Tuk Cäkä Ɣɔaa 46 - RUAC KUƆTH IN RƐL RƆ

Wä I-thɛ-rɛl rööl I-jëp kɛnɛ ji̱ dhɔaarɛ

¹ Ɛn wa̱nɔ cu I-thɛ-rɛl cu ɣöth jɛn kɛnɛ ji̱ dhɔaarɛ diaal amäni pe̱k kuaknikɛ diaal. Kä mëë cɛ cop kä Ber-cɛ-ba cuɛ Kuoth in la Kuoth gua̱n ni Ay-dhɛk thöp muc.

² Ɛn guäth ɛmɔ cu Kuoth ɛ la̱a̱k kɛ wäär cɔɔlɛ jɛ i̱, “Je-kɔb! Je-kɔb!” Kä cuɛ jɛ loc i̱, “Ɣän ɛn.”

³ Kä cu Kuoth ɛ ku jiök i̱, “Ɛ ɣän Kuoth in la Kuoth guur. /Cu dual kɛ wädu ro̱o̱l I-jëp, kɛ ɣöö ɣän bä te kɛɛl kɛ ji̱ kä bä kuayku wä jak kä do̱r mi di̱i̱t ɛn wi̱ni.

⁴ Kä ɣän puɔ̱nydä bä kɛ lɛni nööŋ jɔk. Kä bi Jo-thɛp thiëëk kɛ ji̱ kɛ cäŋ liethdu.”

⁵ Ɛ jɛ nɔ, mëë jiɛc Je-kɔb ni kä Ber-cɛ-ba wädɛ ro̱o̱l I-jëp, cu gaatkɛ jɛ jak kä ko̱tdɛ kɛɛl kɛnɛ ji̱ dho̱rikiɛn rɛy thurbiɛɛli tin ci Pɛro kɛ ka̱m kɛ.

⁶ Cukɛ ɣöth kɛ ɣɔ̱kiɛn kɛɛl kɛ kuakiɛn diaal tëë ci kɛn kɛ duɔ̱l rɔ̱ ro̱o̱l Kɛ-naan, a wäkɛ ro̱o̱l I-jëp.

⁷ Ɛ jɛ nɔ, Je-kɔb cuɛ kuaykɛ diaal naŋ ro̱o̱l I-jëp, ti̱ti̱ kɛ gaatkɛ kɛ nyieekɛ kɛnɛ gaatdöödɛ.

⁸ Täämɛ ti̱ti̱ kɛ kɛn ciööt kuayni I-thɛ-rɛl tëë cɛ naŋ ro̱o̱l I-jëp. Mɛmɛ ɛ Rɛ-u-ben in la gatdɛ min kɛ̱̈ɛ̱̈.

⁹ Rɛ-u-ben cuɛ la gua̱n Ä-nok kɛnɛ Palu, kɛ Ɣɛdh-ron kɛnɛ Kar-mi.

¹⁰ Cu gatdɛ min cɔal i̱ Cim-on a gua̱n Yɛ-muel, kɛ Ya-min kɛ O-adh, Ya-kin kɛ Dho-ɣar kɛ Ca-ul min man mɔ nya rööl Kɛ-naan.

¹¹ Kä cu gatdɛ ni Lii-bay a gua̱n Ger-con, kɛ Kɛ-ɣath kɛnɛ Mɛ-ra-ri.

¹² Cu gatdɛ ni Juda a gua̱n Ër, kɛ O-nan kɛ Cɛla kɛ Pɛ-rɛdh kɛnɛ Dhɛra, kuɛɛ la ɣöö cu Ër kɛnɛ O-nan li̱w ni ro̱o̱l Kɛ-naan. Kä gat döödɛ ni Pɛ-rɛdh min mɔ gat gatdɛ ni Juda, jɛn cuɛ la gua̱n Ɣɛdh-ron kɛnɛ A-mul.

¹³ Kä gatdɛ ni Yi-tha-kar cuɛ la gua̱n Tolä kɛnɛ Pö-wa, kɛ Ya-cub kɛnɛ Cim-rɔn.

¹⁴ Cu gatdɛ ni Dhɛ-bu-lun a gua̱n Thɛ-rɛd kɛ Ee-lon kɛnɛ Ya-leel.

¹⁵ Tɔ̱tɔ̱ kɛ kɛn gaat tëë ci Je-kɔb kɛnɛ ciekdɛ ni Leya kɛ di̱eth rɔ̱ dhɔɔr in cɔal i̱ Pa-dan-a-ram. Tekɛ kɛ nyaadiɛn mi cɔal i̱ Dina. Ɛ jɛ nɔ, pe̱k kuayni Je-kɔb kamädiɛn kɛnɛ Leya matdiɛn dhɔɔl kɛnɛ nyi̱er kɛɛl cukɛ a nɛy ti jiɛn diɔ̱k wi̱cdɛ diɔ̱k.

¹⁶ Kä cu gatdɛ ni Gad a gua̱n Dhi-piɔn, kɛ Agi, kɛ Cuni, kɛ Ɛdh-bɔn, kɛ Eri, kɛ Ä-ro-di kɛnɛ A-re-li.

¹⁷ Cu gatdɛ ni A-cɛr a gua̱n Yim-naa, kɛ Ic-waa, kɛ Ic-wi, kɛ Bɛ-ri-ya kɛ nyimandiɛn kɛɛl ni Thɛra. Kä cu gat döödɛ ni Bɛ-ri-ya min mɔ gat A-cɛr, la gua̱n Ɣɛ-bɛr kɛnɛ Mal-ki-yel.

¹⁸ Tɔ̱tɔ̱ kɛ kɛn gaat Dhil-pa ja̱ŋ nyaal ëë ci La-ban ɛ thöp nyaadɛ ni Leya. Ɛ jɛ nɔ pe̱k kuayni Je-kɔb kamädiɛn kɛnɛ Dhil-pa cukɛ a nɛy ti jiath kɛl wi̱cdɛ bäkɛl.

¹⁹ Gaat ciekdɛ ni Re-cɛl ɛ Jo-thɛp kɛnɛ Ben-ya-min.

²⁰ A-thɛ-nath, nya Pɔ-ti-pɛ-rä kuäär luaak kuɔth kä Ɔn, ɛn nyam ɛmɔ kɛnɛ Jo-thɛp cukɛ Ma-na-thɛ kɛnɛ Ɛ-pa-rim di̱eth ro̱o̱l I-jëp.

²¹ Kä cu Ben-ya-min a gua̱n Bɛlä, kɛ Bɛ-kɛr, kɛ Ac-bel, kɛ Gerɔ, kɛ Naa-man, kɛ Ɛɛ-ɣi̱, kɛ Röc, kɛ Mu-pim kɛ U-pim kɛnɛ A-rɛd.

²² Ɛ jɛ nɔ cu pe̱k kuayni Je-kɔb kamädɛ kɛnɛ Re-cɛl cukɛ a nɛy ti jiath kɛl wi̱cdɛ ŋuaan.

²³ Kä cu gatdɛ ni Daan a gua̱n Ɣa-cum.

²⁴ Kä cu gatdɛ ni Nap-ta-li a gua̱n Ya-dheel, kɛ Guni, kɛ Ye-dhɛr kɛnɛ Ci-lem.

²⁵ Tɔ̱tɔ̱ kɛ kɛn gaat Bila, ja̱ŋ nyaal ëë ci La-ban ɛ thöp nyaadɛ ni Re-cɛl. Ɛ jɛ nɔ cu pe̱k kuayni Je-kɔb kamädiɛn kɛnɛ Bila cukɛ a nɛy da̱ŋ bärɔw ɛgi̱m.

²⁶ Mat pe̱k kuayni Je-kɔb tëë wä kɛ jɛ kɛɛl ro̱o̱l I-jëp cukɛ a nɛy ti jiɛn bäkɛl wi̱cdɛ bäkɛl. Ɛn pe̱k ɛmɔ /ca män gankɛ ma̱t thi̱n.

²⁷ Matdiɛn amäni Jo-thɛp kɛnɛ gaatkɛ da̱ŋ rɛw tëë cɛ di̱eth kä I-jëp cu pe̱k thuɔk duëël Je-kɔb a nɛy ti jiɛn bärɔw ɛgi̱m. Tɔ̱tɔ̱ kɛ kɛn ji̱ thuɔk duëëlɛ tëë ci ben ro̱o̱l I-jëp.

Je-kɔb kɛnɛ ji̱ dhɔaarɛ kä I-jëp

²⁸ Mëë cikɛ thia̱k kɛ dhɔr mi cɔal i̱ Go-cɛn, cu Je-kɔb gatdɛ ni Juda jäk kä nhiamdiɛn kɛ ɣöö bɛ Jo-thɛp wä la̱r lär ɛn ɣöö bikɛ wä jëk kɛnɛ jɛ kä Go-cɛn. Cukɛ ja̱l amäni mëë cikɛ cop thi̱n.

²⁹ Mëë ci Jo-thɛp ɛ ŋa̱c ɛn ɣöö ci gua̱n ben, cuɛ thurbil rialikä kä cuɛ wä ni Go-cɛn kɛ ɣöö de̱e̱kɛ wä jëk kɛnɛ gua̱n ni I-thɛ-rɛl. Mëë cikɛ jëk kɛnɛ gua̱n cuɛ rɔ kuer jɛ kä min cikɛ rɔ̱ kuäk cuɛ wiee ɛlɔ̱ŋ.

³⁰ Ɛn guäth ɛmɔ cu I-thɛ-rɛl Jo-thɛp cu jiök i̱, “Täämɛ cäŋ kua̱ lɛ li̱w bä, ɣän ci ku thuŋ nɛn a ŋotdi te̱e̱kä.”

³¹ Min cikɛ thuɔ̱k kɛ jëk, cu Jo-thɛp ciëëŋ gua̱ni kɛnɛ dämani jiök i̱, “A wa̱a̱ kä bä Pɛro wä jiök i̱, ‘Dämaari kɛ ciëëŋ gua̱a̱r paykɛ cop ni ro̱o̱l Kɛ-naan kä ca rɔ̱ ben ma̱t ɣä.’

³² Kä bä jɛ la̱t jɛ bä ɛn ɣöö yɛn kɛ yɛn yiëën de̱e̱t kɛnɛ ɣɔ̱k, kɛnɛ ɣöö cia de̱tkun diaal kɛnɛ ɣɔ̱ɔ̱kun diaal kɛ kuakun nööŋ kɛɛl kɛ yɛ.

³³ Ɛ jɛ nɔ, mi wä Pɛro yɛ wä cɔl kä thieecɛ yɛ i̱, ‘La̱tdun ɛŋu?’

³⁴ luɔcɛ jɛ i̱, ‘lapɛ yuɔ̱ɔ̱p ɣɔ̱ɔ̱k ni kuɛkädun amäni täämɛ, kä larɛ jɛ bä ɛn ɣöö ɛ jɛn ta̱a̱ ëë kɔŋ tekɛ guurikun ni wal.’ Kɛ ɣöö kɛ jɛn kui̱ kä nɔmɔ, ba yɛ cu nhök ɣöö dërɛ cieŋ kä Go-cɛn, kɛ ɣöö ji̱ rööl I-jëp kɛn canykɛ yiëën ɣɔ̱ɔ̱k kɛnɛ yuɔ̱ɔ̱p de̱e̱t.”