Ɣocä 11 - RUAC KUƆTH IN RƐL RƆ

Nhök Kuɔth kɛ I-thɛ-rɛl

¹ Mëë ŋot I-thɛ-rɛl kɛ kuɛ̈ɛ̈, ɣän nhɔakä jɛ, kä I-jëp cua̱ gatdä ciööl raar.

² Kä duundɛ ɣöö mɔ cä kɛ ciöl rɔ mɔ ɛlɔ̱ŋ, ɛ jɛn bariɛn kɛ rɔ kɛ ɣä bä ɛlɔ̱ŋ, nɛɛkä la kɛn a moc ni Baal kɛ muc, kä wäŋ kɛn ni kuth dɛy wal.

³ Ɛni ɣöö ɛ ɣän ɛn nëë ŋi̱i̱c Ɛ-pa-rim kɛ ja̱l, kä kɛ wuɔ̱ɔ̱kdä cä kɛ kap, kä kui̱c kɛn ɛ i̱ cä kɛ tëk.

⁴ Cua̱ kɛ buɔth kɛ dep käpä lɔaac kɛnɛ nhök, cua̱ cu ce̱tkɛ ram mi lony gäk ŋua̱knikiɛn, kä cä kɛ mi̱eth.

⁵ Bikɛ loc kä I-jëp, kä ba kɛ ruac ɛ A-thi-ri-ya, kɛ ɣöö ci kɛn ɛ lo̱k i̱ lunykɛ kä ɣä.

⁶ Bi rɛ̈kiɛn tekɛ ko̱r, bɛ thieknikiɛn töl, kä ba kɛ cu däk rɛy ti̱ecnikiɛn tin buɔ̱m buɔ̱ɔ̱m.

⁷ Di̱t löc nɛɛnikä kɛ barkɛ rɔ kɛ ɣä, kɛ kui̱ ɛmɔ bä ŋuäkdɛ yiën gääk, thilɛ mi bi jɛ lɛ woc.

⁸ Kä dëë ji̱ ku lɛ päl i̱di, ji̱n Ɛ-pa-rim? Kä dëë ji̱ ku lɛ thöp radɔ̱diɛn i̱di, ji̱n I-thɛ-rɛl? Dëë ji̱ ku lɛ pa̱a̱r kɛ A-dɛ-ma i̱di! Kä dëë ji̱ ku lɛ ciɛŋ ce̱tkɛ Dhɛ-bo-yim i̱di! Kä /ci lɔcdä jɛ bi nhɔk i̱ bä jɛ la̱t! Kɛ ɣöö nhökdä kɛ yɛ bumɛ ɛlɔ̱ŋ.

⁹ /Cä kɛ̈cdä bi ka̱m yɛ, kä /ci ɣän Ɛ-pa-rim bi me̱t nyɔk kɛ däk, kɛ ɣöö ɛ ɣän Kuoth min /ci mɔ a ran, ta̱a̱ rɛydun ɣän min rɛl gɔɔydä rɔ, /cä bi ben kɛ ɣöö bä yɛ ben däk.

¹⁰ Ba Kuoth Nhial guɔ̱ɔ̱r ɛ nɛɛkɛ, kä jɛn bɛ wiee ce̱tkɛ lony, kä mi burɛ, bi gaatkɛ ben kä jɛ kɛ luth mi di̱i̱t kui̱ konyä ca̱ŋ.

¹¹ Bikɛ ben kɛ la̱th ce̱tkɛ diit ti bä kä I-jëp kɛnɛ A-thi-ri-ya. kä bäkɛ cu luɔc ciëëŋnikiɛn, ruac ni Kuoth Nhial.

Duäc Kuɔth kɛ Juda kɛnɛ I-thɛ-rɛl

¹² Ci Ɛ-pa-rim ɣä go̱l kɛ ka̱a̱cni, kä dhɔr I-thɛ-rɛl kaaŋɛ ɣä, ɛ ni ɣöö Juda ŋäc kuoth ɛ, tekɛ kɛ ŋa̱th kɛ jɛn min rɛl gɔɔydɛ rɔ.