Tuk Cäkä Ɣɔaa 50 - RUAC KUƆTH IN RƐL RƆ

¹ Ni ɛn wanɛ mɔ, cu Jo-thɛp rɔɔdɛ kuɛr kä gua̱n a cuɛ pa̱r ɛlɔ̱ŋ kɛ kui̱dɛ kä wëë kɛ mi cimɛ gua̱n.

² Cuɛ kiemni tin lät kɛ kui̱ pua̱a̱nydɛ la̱t laat ɛn ɣöö bikɛ puɔ̱ny gua̱n yi̱r kɛ wal ti ba ŋuäny ri̱eŋdɛ gaŋ. Cu kiemni ri̱i̱ŋdɛ cu yi̱r.

³ Cukɛ ni̱n ti jiɛn ŋuaan thuk kɛ yierɛ kɛ ɣöö tɔ̱tɔ̱ kɛ kɛn pe̱k ni̱ni tin la thuɔ̱ɔ̱kɛ ni yi̱er raam mi ci li̱w. Cua lia̱a̱dɛ tim ɛ ji̱ rööl I-jëp kɛ ni̱n ti jiɛn bärɔw.

⁴ Mëë ci ni̱n tëë paar kɛ jɛ thuuk, cu Jo-thɛp ruac kɛ ji̱ kɔaar kua̱r ni Pɛro wee i̱, “Mi ta̱a̱ kɛ gɔɔy mi jëkä nhiamdun, malɛ jɛ la̱t kuäär ni Pɛro,

⁵ ɛn ɣöö mëëdan ëë ci gua̱a̱r thia̱k kɛ lia̱a̱, jɛn cɛ ɣä jak kä mi yaacä rɔ nhiamdɛ i̱ bä ri̱i̱ŋdɛ wä dhil kony ro̱o̱l Kɛ-naan kɔ̱k mi cɛ rialikä ɛ jɛn kɛ kui̱dɛ. A jɛ mal ɣä moc ni̱n ti tɔt ti dëë wä kony ni gua̱a̱r, kä bä cu wä luny jɔk.”

⁶ Min ci Pɛro mɛmɛ liŋ, cuɛ wee i̱, “A jɛ cup guk ëë cɛ yaac ni rɔ nhiam gua̱n ɛn ɣöö bɛ gua̱n wä kony guäth ëë ca gok ɛ kɛn.”

⁷ Ɛ jɛ nɔ, cu Jo-thɛp cu jiɛɛn kɛ ɣöö bɛ gua̱n wä kony kä cu naath diaal wä kɛɛl kɛ jɛ, ti̱ti̱ kɛ kuaany Pɛro kɛ di̱t cieeŋdɛ diaal kɛ di̱t rööl I-jëp kɛɛliwdɛ,

⁸ amäni ji̱ gɔaal Jo-thɛp diaal, kɛnɛ dämani kɛ thok duëël gua̱n, ɛ ni gaatkiɛn kɛnɛ ɣɔ̱ɔ̱kiɛn kɛ de̱tkiɛn kɛn tin cu duɔth kä Go-cɛn.

⁹ Kä cu ji̱ thurbiɛɛli wä kɛɛl kɛ kɛ amäni ji̱ jio̱o̱kni, cuɛ la ɣöth mi di̱t ɛlɔ̱ŋ.

¹⁰ Kä mëë cikɛ cop guath kɔmä bɛɛl kä A-tad kui̱c in lot ni kir Jɔr-dɛn, cukɛ pa̱r kɛ gua̱a̱th mi bäär kä cu lo̱cnikiɛn jiath ɛlɔ̱ŋ. Kä cu Jo-thɛp gua̱n tim kɛ ni̱n da̱ŋ bärɔw.

¹¹ Kä mëë ci ji̱ rööl Kɛ-naan tëë ciaŋkɛ gua̱a̱th ɛmɔ lul ɛmɔ nɛn därdöör kɔmä bɛɛl kä A-tad, cukɛ wëë i̱, “Ɛ pa̱r mi di̱i̱t ɛlɔ̱ŋ mi ci ji̱ rööl I-jëp jɛ par ɛn wanɛ.” Ɛ jɛn cukɛ gua̱a̱th ɛmɔ cɔl i̱ A-bel-mi-dha-rim. Jɛn tëë kui̱ci wëë kä käny ca̱ŋ kiɛɛr Jɔr-dɛn i̱.

¹² Inɔ cu gaat I-thɛ-rɛl ɛ la̱t ce̱tnikɛ ruac ëë ci gua̱ndiɛn ɛ nyuɔ̱th kɛ.

¹³ Cukɛ ri̱i̱ŋ gua̱ndiɛn kap ro̱o̱l Kɛ-naan kä cukɛ jɛ wä kony kɔ̱k kunyä rɛy kakä Mak-pe-la mëë kɔk A-bɛ-ram ɛ kä Ɛp-rɔn raan Ɣɛ̈th. Ɛ jɛn kak in car rɔ kɛ Ma-mɛ-ri.

¹⁴ Mëë ci Jo-thɛp gua̱n thuk kɛ kuɔ̱ny, cuɛ loc ro̱o̱l I-jëp, jɛn kɛnɛ dämani kɛ nɛy diaal tëë ca jɛ wä luäk kɛ kuɔ̱nydɛ.

Thuɔ̱k lɔaac Jo-thɛp kɛ kui̱ dämani

¹⁵ Kɛ kɔr li̱eth gua̱ndiɛn cu dämani Jo-thɛp lo̱ckiɛn thia̱a̱ŋ kɛ dual ɛ kɛn i̱, mi kuɛɛ Jo-thɛp lɔcdɛ lɛ wëŋ kɔn täämɛ kä de̱rɛ kɔn cu luɔ̱c tɛr a de̱rɛ jiäk diaal tëë canɛ lät kä jɛ col.

¹⁶ Ɛ jɛn cukɛ cu ben kä Jo-thɛp kä cukɛ jɛ jiök i̱, “Mëë /ke̱n guur ni li̱w, cɛ kɔ jiök i̱ la̱tdɛ jɛ Jo-thɛp i̱ ci guur wëë i̱,

¹⁷ ‘Ma̱a̱th päli dämuɔɔri dueriɛn in jiääk, kɛn cikɛ ji̱ ciɛŋ ni jiäk.’ Ɛ jɛn täämɛ ku kɔ mal pa̱l duera, kɛ ɣöö kɔn bä palkɔ ni jɛn Kuoth in pal guur ɛ.” Mëë cikɛ mɛmɛ la̱t Jo-thɛp, cu jɛ luäŋ ni wiee.

¹⁸ Cukɛ rɔ̱ lɛni ben yuɔr piny ciöknikɛ kä lar kɛn ɛ i̱, “Ɛ kɔn la kuaanyku.”

¹⁹ Cu Jo-thɛp kɛ jiök i̱, “Ɛŋu mi dual kɛ yɛ? Ɛ kua̱ la Kuoth in mith?

²⁰ Kä mëëdan yɛn cia ɣä ca̱p ca̱p mi jiääk, kä ci Kuoth ca̱pdun loc ni mi gɔaa, kɛ ɣöö ba nɛy ti ŋuan kän kɛ jɛn ka̱n ɛ cɛ kään ni kɔn diaal ɛ.

²¹ Kɛ kui̱ ɛmɔ, /cuarɛ lɛ dual kɛ ɣöö ni ɣän puɔ̱nydä bä min, cam yɛn diaal ɛ jek.” Cuɛ kɛ nyɔk kɛ lät thuɔ̱k mi cu cop ni lo̱cnikiɛn ɛpuc.

Lia̱a̱ Jo-thɛp

²² Cu Jo-thɛp cu cieŋ rɛy rööl I-jëp jɛn kɛnɛ ji̱ gɔaal gua̱n kɛɛl kä cuɛ te te̱e̱kä kɛ run ti kuɔ̱r kɛl wi̱cdɛ jiath kɛl.

²³ Amäni mëë cɛ ri̱c in diɔ̱ɔ̱kdiɛn lip kɛnɛ gaat gatdɛ ni Ɛ-pa-rim kä gaat Ma-kir min mɔ gat Ma-na-thɛ. Cu Jo-thɛp kɛ lɛni rɔm kɛ buɔ̱rɛ.

²⁴ Täämɛ cu Jo-thɛp dämani ku jiök i̱, “Ɣän bä li̱w. Kä Kuoth bɛ yɛ tit kä bɛ yɛ naŋ raar ɛn wi̱c ɛ, kä bɛ yɛ naŋ ro̱o̱l in cɛ lat i̱ bɛ ka̱m A-bɛ-ram kɛ Ay-dhɛk kɛ Je-kɔb.”

²⁵ Cuɛ gaat I-thɛ-rɛl jak kä bikɛ rɔ̱ yac nhiamdɛ i̱, “Mi wä Kuoth yɛ wä tit, yɛn bia cɔ̱wkä dhil luɔc ro̱o̱l Kɛ-naan.”

²⁶ Inɔ, cu Jo-thɛp li̱w a cɛ tekɛ run ti kuɔ̱r kɛl wi̱cdɛ jiath kɛl, kä cua ri̱ŋdɛ yi̱r kɛ wal kä cua jɛ la̱th rɛy thandukä kunyä kä I-jëp.