Tuk Cäkä Ɣɔaa 44 - RUAC KUƆTH IN RƐL RƆ

Yiɛni Ben-ya-min

¹ Ɛn guäth ɛmɔ cu Jo-thɛp wut in mɔ kuäär läätdä cieeŋdɛ la̱t ŋɔak kä cuɛ jɛ jiök i̱, “Wutni tɔ̱tɔ̱ thiäŋni cualikiɛn ce̱tnikɛ pe̱k in bi thia̱a̱ŋ kɛ kɛ, kä läthni ramɔ yio̱o̱kɛ thok cualɛ.

² Kä liɛɛr pi̱i̱nidä, min la liɛɛr ciɛkä in bo̱r, läthni jɛ thok cual gatdä min tɔtdiɛn bä, kɛn diaal amäni yio̱w bɛɛlkɛ. Mëë ci wut ɛmɔ rieetkɛ liŋ, cuɛ mɔmɔ la̱t ni kɛ gua̱a̱thdɛ.”

³ Kɛ runwaŋ mëë ci ɣɔw baak, cua gatdi jak kä jiɛc kɛ muɔ̱likiɛn tin ca jio̱kiɛn yiën cuali.

⁴ Mëë cikɛ räth kä mi tɔt, cu Jo-thɛp wut in mɔ kuäär läätdä cieeŋdɛ jiök i̱, “Wër, copni wutni tin kɔn lɛɛr, kä wër jio̱kni kɛ i̱, ‘Ɛŋu cia mi gɔaa lɛ col kɛ mi jiääk ɔ? Kä ɛŋu mɔ cia liɛɛr cikä kua̱rä lɛ kual ɔ?

⁵ /Ciɛ jɛn min la mäth kɛ jɛ, kä /ciɛ jɛn min la maarɛ ni ti bi tuɔɔk? Yɛn cia mi jiäk la̱t ɛlɔ̱ŋ.’ ”

⁶ Kɛ kui̱ ɛmɔ cu wut ɛmɔ jiɛn kä cuɛ gatdi wä cuɔp lɛɛr. Kä mëë cɛ cop kä kɛ, cuɛ kɛ thi̱ec kɛ ruac ëë ci Jo-thɛp ɛ la̱t jɛ kɛɛliw.

⁷ Kä cukɛ wut ɛmɔ loc i̱, “Kua ŋumdu, kuäär, mɔ ruaci kɛ kɔ inɔ mɔ? Kɔn /cakɔ mɔmɔ dëë me̱t la̱t.

⁸ Ɛŋu mi dëë wä kual kɛ kɔ dhɔɔr kua̱ru, i̱ nɔnɔ cäŋ kuɛ la ciɛk in bo̱r kiɛ da̱a̱p, dëëkɔ jɛ kual i̱di? Kulɛ guic ni ɛn yio̱w tëë wakɔ jek thukni cualikɔ wäkäda ro̱o̱l Kɛ-naan, cuakɔ kɛ luɔ̱c ji̱.

⁹ Mi ba liɛɛr ɛmɔ jek kä ram kɛl rɛyda, a ram ɛmɔ duundɛ a lia̱a̱, kä kɔn diaal bakɔ cua kuaanyku.”

¹⁰ Kä cu wut ɛmɔ kɛ jiök i̱, “Gɔaaɛ, a jɛ tëë nɔ ce̱tkɛ min cia lar, kuɛ la ɣöö ɛ jɛn ram in ba jɛ jek kä jɛ ɛ ni̱n bi a kuanydä kärɔaadɛ, kä bi duɔthkun cu wä a thil bɛ̈l.”

¹¹ Ɛ jɛn cukɛ rɔ̱ cu pɛ̈th kɛ mi käp ramɔ cuaalɛ piny jɔk muɔ̱lɛ kä lɛp ramɔ thok cualɛ.

¹² Cu wut ɛmɔ cualikiɛn go̱r ni kɛn diaal, tokɛ jɛ ni kä gat in di̱i̱t, a wä kä gat in tɔtdiɛn, kɛ jɔak cua liɛɛr jek rɛy cual Ben-ya-min.

¹³ Niɛ min ca jɛ jek thi̱n, cukɛ bieynikiɛn rɛ̈t kɛ jiath lɔaac. Cukɛ ɣa̱a̱ckiɛn nyɔk kɛ kue̱ŋ jio̱kni muɔ̱likiɛn kä cukɛ loc wi̱c.

¹⁴ Ɛn wanɛ mɔ Jo-thɛp ŋotdɛ tëë dhɔɔrɛ. Mëë ci Juda cop kɛɛl kɛ dämani, cukɛ coth due̱e̱lɛ kä cukɛ rɔ̱ ka̱m mua̱a̱l nhiamdɛ.

¹⁵ Täämɛ cuɛ kɛ cu jiök i̱, “Ɛ le̱e̱y ŋu ɛnɛ cia la̱t ɛ? Kuecɛ jɛ ɛn ɣöö min cia la̱t dëë jɛ ŋa̱c ni kä kɛɛl kɛ ma̱r ŋɔaani min ciaaŋä ni rɔ?”

¹⁶ Kä cu Juda jɛ jiök i̱, “Bakɔ lat ni ŋu, lö kuäär? Dëë kɔ rɔ̱ moc cuɔ̱ɔ̱ŋ i̱di? Ci Kuoth duera nyoth. Kɔn diaal lapkɔ kuaanyku kɛɛl kɛ jɛn ram in ca liɛɛr jek kä jɛ.”

¹⁷ Duundɛ ɣöö cuɛ kɛ jiök i̱, “Ɣɛ̈th, /ci ɛ jɛn inɔ. Ɛn ram in ca liɛɛr jek kä jɛ, ɛ jɛn ɛ ni̱n bi la kuany kärɔa, guäth in bi duɔthkun loc kä guurun kɛ mal.”

Liɛp Juda ni wutdä

¹⁸ Ɛn guäth ɛmɔ cu Juda wä kä jɛ thiekä kä cuɛ jɛ jiök i̱, “Kɛ kɔ̱a̱c lɔacdu, kuäär, a malä ruac kɛ ji̱, kä a lɔcdu /cɛ waŋ kɛ ɣä, kɛ ɣöö ji̱n puɔ̱nydu pääri nikɛ kuäär ni Pɛro.

¹⁹ Kuäär, mëë kɔŋi kɔ thi̱ec mëëdan i̱, ‘Mi ta̱kɔ kɛ dämaara kiɛ gua̱a̱ra?’

²⁰ Kɔn cuakɔ ji̱ loc i̱, ‘Ta̱kɔ kɛ gua̱a̱ra mi cia̱ wut mi di̱i̱t, kɛɛl kɛ gatdɛ mi die̱e̱thɛ dɔŋädɛ. Gat man gatdä ɛmɔ cɛ li̱w, kä ɛ jɛn gat kɛl in ci duɔth kä man. Kä nhɔakɛ jɛ ɛ gua̱n.’

²¹ Kä mëë ci jɛ lar i̱, ‘A jɛ nöŋkɛ ɣä kɛ ɣöö bä jɛ ben nɛn.’

²² Kɔn cuakɔ ruacdu loc i̱, ‘Jɛn gat ɛmɔ /cɛ gua̱n dëë me̱t ba̱ny piny, kɛ ɣöö mi de̱rɛ jiɛɛn gekä gua̱n, dëë gua̱n li̱w.’

²³ Kä ji̱n curi kɔ jiök i̱, ‘Mi /ci dämaara bi ben, kɔn /cakɔ bi ben nhiamdu.’

²⁴ Ɛ jɛn ɛnɔ, mëë cakɔ loc kä gua̱a̱ra, cuakɔ jɛ wä kuen ruacdu, ji̱n kuäär.

²⁵ “Mëë cakɔ ruac ɛmɔ kuen jɛ, kɛ kɔr ni̱ni ti tɔt cuɛ kɔ jiök i̱, ‘Wiaa, wiaa kökɛ kɔn bɛl ti tɔt.’

²⁶ Kä cuakɔ jɛ luɔ̱c jɛ i̱, ‘/Cakɔ dëë wä, kɛ ɣöö /cakɔ dëë wä nhiam wutdä ɛmɔ kä thilɛ Ben-ya-min mi wä kɛ kɔ kɛɛl. Kä mi wëë kɛɛl kɛ kɔ, ɛ jɛn dëë kɔ wä.’

²⁷ Ɛnɔ, cu gua̱a̱ra kɔ jiök i̱, ‘Ŋa̱cɛ jɛ ɛn ɣöö man gankä cɛ ɣä diëth gaat da̱ŋ rɛw.

²⁸ Gat kɛl kä kɛ cɛ thuŋ bath nhiamdä, kä /cɛ ro̱ŋ lɔɔcdä ɛn ɣöö kɛ thuɔ̱k ca jɛ cam ɛ le̱y, kɛ ɣöö /ka̱n jɛ nyɔk kɛ nën amäni ɛn walɛ.

²⁹ Kä mi wiaa dho̱o̱l ɛmɛ wä naŋ tetädä kä bi riɛk ɛ wä jek, yɛn bia ɣä jak kä li̱w kɛ jiath lɔaac.’

³⁰ Nɛn ɛ, kuäär, kɛ ɣöö tëk gua̱a̱r ɛ kɛl kɛnɛ tëk gatdɛ, ɣän mi wa̱a̱ wä jiɛn a /ci ŋuɛ̈t ɛmɔ wä kɛɛl kɛ ɣä,

³¹ mi wä gua̱a̱r ɛ nɛn ɛn ɣöö te gatdɛ jɔ̱ɔ̱r, kɛ thuɔ̱k jɛn bɛ li̱w, kä ɛ ɣän ɛn in bi jɛ jak kä näk jiath lɔaac ɛ.

³² Min dëë mat thi̱n bä, ɣän cä tëkdä luɛl nhiam gua̱a̱r kɛ kui̱ dhöl ɛmɔ. Cä gua̱a̱r jiök i̱, ‘Mi /cä dho̱o̱l ɛmɔ bi luɔ̱c jɛ, bä tekɛ bɛ̈l nhiam gua̱a̱r kɛ pe̱k te̱e̱kädä kɛɛliw.’

³³ Kä täämɛ, kuäär, liɛpä ni ji̱, a duɔ̱thä guäth dhöl ɛmɔ ala kuanydu, kä a jɛ loc cieŋ kɛɛl kɛ dämani.

³⁴ Dëë wä kä gua̱a̱r i̱di kä /ci ŋuɛ̈t ɛmɔ bi wä kɛɛl kɛ ɣä? Ɣän /cä gua̱a̱r dëë wä guɛc piny kɛ nyinkä a li̱wɛ kɛ lia̱a̱ mi bɛc bɛc.”