Tuk Cäkä Ɣɔaa 49 - RUAC KUƆTH IN RƐL RƆ

Puɔth Je-kɔb kɛ gaatkɛ

¹ Täämɛ cu Je-kɔb gaatkɛ cu ciöl rɔ kä cuɛ wee i̱, “Ruɔlɛ rɔ̱ guäth kɛl kɛ ɣöö bä yɛ ben la̱t tin ba yɛ jek ni̱ni tɔ̱ bëë tɔ̱.

² Nyuɔ̱ɔ̱rɛ bua̱ni kä liɛŋɛ min bä la̱t yɛ, lö gaatkä, liɛŋɛ ruacdä.

³ “Rɛ-u-ben, ɛ ji̱n kɛ̱̈ɛ̱̈dä pa̱ny min la nyuth ŋuɛɛtädä, kä jio̱l kuayni kä tieey dapädä. Di̱t ni luthdu rɛy gankä, kä di̱t ni buɔ̱mdu rɛydiɛn.

⁴ Ci ji̱n a lɛny lɛny ce̱tkɛ pi̱ nyɔac, /ci rɔ bi nyɔk kɛ di̱t rɛy gankä, kɛ ɣöö ci män guur ka̱n, kä inɔ, ci thil luth kɛ kölkä.

⁵ Cim-on kɛnɛ Lii-bay ciaaŋdiɛn kɛl. Kɛn jakɛ kuak lätnikiɛn kä yio̱w na̱k nath.

⁶ Ɣän /cä ciɛŋ lo̱cnikiɛn bi nyuak kɛɛl kɛ kɛ, kiɛ dëë yiëëdä mat kɛɛl kɛ kɛ, kɛ ɣöö na̱kɛ naath mi ci ŋɛ̈ɛ̈nydiɛn ka̱p, kä muɔckɛ thääkiɛn buɔ̱ɔ̱t kɛ kui̱ ŋarä.

⁷ Ca kɛ bit kɛ kui̱ ŋɛnynikiɛn ti jiäk. Kä bä kɛ da̱k piny rɛy gan I-thɛ-rɛl.

⁸ “Juda, bi gaatmuɔɔri ji̱ liak, bi tetdu teni ŋuääk ji̱ tɛ̈ru, kä bi gaat guur ji̱ goŋ.

⁹ Juda ce̱t ta̱a̱dɛ kɛ lony mi luny jɔk käk, mi lɔ̱ŋ tɔ̱ɔ̱cä. Ɛŋa mi nhɔk kër ɛ ni̱n?

¹⁰ /Ci kɛɛt kuäärä bi luɛ̈ɛ̈r tetädɛ, kiɛ tetdä kuaynikɛ, amäni mi wä gua̱ndɛ ben, kä bi döör diaal jɛ cu luɔ̱th.

¹¹ Jɛn bɛ muulɛ yian kaarä jiaath in gɔaa ni jɛn, kä bɛ bieynikɛ lak kɛ kɔaŋ dɛɛni wal.

¹² Bi nyinkɛ tiɛth ɛ cuät kɛ ma̱th kɔŋä, kä bi lɛckɛ buɔy ɛpak kɛ ma̱th caak.

¹³ “Dhɛ-bu-lun bɛ cieŋ ni taŋ yiëër. Bi dhɔrɛ a gua̱a̱th yi̱enä babuuri, kä bi ke̱y dhɔaarɛ räth ni Dhi-don.

¹⁴ “Yi-tha-kar ɛ ni kɛnɛ muul mi tɔ̱ɔ̱c ɛ cuat kamä kɔamni nyuurä gua̱ndɛ.

¹⁵ Kä mi wëë gua̱a̱th nyuurä mi gɔaa jek, inɔ bɛ ka̱p kä ti thiɛk cu nhɔk, kä bɛ cu la kuany.

¹⁶ “Daan bɛ nɛɛkɛ ruac ala do̱r kɛl rɛy dööri gan I-thɛ-rɛl.

¹⁷ Jɛn bi ta̱a̱dɛ ce̱tkɛ thɔ̱l mi päth naath duɔ̱pni, mi käc jio̱o̱k tuɔ̱ruɔ̱k ciökni, a ba ji̱kiɛn cu yuɔr nikɛ jɔak.

¹⁸ “Guɛcä ni cäŋ in bi kään ni ɣä, lö Kuoth Nhial.

¹⁹ “Gad ba jɛ la makɛ piny ɛ ma̱a̱c, kä jɛn bɛ kɛ joc kɛ jɔak.

²⁰ “Mun A-cɛr bi mi̱thkɛ lim, kä luɔtkɛ rɔ̱ kɛ mi̱th kua̱ri.

²¹ “Nap-ta-li ɛ ni kɛnɛ nac kɛwä mi jääl ɣɔw, mi die̱e̱th ni dɛy ti puath puaath.

²² “Jo-thɛp ce̱tdɛ kɛ jiath mi läk läk mi ci piith gekä lo̱o̱lä, kä ci karkɛ läk puɔ̱ɔ̱ny kal.

²³ Ci ji̱ tɛ̈rɛ jɛ moc riɛk, kä cikɛ jɛ yiɛth kä ca̱a̱r kɛ kui̱n kui̱n, a görkɛ ni dhi̱el ɛ.

²⁴ Kä kui̱n kui̱ndɛ /ke̱nɛ me̱t bath piny, kä /ke̱nɛ tetdɛ lath, kɛ ɣöö ca jɛ luäk kɛ lua̱ŋ bumä Kuɔth Je-kɔb, min mɔ yiëën de̱e̱t in la gääŋ gan I-thɛ-rɛl.

²⁵ Jɛn Kuoth in le̱ny buɔ̱mdɛ ti diaal, in la Kuoth guur min la guic ji̱ kä poth ji̱, kɛ puɔ̱th mi bëë ni puɔ̱rä kɛnɛ puɔ̱th pi̱i̱ni mi päl raar ni piny i̱, puɔ̱th di̱ethä gan ti puɔl pua̱nykiɛn.

²⁶ Jɛn puɔ̱th in käm guur ɛ ji̱ le̱e̱nyɛ puɔ̱th ëë ci guurdɔɔŋni ɛ ka̱m jɛ, kä räthɛ gua̱thni diaal. A puɔ̱th ɛmɛ tekɛ Jo-thɛp, jɛn ram in ca lɛ̈y go̱lä rɛy ganmani.

²⁷ “Ben-ya-min ɛ ni kɛnɛ yak mi dar dar, mi cam min cɛ kak bakä, kä dääkɛ naath kä tin cɛ ma̱a̱c konyä ca̱ŋ.”

²⁸ Tɔ̱tɔ̱ diaal kɛ kɛn döör gan I-thɛ-rɛl da̱ŋ wäl rɛw, kä tɔ̱tɔ̱ kɛ kɛn rieet tëë ci gua̱ndiɛn kɛ la̱t kɛ mëë mocɛ ramɔ rieet puthä tin luɔtkɛ rɔ̱ kɛ jɛ.

Lia̱a̱ Je-kɔb kɛnɛ kuɔ̱nydɛ

²⁹ Kɛ kɔr kä tɔ̱tɔ̱ cu Je-kɔb kɛ la̱t rieet ti̱ti̱, wëë i̱, “Ci thia̱k ni ɣöö bä li̱w, mi wa̱a̱ wä li̱w kuɛɛ ri̱i̱ŋdä naŋ kä wiaa kuɔnyɛ jɛ gekä gua̱a̱dɔɔŋni rɛy kɔ̱a̱k in te muun in te kakä Ɛp-rɔn raan Ɣɛ̈th.

³⁰ Jɛn kɔa̱a̱k in te kä Mak-pe-la gekä Ma-mɛ-ri kä Kɛ-naan, muun ëë ci A-bɛ-ram ɛ kɔk kä Ɛp-rɔn ala gua̱a̱th kunyä.

³¹ Jɛn gua̱a̱th ëë ca A-bɛ-ram kɛnɛ ciekdɛ ni Thara kony thi̱n, kä gua̱a̱th ëë ca Ay-dhɛk kɛnɛ ciekdɛ ni Rɛ-bɛ-ka kony thi̱n. Cä Leya lɛni kony ɛn wani bä.

³² Ɛn kak kɛnɛ kɔa̱a̱kdɛ min te rɛydɛ, kɔakɛ kɛ kä ji̱ Ɣɛ̈th.”

³³ Mëë ci Je-kɔb gaatkɛ thuk kɛ lät rieet tɔ̱tɔ̱, cuɛ rɔ can kölikɛ. Inɔ cuɛ cu muɔn kä cuɛ cua̱ lia̱a̱dɛ.