Tuk Cäkä Ɣɔaa 48 - RUAC KUƆTH IN RƐL RƆ

Puɔ̱th Je-kɔb kɛ gan Jo-thɛp

¹ Kɛ cäŋ kɛl cua Jo-thɛp ben jiök i̱, “Nɛn ɛ, guur täämɛ li̱wɛ.” Ɛ jɛn, cuɛ gaatkɛ da̱ŋ rɛw ni Ma-na-thɛ kɛnɛ Ɛ-pa-rim cu naŋ kɛɛl kɛ jɛ.

² Mëë ca Je-kɔb jiök i̱. “Ci gatdu ni Jo-thɛp ji̱ ben gui̱l,” cuɛ rɔ kok kɛ buɔ̱m kä cuɛ rɔ jiac nyuur wi̱i̱ dhaŋä dɛ.

³ Cuɛ Jo-thɛp jiök i̱, “Ci Kuoth in le̱ny buɔ̱mdɛ ti diaal rɔ nyuɔ̱th ɣä mëë ta̱a̱ wec in cɔal i̱ Luudh ro̱o̱l Kɛ-naan, kä ɛn thɔ̱ŋi i̱ cɛ ɣä poth,

⁴ kä cɛ ɣä jiök i̱, ‘Ɣän bä kuayku re̱p kɛ ɣöö bi gaatku a döör ti nyin ŋuan kä bä mun ɛmɛ ka̱m kuayku tin ba gua̱a̱thdu guäl ala duŋdiɛn mi do̱raar.’ ”

⁵ Cuɛ jɛ lɛni jiök i̱, “Jo-thɛp, gatdä, gaatku da̱ŋ rɛw tin ci di̱eth ro̱o̱l I-jëp mëë /ka̱n ni ben, cä kɛ mat. Ɛ-pa-rim kɛnɛ Ma-na-thɛ akɛ a gaatkä ce̱tnikɛ gatdä ni Rɛ-u-ben kɛnɛ gatdä ni Cim-on.

⁶ Kä gaat tin bi di̱eth kɛ kɔriɛn bikɛ la nyinku kä ba kɛ ciöl dämani ni Ɛ-pa-rim kɛnɛ Ma-na-thɛ kɛ kui̱ bo̱thnikiɛn.

⁷ La̱tdä jɛ inɔ kɛ ɣöö mëëdan ëë luɔ̱nyä jɔk kä Pa-dan, cu lɔcdä jiääk ɛlɔ̱ŋ kɛ ɣöö muɔɔr ni Re-cɛl cɛ li̱w jäl rɛy rööl Kɛ-naan mëë cakɔ Ɛp-rath ŋäthikä kä mi tɔt. Cua jɛ kony dup wäkäda Ɛp-rath min mɔ Beth-lɛ-ɣɛm täämɛ.”

⁸ Min cɛ gaat Jo-thɛp da̱ŋ rɛw nɛn, cuɛ thi̱ec i̱, “Kä dho̱o̱li ti̱ti̱ kɛ ŋaani?”

⁹ Cu Jo-thɛp gua̱n jiök i̱, “Kɛ kɛn gaatkä tëë ci Kuoth kɛ ka̱m ɣä ɛn wi̱c ɛ.” Ɛ jɛn cu I-thɛ-rɛl cu wee i̱, “Ku kɛ mal ni nööŋ thiekä kɛ ɣöö deekɛ ben poth.”

¹⁰ Täämɛ I-thɛ-rɛl cɛ nyinkɛ ti̱l kɛ ɣöö ci dɔŋdɛ di̱t, kä /cɛ ne̱n agɔaa. Inɔ, cu Jo-thɛp gaatkɛ cu ti̱ec gua̱n kä cu gua̱n kɛ ciɛm kä kuakɛ kɛ.

¹¹ Cuɛ Jo-thɛp jiök i̱, “Ɣän /cä jɛ ŋäc ɛn ɣöö dëë ji̱ nyɔk kɛ nën, kä täämɛ Kuoth cɛ ɣä jak kä mi nɛ̈ɛ̈nä ji̱ amäni gaatku bä.”

¹² Kä cu Jo-thɛp kɛ cu woc nhiam Je-kɔb kä cuɛ rɔ goŋ nhiam gua̱n.

¹³ Kä cu Jo-thɛp kɛ nyɔk kɛ ti̱c jɛ kääpɛ Ɛ-pa-rim kɛ tet cuëëcdɛ min lot ni tet caam I-thɛ-rɛl, kä te Ma-na-thɛ tetdä caamdɛ min lot ni cuec I-thɛ-rɛl, kɛ ɣöö Ma-na-thɛ ɛ jɛn gat in kɛ̱̈ɛ̱̈.

¹⁴ Kä I-thɛ-rɛl, min cɛ kɛ lɔ̱m kɛ te̱tkɛ, cuɛ te̱tkɛ gua̱c kä cuɛ tet cuëëcdɛ la̱th wi̱i̱ Ɛ-pa-rim cäŋɛ min kuiy ni jɛn, kä cuɛ camdɛ la̱th wi̱i̱ Ma-na-thɛ.

¹⁵ Kä cu Je-kɔb Jo-thɛp poth wëë i̱, “A dho̱li ti̱ti̱ ba poth ɛ Kuoth ëë ci gua̱a̱ri bo̱th rɛy lätnikiɛn. Jɛn Kuoth ëë ci ɣä tit ni mëë pay ɣä dap amäni täämɛ.

¹⁶ Kä akɛ puɔthkɛ ɛ jääk Kuɔth Nhial ëë ci ɣä kän rɛy rikni diaal kɛ ɣöö dëë kɛ ciöl ɣä kɔnɛ gua̱a̱ri ni A-bɛ-ram kɛnɛ Ay-dhɛk, kä a thuk duëlikiɛn rëpkɛ rɔ̱ wi̱i̱ muɔ̱ɔ̱n.”

¹⁷ Kä mëë ci Jo-thɛp ɛ nɛn ɛn ɣöö ci gua̱n tet cuëëcdɛ la̱th wi̱i̱ Ɛ-pa-rim cu ca̱rɛ jiääk ɛlɔ̱ŋ, kä cuɛ tet gua̱n käp ɛ jɛn i̱ de̱rɛ woc wi̱i̱ Ɛ-pa-rim kä de̱rɛ jɛ kuëŋ wi̱i̱ Ma-na-thɛ.

¹⁸ Cuɛ wee i̱, “/Ci ɛ jɛn guä, gat in kɛ̱̈ɛ̱̈ jɛn ɛn, läthni tet cuëëcdu wi̱i̱dɛ.”

¹⁹ Kä cu gua̱n jɛ lo̱k wëë i̱, “Ɛpuc ŋa̱cä jɛ, gatdä. Ɛn puɔ̱nydɛ Ma-na-thɛ bɛ la do̱r mi di̱i̱t bä, kuɛ la ɣöö bi gurɛ jɛ le̱ny kä bi kuaykɛ dööri ti ŋuan.”

²⁰ Cuɛ kɛ cu poth ɛn cäŋ ɔ wëë i̱, “Döör gan I-thɛ-rɛl diaal bikɛ rɔ̱ poth kɛ ciöötkun, a Kuoth jak ji̱ kä bi ce̱tkɛ Ɛ-pa-rim kɛnɛ Ma-na-thɛ.” Cuɛ Ɛ-pa-rim ka̱m di̱t inɔ kɛ nhiam kä Ma-na-thɛ.

²¹ Ɛn guäth ɛmɔ cu I-thɛ-rɛl Jo-thɛp cu jiök i̱, “Täämɛ ɣän cä thia̱k kɛ lia̱a̱, kuɛ la ɣöö bi Kuoth te kɛɛl kɛ yɛ kä bɛ yɛ luɔc mun guurikun.

²² Kä kɛ kui̱du cä Cɛ-kɛm ma̱t ji̱ ala duŋdu, ɛn dhɔr ëë macä kä ji̱ Ɛ-mor kɛ thɛpdä kɛnɛ kui̱n kui̱ndä.”