Tuk Cäkä Ɣɔaa 40 - RUAC KUƆTH IN RƐL RƆ

Lat Jo-thɛp kɛ la̱a̱k ji̱ la̱t Pɛro

¹ Kä jɛn kuäär wec in di̱i̱t kä I-jëp tëë kɛ kua̱r la̱a̱tnikɛ da̱ŋ rɛw, kɛl ɛ gua̱n kɔŋädɛ kä min dɔ̱ŋ ɛ kuäär tha̱a̱tni. Kɛ gua̱a̱th mi tɔt, kɛ kɔr kä tɔ̱tɔ̱ cu wutni da̱ŋ rɛw ti̱ti̱ duer nhiam kua̱riɛn.

² Kä mëë cikɛ duer, cu kuäär lɔcdɛ jiääk kɛ kɛ,

³ kä cuɛ kɛ la̱th luaak yi̱eenä min guic kuäär lathkëëri jɛ, niɛ jɛn luak ëë ca Jo-thɛp yiɛn thi̱n.

⁴ Cukɛ te yi̱eenä kɛ gua̱a̱th mi bäär. Kä cu kuäär lathkëëri Jo-thɛp jak kä guic kɛ.

⁵ Kɛ cäŋ kɛl, cu gua̱n kɔŋä kɛnɛ jɛn kuäär tha̱a̱tni kuan, la̱a̱k läkikä kɛɛl kɛ wäär, te ramɔ la̱kdɛ kɛ luɔtdɛ mi göl.

⁶ Mëë ci Jo-thɛp ben kä kɛ kɛ runwaŋ, cuɛ jɛ nɛn ɛn ɣöö tëë kɛ mi ci ca̱riɛn nyon.

⁷ Kä cu Jo-thɛp kɛ thi̱ec i̱, “Ɛ mal jɔk, ɛŋu mi ci tuɔɔk ɛn walɛ?”

⁸ Cukɛ jɛ jiök i̱, “Kɔn tëë kɛ la̱a̱k ti cakɔ läkikä, ku duundɛ la ɣöö thilɛ ram mi lät kɔ luɔ̱ɔ̱tnikiɛn.” Cu Jo-thɛp kɛ jiök i̱, “Ɛpuc, luɔt la̱a̱kni ɛ duŋ Kuɔth. Kua kɛ la̱t ɣä.”

⁹ Ɛ jɛ nɔ, cu gua̱n kɔŋä la̱kdɛ cu la̱t Jo-thɛp wëë i̱, “Thiaaŋ ɣän cä la̱k läkikä a tëë kɛ jiath mi te nhiamdä.

¹⁰ Kä ɛ niɛ ni̱n ci jiath ɛmɔ do̱ny, cu kar diɔ̱k ciɛk puɔ̱ɔ̱nydɛ kä cu gaaknikɛ jɔɔc a cuɛ kuer kɛ dɛy.

¹¹ Kä liɛɛr kɔŋä Pɛro tëë tetädä. Ɛ jɛ nɔ, cua dɛy jiaath cu nyɔap rɛy lirä, kä cua jɛ cu ka̱m Pɛro.”

¹² Mëë cɛ jɛ thuk kɛ lat cu Jo-thɛp ɛ jiök i̱, “La̱kdu lotdɛ ni ɣöö kɛn kar diɔ̱k kɛ ni̱n diɔ̱k,

¹³ kɛ ɣöö kɛ kɔr ni̱ni da̱ŋ diɔ̱k bi Pɛro ji̱ lony, kä bɛ ji̱ luɔc läätädu, kä bi liɛɛr wä kuëŋ tetdä Pɛro ce̱tnikɛ la̱tdu min wen.

¹⁴ Kä a ji̱ liɛpä, mi wa ji̱ wä lony kɛ mal, ku ɣä mal ni ti̱em kuäär ni Pɛro dɔŋ bɛ ɣä ben ka̱m raar ɛn guäth ɛ,

¹⁵ kɛ ɣöö kuëëlkɛ ɣä ni ro̱o̱l Ɣi-bɛ-ru, kä thilɛ mi cä ben dui̱rä ɛn wanɛ a dëë ɣä kulɛ ben la̱th luaak yi̱eenä ɛmɛ.”

¹⁶ Mëë ci kuäär tha̱a̱tni jɛ nɛn ɛn ɣöö ci Jo-thɛp luɔt la̱kä wutdä indaan lat, cuɛ Jo-thɛp jiök i̱, “Ɣän ta̱a̱ kɛ la̱k bä. Thiaaŋ cä la̱k läkikä a te wi̱cdä kɛ pa̱a̱t da̱ŋ diɔ̱k.

¹⁷ Rɛy pätdä min te nhial mi̱th Pɛro diaal tin ca thal tekɛ thi̱n, kä duundɛ ɣöö cu diit kɛ ben luath wi̱i̱dä rɛy pätdä.”

¹⁸ Cu Jo-thɛp ɛ lɛni jiök i̱, “Mɛmɛ ɛ jɛn luɔtdɛ. Kɛn pa̱a̱t da̱ŋ diɔ̱k kɛ ni̱n da̱ŋ diɔ̱k.

¹⁹ Kɛ kɔr ni̱ni da̱ŋ diɔ̱k bi Pɛro ji̱ näk kä bɛ puɔ̱nydu ŋap wi̱i̱ jiaath, kä bi diit ri̱ŋdu ben luath.”

²⁰ Kä cua jɛn ɛ thuɔ̱k. Kɛ jɛn cäŋ in diɔ̱ɔ̱kdiɛn in la cäŋ ti̱mä däpä Pɛro, cuɛ mi̱eth mi di̱i̱t rialikä kɛ kui̱ ji̱ läätädɛ diaal. Kä cuɛ gua̱n kɔŋädɛ kɛnɛ thäätdɛ nööŋ raar luaak yi̱eenä nhiam ji̱ läätädɛ diaal.

²¹ Cuɛ gua̱n kɔŋädɛ luɔc lät kɛ ɣöö bɛ liɛɛr kɔŋä lɛni kuëŋ tetädɛ,

²² kä cuɛ kuäär tha̱a̱tnikɛ ŋap ce̱tnikɛ mëë ci Jo-thɛp ɛ la̱t kɛ.

²³ Kä jɛn gua̱n kɔŋä kua̱r ɛmɔ /ke̱nɛ ruac Jo-thɛp ëëdan la̱t ce̱tnikɛ jɛ. Cuɛ Jo-thɛp pa̱l ruëëc.