ nën, kä cua̱ nɛɛkä la̱t ruaacni cäätni kɛ kɛ.

¹¹ Kä mi te Gil-yad kɛ dueer, bi ji̱kɛ a baŋ, ba yi̱knikiɛn da̱k piny rɛy ka̱a̱kni. Näk kɛn ni thääk kä Gil-gal ala muc ba yi̱knikiɛn däk rɛy ka̱a̱kni.

¹² Cu Je-kɔb rɔ bar muun Ä-ram, ɛn wa̱a̱ni cu I-thɛ-rɛl lät kɛ ɣöö bɛ ciek jëk, kä kɛ kui̱ ciek cuɛ det yiën.

¹³ Kɛ gök ci Kuoth Nhial gaat I-thɛ-rɛl ka̱m raar kä I-jëp. Kä cuɛ kɛ tit kɛ gök.

¹⁴ Kɛ ɣöö ci Ɛ-pa-rim Kuoth Nhial muc kɛ jiath lɔaac mi di̱i̱t, kɛ kui̱ ɛmɔ bi Kuothdɛ duer riɛm pa̱l wi̱i̱dɛ kä bɛ pöcdɛ luɔ̱c jɛ.