Tuk Cäkä Ɣɔaa 42 - RUAC KUƆTH IN RƐL RƆ

Wä dämani Jo-thɛp kä I-jëp

¹ Täämɛ mëë ci Je-kɔb ɛ liŋ ɛn ɣöö te ro̱l I-jëp kɛ bɛl, cuɛ gaatkɛ jiök i̱, “Ɛŋu mi la̱tdɛ nyuurä lɔrä?

² Nɛ̈nɛ jɛ, ɣän cä jɛ liŋ ɛn ɣöö tëë kɛ bɛl kä I-jëp. Kɛ kui̱ ɛmɔ wiaa thi̱n kä wiaa kökɛ kɔn bɛl ti banɛ cam a /ci buɔth kɔn bi lɛ näk.”

³ Ɛ jɛn ɛnɔ, cu nɛy da̱ŋ wäl jiɛn kä dämani Jo-thɛp kä cukɛ ben kɛ ɣöö bikɛ bɛl ben kɔk kä I-jëp.

⁴ Kä ɛn guäth ɛmɔ, Je-kɔb /ke̱nɛ gatman Jo-thɛp ni Ben-ya-min ja̱k kɛɛl kɛ kɛ, kɛ ɣöö luthɛ ɣöö dɔŋ bɛ tekɛ mi wä jɛ jek dup.

⁵ Inɔ, cu gaat I-thɛ-rɛl cu ben kɛɛl kɛ nɛy ti ŋuan kɔ̱kiɛn kɛ kui̱ ko̱kä bɛɛl.

⁶ Kä Jo-thɛp tëë thi̱n, jɛn ɛ kuäär wec ni kɛɛliw. Ɛ jɛn Jo-thɛp ɛn nëë ko̱k nɛy diaal kä jɛ, nɛy tëë bäk ni gua̱thni gööli. Kä min ci gaat gua̱n cop kä jɛ, cukɛ rɔ̱ goŋ nhiamdɛ.

⁷ Ɛn guäth ɔ min ci Jo-thɛp kɛ nɛn, cuɛ kɛ ŋic, kuɛɛ la ɣöö cuɛ kɛ cieŋ ce̱tkɛ nɛy ti guä ti ji̱ rööl go̱lä kä cuɛ ruac kɛ kɛ ɛ yath yath, cuɛ kɛ thi̱ec i̱, “Yɛn bia ni kä?” Cukɛ jɛ loc i̱, “Kɔn bakɔ ni ro̱o̱l Kɛ-naan kɛ ɣöö bakɔ ben kɔk bɛɛl.”

⁸ Mɔmɔ ɛ jɛn ŋi̱ec ëë ŋic Jo-thɛp ɛ ni dämani, duundɛ ɣöö /ke̱nkɛ jɛ kulɛ ŋic.

⁹ Kɛ jɛn bendiɛn ɛmɔ, cu Jo-thɛp la̱k ëë cɛ läkikä kɛ kui̱diɛn cu tim. Kä cuɛ kɛ gɔny, wëë i̱, “Yɛn kɛ yɛn lieem. Bia kɛ ɣöö bia nyua̱n rööla ben lim.”

¹⁰ Cukɛ jɛ loc i̱, “/Ci ɛ jɛn ɛnɔ, kuäär. Ɛ kök bɛɛl ɛ ni̱n no̱o̱ŋ kɔ.

¹¹ Kɔn diaal lakɔ gaat raam kɛl. /Ci ɛ kɔn lieem, kueckɔ ka̱ŋ nath.”

¹² Cuɛ jɛ lɛni la̱r kɛ i̱, “/Ci ɛ jɛn, min no̱o̱ŋ yɛ ɛ ɣöö bia nyua̱n wec ben lim.”

¹³ Cukɛ ŋot ni kɛ mi jiökɛ jɛ i̱, “Kɔn kuäär, lapkɔ kuaanyku. Mëëdan kɛ kɔn gaat mään raam kɛl, kä lap kɔ wäl wi̱cda rɛw, gaat wutdä kɛl mi cieŋ ro̱o̱l in cɔal i̱ Kɛ-naan. Gat in tɔtdiɛn jɛn a kɛɛl kɛ gua̱a̱ra, kä gat kɛl cɛ thil.”

¹⁴ Kä cu Jo-thɛp kɛ jiök i̱, “Ɛpuc ɛ ɣän i̱ kɛ yɛn lieem.

¹⁵ Kä ruacdun ba thuɔ̱kdɛ jek inɛ, ni kɛ ciöt kua̱r ni Pɛro, /ca yɛ bi nhök kac raar ɛn wanɛ ɛni mi wä dämuɔɔrun in tɔt wä ben ɛn wanɛ.

¹⁶ Bi ram kɛl kä yɛ wä kä bɛ jɛ wä nööŋ, kä tha̱a̱ŋkun bikɛ duɔth due̱e̱l yi̱eenä ɛn wanɛ kɛ ɣöö ba ruacdun jek mi ɛ thuɔ̱k. Kä mi /cɛ bia thuɔ̱k, ni kɛ ciöt kua̱r ni Pɛro, yɛn lapɛ lieem.”

¹⁷ Min cɛ mɛmɛ thuk kɛ lat, cuɛ kɛn diaal la̱th luaak yi̱eenä kɛ pe̱k ni̱ni da̱ŋ diɔ̱k.

¹⁸ Kɛ jɛn cäŋ in diɔ̱ɔ̱kdiɛn cu Jo-thɛp kɛ jiök i̱, “Nɛ̈nɛ jɛ, ɣän lapä ram mi luth Kuoth, la̱tdɛ nɛmɛ kɛ ɣöö bia tëk

¹⁹ mi lapɛ nɛy ti ji̱ thuɔ̱ɔ̱kni, a ram kɛl kä yɛ doth yi̱eenä guäthdun, kä bi tha̱a̱ŋkun wä nöŋkɛ ji̱ cieeŋnikun bɛl ti ba wä luäk ni buɔthdiɛn.

²⁰ Kä bikɛ dämuɔɔrun in tɔt wä nöŋ ɣä. Inɔ bɛ cu jɔɔc ɛn ɣöö ruacdun ɛ thuɔ̱k, kä bia cu kään rɛy rikä.” Kä kɛn cukɛ mɛmɛ nhɔk.

²¹ Kä guäth ëë ruackɛ kamnikiɛn kärɔ̱, cukɛ wee i̱, “Kɔn ɛpuc ta̱nɛ kɛ duer kɛ kui̱ kä mëë canɛ lät kä dämandan, kɛ ɣöö mëë nɛ̈nɛ riɛk jiɛthä lɔaacdɛ, /ka̱nɛ ruacdɛ liŋ guäth ëë lipɛ kɔn. Kɛ kui̱ ɛmɔ täämɛ ci riɛk ɛmɛ kɔn mom.”

²² Ɛn wa̱nɔ cu Rɛ-u-ben kɛ jiök i̱, “Ɣän /ka̱n yɛ jiök ɛn ɣöö /cuarɛ dho̱o̱l ɛmɔ lät kä mi jiääk, kä cuarɛ ruacdä lieŋdɛ lo̱k. Kɛ kui̱ ɛmɔ täämɛ riɛmdɛ thieecɛ rɔɔdɛ pua̱nynikɔn.”

²³ Guäth in tekɛ ruac inɔ, /ke̱nkɛ jɛ ŋa̱c ɛn ɣöö Jo-thɛp cɛ min lat kɛn ɛ liŋ, kɛ ɣöö mëë ruackɛ kɛ jɛ tëë kɛ ram mi luc ruacdiɛn Jo-thɛp kɛ thok rööl I-jëp.

²⁴ Kä mëë ci Jo-thɛp ruacdiɛn ɛmɔ liŋ, cuɛ wä raar kä cuɛ wä wiee. Kä mëë ci lɔcdɛ kɔ̱a̱c, cuɛ luny kä kɛ. Cuɛ Cim-on kuany rɛydiɛn, cuɛ jɛ naŋ kä cuɛ jak kä yiankɛ nhiamdiɛn.

²⁵ Cuɛ la̱a̱tkɛ cu la̱t ŋɔak ɛn ɣöö bikɛ cualikiɛn pik kɛ bɛl, kä ba ramɔ kä kɛ yio̱o̱kɛ la̱th thok cualä bɛɛlkɛ, kä ba kɛ moc mi̱th ti ba cam lɛɛr rɛy ja̱liɛn. Kä cua jɛ la̱t inɔ.

Loc dämani Jo-thɛp kä Kɛ-naan

²⁶ Mëë ci dämani thuɔ̱k kɛ mi yiankɛ bɛlkiɛn jio̱kni muɔ̱likiɛn, cukɛ jiɛɛn.

²⁷ Mëë thiaŋ guäth ëë cikɛ wee lɔ̱ŋkɛ, cu ram kɛl kä kɛ cuaalɛ lɛp kɛ ɣöö de̱rɛ muulɛ moc mi̱eth, kä ɛn wa̱nɔ cuɛ yio̱o̱kɛ jek thok cuaalä.

²⁸ Ɛ ni̱n cɛ kɛ nɛn, cuɛ dämani jiök i̱, “Ca yio̱o̱kä luɔ̱c ɣä! Kɛn ti̱n, tekɛ thok cuaalädä.” Kä mëë cikɛ kɛ nɛn, cukɛ ŋɛ̈ɛ̈r, kä cuɛ kɛ kuer lath dualä mi di̱i̱t. Kä cukɛ rɔ̱ thiëc ɛ kɛn i̱, “Ɛŋu ɛ nɛ ci Kuoth ɛ lät kä kɔn ɛ?”

²⁹ Kä inɔ, mëë cikɛ cop dhɔɔriɛn rɛy rööl Kɛ-naan, cukɛ gua̱ndiɛn ni Je-kɔb la̱t ŋɔak diaal tëë ci tuɔɔk, larkɛ jɛ i̱,

³⁰ “Ɛn wut indaan, min la kuäär rööl ɛmi, cɛ ruac kɛ kɔ ɛ jiäk, kä cɛ kɔ gɔany i̱ kɛ kɔn lieem kɛ kui̱ röölɛ.

³¹ Cakɔ jɛ kulɛ jiök i̱, ‘/Ci ɛ kɔn lieem, kɛ kɔn nɛy ti ji̱ thuɔ̱ɔ̱kni.’

³² Cakɔ jɛ lɛni jiök bä, ‘Ɛ kɔn gaat wutdä kɛl kä gua̱a̱ra, kä lapkɔ gaat da̱ŋ wäl wi̱cda rɛw. Kɛl cɛ thil, kä gat in tɔt jɛn a cieŋ kɛɛl kɛ gua̱a̱ra ro̱o̱l in cɔal i̱ Kɛ-naan.’

³³ Ɛnɔ cu wut ɛmɔ min la kuäär rööl kɔ jiök i̱, ‘Bä thuɔ̱k lɔaacdun ŋa̱c inɛ. Yɛn bi ram kɛl kä yɛ duɔth kɛ ɣä kɛɛl, kä bia ji̱ cieeŋnikun kök bɛl ti bia wä luäk ni buɔthdiɛn, inɔ bia cu jiɛɛn.

³⁴ Kä inɔ bia dämuɔɔrun in tɔt cu wä nöŋ ɣä. Kɛ no̱o̱ŋdɛ bä cu ŋa̱c ɛn ɣöö /ciɛ yɛn lieem, kä kɛ yɛn ji̱ thuɔ̱ɔ̱kni, kä bä dämuɔɔrun cu luɔ̱c yɛ, kä bia cu la kökɛ ɛn ro̱o̱l ɛ.’ ”

³⁵ Mëë cikɛ thuɔ̱k kɛ ruac kɛ gua̱ndiɛn cukɛ cu wee ka̱mkɛ bɛl raar rɛy cuali, nɛ̈nɛ jɛ, cu ramɔ kä kɛ kith yio̱o̱nikɛ jek tëë thok cual bɛɛlkɛ. Kä mëë cikɛ yio̱w nɛn kɛn diaal a amäni gua̱ndiɛn cukɛ ŋɛ̈ɛ̈r.

³⁶ Cu gua̱ndiɛn ni Je-kɔb kɛ jiök i̱, “Yɛn cia ɣä jak kä rɛɛt gan. Cä thil Jo-thɛp mi ŋot kä ɣä, kä thilɛ Cim-on mi ŋot kä ɣä. Kä nɛ̈nɛ jɛ, täämɛ go̱rɛ mi bia Ben-ya-min naŋ bä. Kɛn ti̱ti̱ diaal dhiɛlkɛ ɣä ni piny.”

³⁷ Kɛ kui̱ ɛmɔ cu Rɛ-u-ben ɛ jiök i̱, “Ŋäth ɣä ɛn ɣöö bä Ben-ya-min tit kä bä jɛ nööŋ jɔk. Kä mi /ka̱n jɛ nyɔk kɛ no̱o̱ŋ, ji̱n bi gaatkä da̱ŋ rɛw näk.”

³⁸ Cuɛ jiök ni jɛ i̱, “Gatdä /cɛ bi wä kɛɛl kɛ yɛ, kɛ ɣöö gatman cɛ li̱w kä ci duɔth ni jɛn kärɔaadɛ. Ɛ ɣän wut mi dɔaaŋ, kä mi wee wä tekɛ mi jek jɛ rɛy ja̱lun, dërɛ ɣä moc jiath lɔaac mi dëë ɣä dhiɛl ni piny.”