Tuk Cäkä Ɣɔaa 39 - RUAC KUƆTH IN RƐL RƆ

Jo-thɛp kɛnɛ ciek Pɔ-ti-par

¹ Ɛn guäth ɛmɔ mëë ca Jo-thɛp cu naŋ ro̱o̱l I-jëp, cua jɛ kɔk te̱tni ji̱ I-ca-mel ɛ wut min cɔal i̱ Pɔ-ti-par. Ɛn wut ɛmɔ ɛ kuäär lathkëëri tin yiënkɛ ciëŋ kua̱r rööl I-jëp ni Pɛro.

² Kä te Kuoth Nhial kɛɛl kɛ Jo-thɛp, kä luäkɛ jɛ rɛy lätnikɛ diaal. Jo-thɛp ciɛŋɛ ni ciëŋ wutdä rööl I-jëp min mɔ kuäärɛ.

³ Kä mëë ci wut ɛmɔ jɛ nɛn ɛn ɣöö Kuoth Nhial tëë kɛɛl kɛ Jo-thɛp kä luäkɛ jɛ rɛy lätnikɛ,

⁴ cu lɔcdɛ tɛɛth kɛ Jo-thɛp kä cuɛ jɛ jak kä ram min lät jɛ kä nyinkɛ, kä cuɛ jɛ jak kä ram in guic cieeŋdɛ kɛɛliw. Ɛ jɛ nɔ, jɛn cuɛ Jo-thɛp jak kä kuäär kuaknikɛ diaal.

⁵ Kä ɛn guäth ɔ cu Kuoth Nhial ciek wutdä rööl I-jëp poth kɛ kui̱ Jo-thɛp. Puɔ̱th Kuɔth Nhial cuɛ te rɛy kuakni diaal tin tɔ̱ nyin Pɔ-ti-par, tin diaal tin te cieŋ amäni tin te rɛy ka̱a̱kni.

⁶ Ɛ jɛ nɔ cu Pɔ-ti-par ti diaal cu la̱th tetdä Jo-thɛp kä cuɛ thil mi diɛɛr kɛ jɛ, ɛni mi̱ethdɛ min caam ɛ. Kä täämɛ Jo-thɛp ci Kuoth ɛ täth agɔaa kä tëë kɛ nhiam mi duŋ gɔaa.

⁷ Kä mëë ci ciek kua̱r Jo-thɛp nɛn ɛn ɣöö Jo-thɛp ɛ wut mi cɛ cak agɔaa, cuɛ jɛ bɛc kä cuɛ jɛ jiök i̱, “Bër tɔa̱a̱cni kɛ ɣä.”

⁸ Kä Jo-thɛp cuɛ jɛ lo̱k, kä cuɛ jɛ jiök i̱, “Guicɛ, kuäärä thilɛ mi diɛɛr kɛ jɛ kä tin diaal tin te rɛy ciëŋ ɛmɛ, cɛ ti diaal la̱th te̱tädä.

⁹ Thilɛ ram mi di̱tni jɛn kä ɣä ɛn cieŋ ɛmɛ, kä thilɛ mi cɛ pa̱l jɔ̱ɔ̱r ɛ ni ji̱n puɔ̱nydu kärɔa kɛ ɣöö ɛ ji̱n ciekdɛ. Kä kuɛ la ŋu mi dëë mi jiääk ɛmɛ la̱t ɔ, kä ɛ duer nhiam Kuɔth?”

¹⁰ Kä cäŋɛ mëë la ruac ciek ɛmɔ kɛ jɛ ni ciaŋ, /ke̱nɛ jɛ met nhɔk ɛn ɣöö bɛ tɔ̱ɔ̱c kɛ jɛ kiɛ bɛ thia̱k kɛ jɛ.

¹¹ Kä kɛ cäŋ kɛl mëë cɛ ben kɛ ɣöö bɛ lätkɛ ben la̱t, kä thilɛ läät dɔ̱diɛn mi te thi̱n,

¹² cu ciek ɛ käp ni biey kä jio̱kɛ jɛ i̱, “Bër tɔa̱a̱cnɛ kɛɛl.” Kä jɛn Jo-thɛp cuɛ rɔ bar raar rɛy duëël a cuɛ bi̱i̱dɛ ba̱ny ciek.

¹³ Mëë ci ciekdɛ ɛ nɛn ɛn ɣöö cɛ rɔ bar cɛ bi̱i̱dɛ ba̱ny jɛ,

¹⁴ cuɛ la̱a̱t ciëŋ cɔl kä cuɛ kɛ jiök i̱, “Nɛ̈nɛ raan Ɣi-bɛ-ru ëë nööŋkɛ cieŋ ɛ gua̱n cieeŋdä, täämɛ jɛn cɛ kɔn nöŋ buar, jɛn cɛ cunh due̱e̱l a cɛ ɣä ben mak kölikä, kä mëë cä ku lɛ wak kɛ jɔw mi di̱i̱t,

¹⁵ jɛn cuɛ bi̱i̱dɛ ba̱ny piny kä cuɛ rɔ bar rɛy duëël.”

¹⁶ Cuɛ bi̱i̱ Jo-thɛp tɛ̱̈ɛ̱̈ amäni mëë ci kuäärɛ ben cieŋ.

¹⁷ Mëë cɛ ben cuɛ jɛ jiök i̱, “Jɛn kuany Ɣi-bɛ-rukädu mi ci nöŋ naath ɛ, jɛn cɛ ben duëël kä ɣä kɛ ɣöö bɛ ɣä kuëth.

¹⁸ Kä mëë cä kulɛ wak kɛ jɔw mi di̱i̱t, jɛn cuɛ bi̱i̱dɛ ba̱ny ɣä kä cuɛ rɔ bar rɛy duëël.”

¹⁹ Mëë ci kuäär ruac ciëkdɛ liŋ wëë i̱, “Mɛmɛ ɛ min ci ja̱ŋdu ɛ lät kä ɣä,” cuɛ lɔcdɛ waŋ ɛlɔ̱ŋ.

²⁰ Cuɛ jɛ jak kä ba jɛ wä la̱th luaak yi̱eenä, guäth in la kuäär wec nɛɛkɛ a yiɛɛn thi̱n. Ɛ jɛn cuɛ cu te luaak yi̱eenä ɛn thɔ̱ŋi i̱.

²¹ Kä te Kuoth Nhial kɛɛl kɛ Jo-thɛp, cuɛ jɛ poth kä cuɛ kuäär ji̱ yi̱eenä lɔcdɛ jak kä kɔ̱c kɛ jɛ.

²² Täämɛ cu kuäär yi̱eenä yiëën diaal kɛ lätkiɛn la̱th tetdä Jo-thɛp.

²³ Jɛn /ke̱nɛ lɛ diɛɛr kɛ tin diaal tin ci Jo-thɛp kɛ la̱t kɛ ɣöö te Kuoth Nhial kɛɛl kɛ Jo-thɛp kä luäkɛ jɛ rɛy lätnikɛ diaal.