Ɣocä 10 - RUAC KUƆTH IN RƐL RƆ

Ruac go̱kä kɛ kui̱ I-thɛ-rɛl

¹ Ji̱ I-thɛ-rɛl ce̱tkɛ kɛ buɔ̱c mi nyok, kä kuirɛ dɛykɛ. Niɛ mɔ ci dɛykɛ ŋuan ɔ, ɛ jɛn ŋuan yi̱knikiɛn tin ta̱thkɛ. Kä mɔ ci mundiɛn gɔaa ɔ, ɛ jɛn gɔɔy riäknikiɛn bä.

² Kä /cikɛ ji̱ cuŋni, kɛ kui̱ ɛmɔ bikɛ riɛkdiɛn jëk. Kä bi Kuoth Nhial yi̱knikiɛn da̱k piny amäni riäknikiɛn.

³ Kä niɛ täämɛ pa̱ny, bikɛ wee i̱, “Canɛ thil kuäär, kɛ ɣöö /ka̱nɛ Kuoth Nhial luɔ̱th, a cäŋ ta̱nɛ kɛ kuäär bä, ɛŋu mi bɛ la̱t kɛ kui̱dan?”

⁴ Guɔ̱tkɛ rɔ kɛ ruacni baaŋ kä yackɛ rɔ kɛ ka̱a̱cni, kɛ kui̱ ɛmɔ bi luk ben kä kɛ ce̱tkɛ do̱ny dhiaacä rɛy kakä.

⁵ Kä nɛy diaal tin cieŋ kä Tha-mɛ-ria dualkɛ kɛ kui̱ ruaath Beth-a-wɛn, kɛ jɛ bi lo̱ckiɛn jiath. Kä bi bööthkɛ tin jiäk cu wiee kɛ kui̱dɛ, kä bikɛ wiee kɛ kui̱ wutdä min ci jiɛn kä jɛ.

⁶ Inɔ ɛn ruath puɔ̱nydɛ ba naŋ kä A-thi-ri-ya ala tho̱lbo̱k kua̱r in diit, bɛ Ɛ-pa-rim cu jak kä po̱c, kä bi I-thɛ-rɛl cu pöc kɛ kuothdɛ.

⁷ Kä bi kuäär Tha-mɛ-ria cu thil ce̱tnikɛ niɛr wi̱i̱ pi̱i̱ni,

⁸ ba gua̱th palä kä A-bɛn in la duer I-thɛ-rɛl däk. Kä bi kuiy yi̱knikiɛn kum. Kä bikɛ pääm jiök i̱ pɛ̈nɛ wi̱i̱da, kä yi̱kdɛ kɔ piny.

Lär Kuɔth kɛ luk I-thɛ-rɛl

⁹ Ji̱ I-thɛ-rɛl /ka̱n ɣöö lät kɛn ɣä kä dueer ni päl, nikɛ gua̱a̱th ëë dui̱rkɛ kɛ kä Giba. Kä niɛ wi̱ni kä Giba /ci ko̱r kɛ ŋal jëk thi̱n?

¹⁰ Kä bä cu ben dup nɛɛni tɔ̱ tekɛ dueer tɔ̱, kä bäkɛ cu duäc, kä bi naath rɔ cu duɔl kɛ, gua̱a̱th in duäckɛ kɛ kɛ kui̱ ŋuan dueerkiɛn.

¹¹ Ce̱t Ɛ-pa-rim kɛ nac mi ca ŋi̱eec kɛ kui̱ la̱t kɔ̱a̱m bɛɛl kä nhɔk ɛ jɛ. Cä ŋuäkdɛ min gɔaa gaŋ, ɛni ɣöö bä ŋuäk Ɛ-pa-rim gak kɛ gääk, kä bi Juda puur kɛ piny, kä bi I-thɛ-rɛl piny dhil to̱k.

¹² Kä pi̱ethɛ rɔ cuŋ, kä ŋɛ̈rɛ dɛy nhök mi thil pëk. Tökɛ mundun kä puɔ̱rɛ jɛ, kɛ ɣöö ɛ gua̱a̱th mi ba thiec ni Kuoth Nhial, ɛn ɣöö derɛ yɛ ben puɔ̱th nhiaal.

¹³ Kɛ ɣöö cia pith ni dueer, kä cia ŋɛr ni thil thuɔ̱ɔ̱kni, kä cia cam ni dɛy ka̱a̱cni. Kä cia ŋäth ni thurbiɛɛli, kɛnɛ ŋuan wäthni köörun.

¹⁴ Kɛ kui̱ ɛmɔ bi rɔal köör tuɔɔk kä nɛɛku, kä bi ti̱eckun tin buɔ̱m buɔ̱ɔ̱m duɔ̱ɔ̱p kɛn diaal, bɛ ce̱tnikɛ däk ëë cu Cal-man Beth-ar-bɛl däk kɛ jɛ ko̱o̱r, a cuɛ män ŋuɔ̱k ni dhoon kɛnɛ gaatkiɛn kɛɛl.

¹⁵ Kä ɛ jɛn mi bi tuɔɔk kä yɛ, yɛn duɔ̱ɔ̱r I-thɛ-rɛl kɛ kui̱ ŋuan lätnikun ti jiäk. Kä ɛ niɛ röm köör, bi kuäär I-thɛ-rɛl duɔ̱p.