Tuk Cäkä Ɣɔaa 43 - RUAC KUƆTH IN RƐL RƆ

Loc dämani Jo-thɛp kä I-jëp kɛ Ben-ya-min kɛɛl

¹ Min ci gua̱a̱th wee kɛ wä, cu buɔth wee kɛ di̱t rɛy rööl Kɛ-naan.

² Kä mëë cikɛ bɛl tëë nööŋkɛ rööl I-jëp thuk, cu Je-kɔb gaatkɛ jiök i̱, “Luɔcɛ jɔk kä wiaa kökɛ kɔn nyin tiit bɛɛl.”

³ Kä cu Juda jɛ jiök i̱, “Ɛn wut ëëdan cɛ kɔ la̱r lär ni bumi, ‘/Cakɔ nhiamdɛ bi nɛn ɛni mi ja̱lkɔ kɛɛl kɛ dämaara.’

⁴ Ɛn wanɛ mɔ, mi bi dämaara pa̱l wä kɛ kɔ kɛɛl, bakɔ wä kä bakɔ bɛl wä kɔk kɛ kui̱dun.

⁵ Kä mi wi̱i̱ jɛ pen, kɔn /cakɔ bi wä, kɛ ɣöö wut ɛmɔ cɛ kɔ jiök i̱, ‘/Cakɔ nhiamdɛ bi nɛn mi thilkɛ dämaara kɛ kɔ kɛɛl.’ ”

⁶ Cu I-thɛ-rɛl kɛ ku jiök i̱, “Ɛŋu mi la̱tdɛ ni ɣä jiäk, kä ɛŋu mi cuarɛ wut ɛmɔ jiök ɛn ɣöö te yɛn kɛ dämuɔɔrun mi dɔ̱diɛn?”

⁷ Cukɛ jɛ loc i̱, “Wut ɛmɔ thi̱ecɛ kɔ ɛlɔ̱ŋ kɛ kui̱ ji̱ cieeŋdan kä thi̱ecɛ kɔ i̱, ‘Guurun ŋotdɛ te̱e̱kä? Yɛn te yɛn kɛ dämuɔɔrun mi dɔ̱diɛn?’ Cu duunda cua luɔc thieecnikɛ. Dëë kɔ jɛ kulɛ ŋa̱c i̱di ɛn ɣöö bɛ kɔ pär ikä i̱, ‘Nööŋɛ dämuɔɔrun wanɛ mɛ?’ ”

⁸ Kä ɛnɔ cu Juda gua̱n jiök i̱, “Päli gatdu wä kɛɛl kɛ ɣä kä bakɔ cu jiɛɛn ni kä kɛɛl kɛ ɣöö banɛ cu tëk, kɔn kɛ yɛ amäni gaatkɔ diaal tin tɔatni.

⁹ Ɣän bä tëkdä thöp kɛ kui̱dɛ, jakni ɣä kä ram in bi jɛ tit. Mi /cä jɛ bi luɔ̱ɔ̱c jɔk kɛ mal, bä tekɛ bɛ̈l mi thil pe̱k nhiamdu.

¹⁰ Duundɛ ɣöö nɛnɛ, mi thili ɣöö cakɔ jääny täämɛ ce̱t cakɔ rɔ̱ loc kɛ ja̱l ni kä rɛɛw.”

¹¹ Min cɛ duɔ̱ɔ̱r guic thiɛkɛ, cuɛ gaatkɛ jiök i̱, “Mi bɛ dhil tëë inɔ, la̱tdɛ mia̱a̱ wanɛ, yɛn nöŋɛ wut ɛmɔ muc mi tɔt kä mi̱th wecdan tin com. Nöŋɛ jɛ luaac kɛ liɛɛth tuar kɛ ji̱th ŋuänydiɛn kɛ tɔ̱ɔ̱c.

¹² Rëpɛ rɔ̱ kɛ yio̱w ti ce̱t pe̱kdiɛn kɛ yio̱w tëë ca luɔc rɛy cuali bɛɛlkun. Bia yio̱w tɔ̱tɔ̱ naŋ kɛɛl kɛ yɛ bä, kɛ ɣöö dɔ̱ŋ kueckɛ kɛ loc thi̱n.

¹³ Täämɛ, pɛ̈thɛ rɔ̱ kɛ rialikä, kä naŋɛ dämuɔɔrun kuɛɛ loc kä wut ɛmɔ.

¹⁴ A Kuoth in le̱ny buɔ̱mdɛ ti diaal jak wut ɛmɔ kä mi bi lɔcdɛ kɔ̱a̱c kɛ yɛ, kä bɛ dämuɔɔrun ni Cim-on luɔ̱c yɛ amäni Ben-ya-min. Kä ɣän, mi ɛ thil gankä, bä thil gaat.”

¹⁵ Cu gaatkɛ ruacdɛ liŋ, kä cukɛ cu jiɛɛn. Ɛn guäth ɛmɔ, mëë ci dämani Jo-thɛp cop rɛy rööl I-jëp, cukɛ ben kä jɛ.

¹⁶ Ɛn wa̱nɔ mëë ci Jo-thɛp kɛ nɛn a te Ben-ya-min kɛ kɛ kɛɛl, cuɛ wut in mɔ läät cieeŋdɛ jiök i̱, “Naŋni wutni tɔ̱tɔ̱ dhɔɔrä, kä inɔ wër näk duɔ̱ɔ̱r kä riali mi̱eth ikä, kɛ ɣöö kɛn wutni tɔ̱tɔ̱ bikɛ mi̱th kɛ ɣä kɛɛl ɛn ca̱ŋda̱a̱ri.”

¹⁷ Ɛ jɛn, cu wut ɛmɔ kɛ cu naŋ dhɔɔr Jo-thɛp kä cuɛ min ca la̱r jɛ wä la̱t.

¹⁸ Kɛ nöŋ ëë ca naŋ ni kɛ dhɔɔr Jo-thɛp, cukɛ dual, carkɛ jɛ ɛ kɛn i̱, “Nööŋkɛ kɔn rɛc kɛ kui̱ yio̱o̱ni tëë kɔn tëë ca nyɔk kɛ loc rɛy cualikɔn. Bɛ kɔn pɛc ala kuaanykɛ, kä bɛ muɔ̱likɔn cu mac.”

¹⁹ Kɛ kui̱ ɛmɔ cukɛ ben kä wut indaan in te thok rɛ̈ɛ̈k,

²⁰ kä cukɛ jɛ jiök i̱, “Kuäär, a mia̱ wanɛ malkɔ ni la̱t ji̱. Kɔn cakɔ kɔŋ ben kɛ ɣöö bakɔ bɛl ben kɔk,

²¹ kä nɛn ɛ, mëë luɔckɔ jɔk cuakɔ yio̱o̱kɔ jek rɛy cualikɔ ni kɛn diaal, te ramɔ yio̱o̱kɛ thok cualɛ. Kä täämɛ kɔn cakɔ yio̱w tɔ̱tɔ̱ nyɔk kɛ no̱o̱ŋ,

²² kä cakɔ rɔ̱ nyɔk kɛ bär yio̱w kɔ̱kiɛn, kɛ ɣöö bakɔ bɛl kɔ̱kiɛn ben nyɔk kɛ kök. Kɔn kueckɔ ram ɔ ci yio̱o̱kɔ luɔc cualikɔ mɔ.”

²³ Kä cu wut indaan kɛ jiök i̱, “A pua̱nykun kɔ̱c, /cuarɛ diɛɛr, yio̱o̱kun cä kɛ käp kɛ tetdä. Ɛ Kuothdun in la Kuoth guurun ɛnɔ ci muc ɛmɔ la̱th rɛy cualikun ɔ.” Inɔ cuɛ Cim-on cu nöŋ kɛ.

²⁴ Min ci wut ɛmɔ Cim-on nööŋ, cuɛ kɛ naŋ duëël Jo-thɛp kä cuɛ kɛ nyuɔ̱ɔ̱r ni gɔaa a no̱ŋɛ kɛ pi̱ ti lakkɛ ni ciökiɛn. Cuɛ muɔ̱likiɛn mi̱eth bä.

²⁵ Kä mëë ci gatdi jɛ liŋ ɛn ɣöö bikɛ mi̱th kɛɛl kɛ Jo-thɛp, cukɛ muckiɛn rialikä kɛ kui̱ benä Jo-thɛp iyiɔɔ kɛ thiaŋ.

²⁶ Kɛ gua̱a̱th mi tɔt mëë ci Jo-thɛp ben cieŋ, cu dämani muckiɛn ka̱n kä cukɛ kɛ nöŋ Jo-thɛp due̱e̱lɛ a guɔŋkɛ rɔ̱ nhiamdɛ.

²⁷ Cuɛ gatdi ne̱r, kä cuɛ kɛ cu thi̱ec i̱, “Wut in di̱i̱t ëë la̱tdɛ ɣä, min la guurun, jɛn ŋotdɛ te̱e̱kä jɔɔk, kä jɛn mal puɔ̱nydɛ?”

²⁸ Cu gatdi jɛ loc i̱, “Gua̱a̱ra jɛn a te̱e̱kä kä jɛn mal puɔ̱nydɛ.” Kä cukɛ rɔ̱ ka̱m mua̱a̱l nhiamdɛ kä cukɛ rɔ̱ goŋ nhiamdɛ.

²⁹ Täämɛ mëë cɛ rɛydiɛn car, cuɛ däman ni Ben-ya-min nɛn, gat man pa̱ny, cuɛ kɛ jiök i̱, “Mɛmɛ ɛ jɛn dämuɔɔrun ëë tɔt ëë la̱rɛ ɣä?” Ɛ jɛn inɔ cuɛ jɛ cu jiök i̱, “A puɔ̱th Kuɔth tekɛ ji̱ kɛɛl, gatdä.”

³⁰ Kä cu Jo-thɛp kɛ ba̱ny piny kɛ pɛ̈th wee rɔ go̱r gua̱a̱th mi bɛ wä wiee thi̱n, kɛ ɣöö ci ca̱rɛ di̱t kɛ nën däman. Kä mëë cɛ wä due̱e̱l mi dɔ̱ŋ cuɛ wä wiee thi̱n.

³¹ Min cɛ thuɔ̱k kɛ wiee, cuɛ nhiamdɛ lak kä cuɛ luny jɔk a cɛ lɔcdɛ ka̱p piny, kä cuɛ la̱a̱tkɛ la̱r ɣöö bikɛ mi̱eth nööŋ.

³² Mëë ca mi̱eth nööŋ cua jɛ no̱ŋikä go̱lä, kä dämani cuakɛ moc go̱lädiɛn, kä cua ji̱ rööl I-jëp tin la di̱eel wec cuakɛ moc go̱lädiɛn, kɛ ɣöö ɛ pöc kä ji̱ rööl I-jëp ɛn ɣöö de̱e̱kɛ mi̱th kɛɛl kɛ ji̱ Ɣi-bɛ-ru.

³³ Mëë wa dämani cɔal wi̱i̱ tooknikiɛn, cuakɛ cɔal kɛ pe̱k di̱tädiɛn, cua tok nikɛ ram in kɛ̱̈ɛ̱̈ rɛydiɛn a wä kä ram in pëëdiɛn. Kä min cikɛ nyuur cukɛ nyinkiɛn di̱el guec cɛ wi̱cdiɛn yi̱c ɛlɔ̱ŋ.

³⁴ Guäth ëë tekɛ mi̱th cu Jo-thɛp läät ja̱k kɛ ɣöö bɛ kɛ nöŋ kuän mi cɛ dääk kä kɛ ɛ jɛn. Kä nɛ̈nɛ jɛ, kuän Ben-ya-min le̱e̱nyɛ kuan gani ti kɔ̱kiɛn ni kä dhieec. Ɛ jɛn cu dämani mi̱th kɛɛl kɛ jɛ kä cukɛ maath kɛɛl kɛ jɛ, kä cukɛ ria̱ŋ, cu lo̱ckiɛn tɛɛth.