Tuk Cäkä Ɣɔaa 5 - RUAC KUƆTH IN RƐL RƆ

Gaat A-dam

¹ Mɛmɛ ɛ jɛn warɛgak ciöötni gan A-dam. Mëë cak Kuoth naath, cuɛ kɛ cak nikɛ cätdɛ.

² Cuɛ kɛ cak tuut kɛnɛ ŋuɔ̱ɔ̱t. Kä cuɛ kɛ poth kä cuɛ kɛ cɔl i̱ Naath.

³ Kɛ gua̱a̱th ëë ci A-dam tekɛ run ti kuɔ̱r kɛl wi̱cdɛ jiɛn diɔ̱k, cuɛ gat di̱eth kä cuɛ jɛ cal kɛ cätdɛ pa̱ny, kä cuɛ ciötdɛ cɔl i̱ Thɛth.

⁴ Kɛ kɔr däpä Thɛth cu run teekä A-dam a run ti kur bädäk ɛgi̱m. Kä cuɛ dhɔɔl kɛnɛ nyi̱er kɔ̱kiɛn lɛni di̱eth.

⁵ Ɛ jɛ nɔ, täämɛ mat runi teekä A-dam diaal kɛ run ti kur bäŋuan wi̱cdɛ jiɛn diɔ̱k, cuɛ cu li̱w.

⁶ Kä mëë ci Thɛth tekɛ run ti kuɔ̱r kɛl wi̱cdɛ dhieec, cuɛ I-nɔc di̱eth.

⁷ Kɛ kɔr däpä I-nɔc cu run teekä Thɛth a run ti kur bädäk wi̱cdɛ bärɔw, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

⁸ Ɛ jɛ nɔ, täämɛ mat runi teekä Thɛth diaal kɛ run ti kur bäŋuan wi̱cdɛ jiath kɛl wi̱cdɛ rɛw, cuɛ cu li̱w.

⁹ Kɛ gua̱a̱th ëë ci I-nɔc tekɛ run ti jiɛn bäŋuan ɛ juc, cuɛ Kii-nan di̱eth.

¹⁰ Kɛ kɔr däpä Kii-nan cu run te̱e̱kä I-nɔc a run ti kur bädäk wi̱cdɛ jiath kɛl wi̱cdɛ dhieec, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

¹¹ Ɛ jɛ nɔ, täämɛ mat runi te̱e̱kä I-nɔc diaal kɛ run ti kur bäŋuan wi̱cdɛ dhieec, cuɛ cu li̱w.

¹² Mëë ci Kii-nan lɛ tekɛ run ti jiɛn bärɔw ɛgi̱m cuɛ Maa-lä-lɛl di̱eth.

¹³ Kɛ kɔr däpä Maa-lä-lɛl cu run te̱e̱kä Kii-nan a run ti kur bädäk wi̱cdɛ jiɛn ŋuaan, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

¹⁴ Ɛ jɛ nɔ, täämɛ mat runi te̱e̱kä Kii-nan diaal kɛ run ti kur bäŋuan wi̱cdɛ jiath kɛl ɛgi̱m, cuɛ cu li̱w.

¹⁵ Mëë ci Maa-lä-lɛl lɛ tekɛ run ti jiɛn bäkɛl wi̱cdɛ dhieec, cuɛ Yɛ-rɛd di̱eth.

¹⁶ Kä kɛ kɔr däpä Yɛ-rɛd cu run te̱e̱kä Maa-lä-lɛl a run ti kur bädäk wi̱cdɛ jiɛn diɔ̱k, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

¹⁷ Ɛ jɛ nɔ, cu mat runi te̱e̱kä Maa-lä-lɛl diaal a run ti kur bädäk wi̱cdɛ jiɛn bäŋuan wi̱cdɛ dhieec, kä cuɛ cu li̱w.

¹⁸ Kä mëë ci Yɛ-rɛd tekɛ run ti kuɔ̱r kɛl wi̱cdɛ jiɛn bäkɛl wi̱cdɛ rɛw, cuɛ Ä-nɔk di̱eth.

¹⁹ Kɛ kɔr däpä Ä-nɔk cu run te̱e̱kä Yɛ-rɛd a run ti kur bädäk ɛgi̱m, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

²⁰ Ɛ jɛ nɔ, cu mat runi te̱e̱kä Yɛ-rɛd diaal a run ti kur bäŋuan wi̱cdɛ jiɛn bäkɛl wi̱cdɛ rɛw, kä cuɛ cu li̱w.

²¹ Kä kɛ gua̱a̱th ëë ci Ä-nɔk tekɛ run ti jiɛn da̱ŋ bäkɛl wi̱cdɛ dhieec, cuɛ Mɛ-thu-cɛ-la di̱eth.

²² Kɛ kɔr däpä Mɛ-thu-cɛ-la cu Ä-nɔk ja̱l kɛɛl kɛnɛ Kuoth kɛ run ti kur diɔ̱k, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

²³ Ɛ jɛ nɔ, mat runi te̱e̱kä Ä-nɔk diaal kɛ run ti kur da̱ŋ diɔ̱k wi̱cdɛ jiɛn bäkɛl wi̱cdɛ dhieec.

²⁴ Cu Ä-nɔk ja̱l kɛɛl kɛnɛ Kuoth, kä cuɛ thil kɛ ɣöö ci Kuoth ɛ riw.

²⁵ Guäth ëë ci Mɛ-thu-cɛ-la lɛ tekɛ run ti kuɔ̱r kɛl wi̱cdɛ jiɛn bädäk wi̱cdɛ bärɔw cuɛ Lɛ-mɛk di̱eth.

²⁶ Kɛ kɔr däpä Lɛ-mɛk cu Mɛ-thu-cɛ-la te te̱e̱kä kɛ run ti kur bärɔw wi̱cdɛ jiɛn bädäk wi̱cdɛ rɛw, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

²⁷ Ɛ jɛ nɔ, cu mat runi te̱e̱kä Mɛ-thu-cɛ-la diaal a run ti kur bäŋuan wi̱cdɛ jiɛn bäkɛl wi̱cdɛ bäŋuan, cuɛ cu li̱w.

²⁸ Mëë ci Lɛ-mɛk tekɛ run ti kuɔ̱r kɛl wi̱cdɛ jiɛn bädäk wi̱cdɛ rɛw cuɛ gat mi dho̱o̱l di̱eth.

²⁹ Cuɛ ciötdɛ cɔl i̱ Nowa, laarɛ jɛ i̱, “Bi gat ɛmɛ kɔn lor lätnikɔn kɛnɛ cuɔ̱cdan muun in ci Kuoth Nhial ɛ bit.”

³⁰ Kɛ kɔr däpä Nowa cu Lɛ-mɛk te te̱e̱kä kɛ run ti kur dhieec wi̱cdɛ jiɛn bäŋuan wi̱cdɛ dhieec, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

³¹ Ɛ jɛ nɔ, mat runi te̱e̱kä Lɛ-mɛk kɛ run ti kur bärɔw wi̱cdɛ jiɛn bärɔw wi̱cdɛ bärɔw, cuɛ cu li̱w.

³² Mëë ci Nowa tekɛ run ti kur da̱ŋ dhieec ɛgi̱m, cuɛ Cɛm kɛ Ɣɛ̈m kɛ Ya-pɛth di̱eth.