Tuk Cäkä Ɣɔaa 34 - RUAC KUƆTH IN RƐL RƆ

Buɔ̱ŋ Dina kɛ buɔ̱m

¹ Kɛ cäŋ kɛl ci nya Je-kɔb nya ciekdɛ ni Leya mi cɔal i̱ Dina kac raar kɛ ɣöö bɛ wä muɔŋä kä män wec.

² Kä mëë ci Cɛ-kɛm min la gat Ɣä-mor raan Iwi min la kuäär wec jɛ nɛn, cuɛ jɛ käp kä cuɛ jɛ ka̱n kɛ buɔ̱m.

³ Kä nɛ̈nɛ jɛ, min ci Dina tɛth lɔɔcdɛ kɛ ɣöö cɛ jɛ go̱r ɛn ɣöö de̱rɛ la ciekdɛ, cuɛ ruac kɛ jɛ ni kɔ̱c kɛ ɣöö bɛ lɔcdɛ jak kä tɛth.

⁴ Kä ni ɛn wa̱nɔ cuɛ gua̱n ni Ɣä-mor jiök i̱, “Ɣän göörä kuën nya mi.”

⁵ Kä mëë ci Je-kɔb ɛ liŋ ɛn ɣöö ca nyaadɛ ni Dina ŋar ŋar, cuɛ lɔcdɛ ka̱p piny kɛ ɣöö ci gaatkɛ wä yi̱en ɣɔ̱ɔ̱k kä cuɛ thokdɛ dɛ̈ŋ thi̱n amäni lunydiɛn jɔk.

⁶ Ɛ jɛn cu gua̱n Cɛ-kɛm ni Ɣä-mor jiɛɛn kä cuɛ ben kä Je-kɔb kɛ ɣöö bikɛ nɔmɔ ben ca̱a̱t kɛɛl.

⁷ Kä min ci gaat Je-kɔb luny jɔk kɔɔr ɣɔ̱ɔ̱k, cukɛ thuk tɔ̱tɔ̱ liŋ, kä cuɛ lo̱ckiɛn waŋ a bɛ kɛ kɔ̱p kɛ ŋɛ̈ɛ̈ny kɛ ɣöö Cɛ-kɛm cɛ ji̱ I-thɛ-rɛl dhɔ̱l kɛ känidɛ kɛ nya Je-kɔb, dhɔa̱a̱l mi /ca dëë liɛŋ piny.

⁸ Duundɛ ɣöö cu Ɣä-mor ruac kɛ kɛ i̱, “Ɛpuc, gatdä ni Cɛ-kɛm nhɔkɛ nyaadun. A jɛ kuɛɛ kuɛn.

⁹ Kä banɛ cu tekɛ kuën kamnikɔn. A kɔ kuɛnkɛ nyieekun, kä bia nyieekɔ kuɛ̈n.

¹⁰ Inɔ, yɛn dërɛ cu cieŋ kɛ kɔ kɛɛl kä bi wecda cua wecdun. Ciëŋɛ kä ja̱lɛ thi̱n kɛ pe̱k lɔaacdun, kä tëmɛ rɔ̱ mun thi̱n.”

¹¹ Kä Cɛ-kɛm cuɛ gua̱n kɛnɛ dämani Dina ku jiök i̱, “Pa̱lɛ ɣä min cä la̱t, kä bä tin diaal tin bia thi̱ec ka̱m yɛ.

¹² Jakɛ pe̱k kuen kä wä nhial ce̱tnikɛ min go̱rɛ, kä bä kɛ ŋun. Duundɛ ɣöö bia nyal ka̱m ɣä.”

¹³ Kä nɛ̈nɛ jɛ, cu gaat Je-kɔb Cɛ-kɛm kɛnɛ gua̱n ni Ɣä-mor pɛl, kɛ ɣöö cɛ nyimandiɛn ya̱r.

¹⁴ Kä cukɛ kɛ jiök i̱, “/Cakɔ nɔmɔ dëë cäp ɛn ɣöö dëëkɔ nyimaara ka̱m wut mi /ka̱n cuɛl, kɛ ɣöö nɔmɔ ɛ buar kä kɔ.

¹⁵ Bakɔ jɛ ka̱m yɛ kɛ luɔt kɛl, ɛ ɣöö yɛn bia la kɛl kɛ kɔ kɛ cuël tutni diaal rɛydun.

¹⁶ Ɛ jɛn bakɔ nyieekɔ cu ka̱m yɛ kɛ kuën, kä bakɔ nyieekun cu kuɛ̈n. Bakɔ cu cieŋ kɛ yɛ kɛɛl kä bakɔ cua do̱r kɛl kɛ yɛ.

¹⁷ Kuɛ la ɣöö, mi /cia cuël bi nhɔk, bakɔ nyaada naŋ kä bakɔ cu wä.”

¹⁸ Cu Ɣä-mor kɛnɛ gatdɛ ni Cɛ-kɛm ruacdiɛn nhɔk.

¹⁹ Kä cu ŋuɛ̈t ɛ wä la̱t ni kä kɛɛl, kɛ ɣöö cɛ nya Je-kɔb nhɔk ɛlɔ̱ŋ, kä ɛ jɛn ram kɛl in luɔ̱thkɛ ni jɛ ɛlɔ̱ŋ thok duëël gua̱n.

²⁰ Cu nɔmɔ tuɔɔk, mëë ci Ɣä-mor kɛnɛ gatdɛ ni Cɛ-kɛm cop thok wec in la duɔl nɛɛkiɛn thi̱n, cukɛ ruac kɛ ji̱ wec wä kɛ i̱,

²¹ “Kɛn nɛy ti̱ti̱ kɛ ji̱ maarä kɛ kɔn, kɛ kui̱ ɛmɔ akɛ cieŋ muundan kä akɛ jäl thi̱n, kɛ ɣöö tëë kɛ gua̱a̱th rɛy wec ɛ kɛ kui̱diɛn. Kuɛ̈nɛ nyieekiɛn kä akɛ kuɛ̈nkɛ nyieekɔn.

²² Kä cukɛ kɛ jiök bä ɛn ɣöö ci nɛy tɔ̱tɔ̱ jɛ lar i̱ bikɛ cieŋ kɛ kɔn kɛɛl kä bikɛ la do̱r kɛl kɛ kɔn kɛ luɔt kɛl kärɔa, ɛ ɣöö tut diaal rɛydan ba kɛ cuɛ̈l ce̱tkɛ min tekɛ kɛ.

²³ Ɛ jɛn bi kuakiɛn kɛnɛ ɣɔ̱ɔ̱kiɛn cu la nyinkɔn. Inɔ, kuanɛ min ca go̱r ɛ kɛn la̱t kɛ ɣöö de̱e̱kɛ cu cieŋ kɛ kɔn kɛɛl.”

²⁴ Cu wutni diaal tëë ca rɔ̱ dol ɛn thok wec ruac Ɣä-mor kɛnɛ gatdɛ ni Cɛ-kɛm nhɔk, kä cuakɛ cuɛ̈l.

²⁵ Kɛ kɔr ni̱ni da̱ŋ diɔ̱k guäth ëë ŋot buɔ̱ɔ̱tkiɛn kɛ bɛc, cu gaat Je-kɔb da̱ŋ rɛw Cim-on kɛnɛ Lii-bay tin la gaat man Dina pa̱ny ben jäl ramɔ kɛ thɛpdɛ, kä cukɛ coth rɛy wec a thil mi gaŋkɛ, kä cukɛ wutnikɛ diaal näk,

²⁶ amäni Ɣä-mor kɛnɛ gatdɛ ni Cɛ-kɛm. Kä cukɛ Dina nööŋ raar due̱e̱l Cɛ-kɛm kä cukɛ wä.

²⁷ Täämɛ cu duɔth gan Je-kɔb tin kɔ̱ŋ ben bä, kä cukɛ kɛ ben nyɔk kɛ gi̱t, kä cukɛ dhɔr rɛydɛ thol, kɛ ɣöö ca nyimandiɛn ŋar ŋar.

²⁸ Cukɛ detkiɛn naŋ kɛ ɣɔ̱ɔ̱kiɛn kɛ muɔ̱likiɛn, ŋɔak diaal tëë te rɛy wec amäni tëë te dɔɔr.

²⁹ Cukɛ kuakiɛn diaal pɛc kɛnɛ gaatkiɛn kɛ mänkiɛn, cu mäni tin diaal tin te rɛy ti̱ecni cukɛ kɛ thol.

³⁰ Ɛn wa̱nɔ cu Je-kɔb Cim-on kɛnɛ Lii-bay ku jiök i̱, “Yɛn cia ɣä jak kä ram mi ba nyir ɛ ji̱ Kɛ-naan kɛnɛ ji̱ Pɛ-rii-dhi tin ciaŋkɛ ro̱l ɛmɛ, kä cia kɛ̈kdä ya̱r rɛydiɛn. Mi wäkɛ rɔ̱ mat, bikɛ ɣä mak piny, kä bä cu li̱w kɛɛl kɔnɛ thok duëëlä, kɛ ɣöö kuiy nɛɛkä.”

³¹ Kä cukɛ kac nhial kɛ jɛ i̱, “A dëëkɔ nyimaara ku jak kä cieŋɛ ce̱tkɛ ram mi riär?”