Tuk Cäkä Ɣɔaa 47 - RUAC KUƆTH IN RƐL RƆ

¹ Cuɛ wä kä cuɛ Pɛro wä jiök i̱, “Gua̱a̱r kɛnɛ dämaari cikɛ ben jiɛckɛ ni ro̱o̱l Kɛ-naan jälkɛ kɛɛl kɛ detkiɛn kɛnɛ ɣɔ̱kiɛn amäni kuakiɛn diaal, kä täämɛ kɛn a kä Go-cɛn.”

² Kä ŋuɛ̈tni da̱ŋ dhieec kä dämani tin ci ben kɛɛl kɛ jɛ, cuɛ kɛ cɔal rɛc kä cuɛ kɛ nyuɔ̱th kuäär ni Pɛro.

³ Cu Pɛro dämani Jo-thɛp thiec i̱, “La̱tdun ɛŋu?” Kä cukɛ Pɛro jiök i̱, “Kɔn lapkɔ yiëën ɣɔ̱ɔ̱k kɛnɛ det, amäni gua̱nikɔ tëë wal bä.

⁴ Ɛ jɛn, kɔn täämɛ cakɔ ben kɛ ɣöö bakɔ ben tekɛ ni̱n ɛn wanɛ kɛ kui̱ kä ɣöö ci ɣɔ̱ɔ̱kɔ thil wal wänɛ mi kä Kɛ-naan, kɛ ɣöö ci buɔth di̱t ɛlɔ̱ŋ ɛn wi̱ni. Ni kɛ lɔc gɔɔydu malikɔ nhök ta̱a̱ kä Go-cɛn.”

⁵ Ni ɛn wa̱nɔ cu Pɛro Jo-thɛp jiök i̱, “Ci guur kɛnɛ gaat muɔɔri ben gekädu.

⁶ Kä mun rööl I-jëp ɛ duŋdu kɛ ɣöö bi mɛɛk thi̱n. Nyuuri guur kɛnɛ gaat muɔɔri pe̱e̱k wec in gɔaa ni jɛn pa̱ny. Akɛ te kä Go-cɛn. Kä mi tekɛ nɛy ti buɔ̱m buɔ̱ɔ̱m ti ŋäci rɛy ganmuɔɔri jakni kɛ kä kua̱r yiën ɣɔ̱ɔ̱kä.”

⁷ Min ci kuäär thuɔ̱k kɛ ruac, cu Jo-thɛp gua̱n ni Je-kɔb nööŋ rɛc kä cuɛ jɛ ben nyuɔ̱th kuäär ni Pɛro kä cu Je-kɔb kuäär ne̱r kä pothɛ jɛ.

⁸ Ɛn wa̱nɔ cu Pɛro jɛ thi̱ec i̱, “Pek runiku kɛ di?”

⁹ Cu Je-kɔb ɛ loc i̱, “Ɣän runkä kɛ run ti kuɔ̱r kɛl wi̱cdɛ jiɛn diɔ̱k, kɛn runkä kɛ run ti tɔt ti ri̱wdiɛn rik jiɛthä lɔaac kä ca kɛ le̱ny ɛ pe̱k runi gua̱ndɔɔŋnikä.”

¹⁰ Inɔ cu Je-kɔb thuɔ̱k kä thi̱ec ni kua̱r, kä cukɛ rɔ̱ lät kä maalɛ. Cu Je-kɔb Pɛro poth kä cuɛ cu jiɛɛn nhiamdɛ.

¹¹ Ɛ jɛ nɔ, cu Jo-thɛp gua̱n kɛnɛ gaatmani ku nyuɔ̱ɔ̱r kä cuɛ kɛ moc mun in gɔaa ni jɛn pa̱ny ro̱o̱l I-jëp, pe̱k wec in cɔal i̱ Ra-mɛ-theth, ce̱tkɛ min ci kuäär ɛ guɔ̱k jɛ.

¹² Ɛn wanɛ mɔ cu Jo-thɛp gua̱n kɛnɛ gaatmani moc mi̱th ti ro̱ŋ kɛ kui̱diɛn kɛnɛ gaatkiɛn tin tɔatni kɛ duɔth ji̱ thuɔk duëël gua̱n diaal.

La̱t Jo-thɛp rɛy runi buath

¹³ Mëë ci buɔth ku miɛc kä thilɛ mi̱eth muun kɛɛliw, cu ji̱ rööl I-jëp kɛnɛ ji̱ rööl Kɛ-naan cuuc ɛlɔ̱ŋ kɛ kui̱ buath.

¹⁴ Cu Jo-thɛp yio̱w nɛɛni diaal tɛŋ rɛy rööl I-jëp kɛnɛ ro̱l Kɛ-naan kɛ ɣöö ca kɛ kɔk ni bɛl. Kä cuɛ yio̱w nöŋ dhɔr Pɛro.

¹⁵ Täämɛ mëë ci naath diaal yio̱o̱kiɛn ku thuuk ɛyat rɛy rööl I-jëp kɛnɛ Kɛ-naan, cu ji̱ rööl I-jëp ben kä Jo-thɛp kä cukɛ wee i̱, “Mockɔ bɛl. Ɛ kuu nhɔk ni ɣöö bi kɔ guic ɛ liwkɔ? Kä nɛn ɛ, kɔn ci yio̱o̱kɔ thuuk.”

¹⁶ Cu Jo-thɛp kɛ loc i̱, “Mi ci yio̱o̱kun thuɔ̱k, nööŋɛ le̱y ciëëŋnikun kä bä kɛ cu ben luël yɛ kɛ bɛl.”

¹⁷ Ɛ jɛ nɔ, cukɛ jɛ cu nöŋ ɣɔ̱kiɛn kɛ jio̱o̱k tuɔ̱ruɔ̱knikiɛn kɛnɛ detkiɛn kɛ muɔ̱likiɛn, kä cuɛ kɛ luɛl kɛ bɛl. Cuɛ wee kɛ mi mocɛ kɛ bɛl kɛ jɛn ruɔ̱n ɛmɔ kɛɛliw kɛ pe̱k le̱e̱ynikiɛn diaal.

¹⁸ Kä täämɛ mëë ci ruɔ̱n ɛmɔ thuɔ̱k, cukɛ rɔ̱ nyɔk kɛ ben kä jɛ kä cukɛ jɛ ben jiök i̱, “Thilɛ mi bakɔ tëë kɛ ji̱. Thilɛ yio̱w ti ci duɔth kɛ kɔ, kä ɣɔ̱ɔ̱kɔ diaal cikɛ a nyinku, thilɛ mi ci duɔth kɛ kɔ ɛ ni pua̱nykɔ kärɔ̱ kɛnɛ ka̱a̱kɔ. Ɛ kɛn tin ci duɔth ni kɛn.

¹⁹ Kä ji̱n, ɛ bi kɔ ku guec lia̱a̱ a dëëkɔ nuɔɔr kɔn diaal amäni muɔ̱nkɔ? Bër täämɛ ku pua̱nykɔ kɔk kɛ bɛl. A kɔn diaal kua̱ nyin Pɛro kɔn amäni muɔ̱nkɔ. Mockɔ kɛ nyin bɛɛl kɛ ɣöö bi nɛy tëk kä /ci munda bi̱lɛ nuɔɔr baaŋ.”

²⁰ Ɛ jɛ nɔ, cu Jo-thɛp mun rööl I-jëp kɛɛliw cu kɔk kɛ kui̱ Pɛro, kɛ ɣöö ci nɛy diaal kä ji̱ rööl I-jëp ka̱a̱kiɛn kɔak kɛ kui̱ kä ɣöö ci buɔth miɛc ɛlɔ̱ŋ. Kɛ jɛn kui̱ ɛmɔ cu mun rööl I-jëp a duŋ Pɛro.

²¹ Jɛn cuɛ nɛy diaal jak kä kuaany Pɛro rɛy rööl I-jëp ni kɛɛliwdɛ.

²² Ɛn gua̱a̱th muɔ̱ɔ̱n in /kenɛ kɔk kärɔa, kɛ kɛn gua̱th muɔ̱ni ti tɔ̱ nyin bööthni palä, kɛ ɣöö tekɛ kɛ pek kä ŋɔaani ti la kuäär ni Pɛro kɛ a käm kɛ kɛ kui̱ te̱e̱kädiɛn. Kä kɛ kui̱ ɛmɔ /ke̱nkɛ muɔ̱nkiɛn lɛ kɔak.

²³ Täämɛ cu Jo-thɛp naath ku jiök i̱, “Nɛ̈nɛ jɛ, ɣän cä yɛn diaal amäni muɔ̱nkun diaal kɔk kɛ kui̱ Pɛro. Ja̱ŋɛ ti̱ti̱ kɛ kuay bɛɛl, ka̱nɛ kɛ kä piɛthɛ kɛ,

²⁴ kä nɛ̈nɛ jɛ, yɛn diaal bia kui̱ kɛl kä dhieec ka̱m Pɛro kä bɛl diaal tin bia ŋɛr kɛ ruɔ̱n. Kä kui̱c da̱ŋ ŋuaan tin ci duɔth kä dhieec bikɛ a nyinkun, bia ka̱a̱k pith thi̱n kä bi ji̱ dho̱rikun mi̱th thi̱n.”

²⁵ Cukɛ jɛ loc i̱, “Ji̱n ci kɔ kän li̱th. A lɔcdu kɔ̱c kɛ kɔ, kuäär, kä kɔn diaal bakɔ la kuaany lätni Pɛro.”

²⁶ Cu Jo-thɛp ɛ la̱t ala ŋut mi ŋot thi̱n amäni walɛ ɛn ɣöö kui̱ kɛl kä dhieec kä bɛl diaal tin ci naath kɛ pur rɛy rööl I-jëp kɛɛliw bɛ la duŋ kua̱r. Cu thil ni muɔ̱n tin tɔ̱ nyin bööthni palä ɛ kɛn tin /ke̱n la nyin kua̱r ni Pɛro.

Ni̱n Je-kɔb tin jɔak

²⁷ Inɔ, cu I-thɛ-rɛl kɛnɛ nɛɛkɛ cu cieŋ kä I-jëp kä cukɛ rɔ̱ jëk gua̱a̱th ciɛŋä kä Go-cɛn. Cukɛ rɔ̱ re̱p kä wäkɛ kɛ ŋuan.

²⁸ Ɛ jɛn Je-kɔb cuɛ cieŋ kä I-jëp kɛ run wäl bärɔw kä cu pe̱k runi te̱e̱kädɛ cop kä run ti kuɔ̱r kɛl wi̱cdɛ jiɛn ŋuaan wi̱cdɛ bärɔw.

²⁹ Mëë ci gua̱a̱th liethdɛ thia̱k kɛ ben, cuɛ gatdɛ ni Jo-thɛp cɔl kä cuɛ jɛ jiök i̱, “Mi go̱o̱ri ɣöö bi lɔcdä tɛth ɛpuc, thak juäkdä kɛ tetdu ala nyuuth mi thuɔ̱k ɛn ɣöö /ci ɣä bi kony kä I-jëp.

³⁰ Kä a ɣä wa kony kɛɛl kɛ gua̱ndɔɔŋnikä. Kap ɣä rööl I-jëp kä a ɣä wa kony guäth in ca kɛ kony thi̱n.” Cu Jo-thɛp ɛ loc i̱, “Cɛ cop lɔɔcdä.”

³¹ Cuɛ jɛ jiök i̱, “Yac ɛ ɛn ɣöö bi jɛ la̱t kɛ thuɔ̱k.” Ɛ jɛn cu Jo-thɛp jɛ yac ɛn ɣöö bɛ jɛ la̱t inɔ. Kä cu Je-kɔb rɔ goŋ rɛy köli tɔ̱ɔ̱cädɛ.