Tuk Cäkä Ɣɔaa 31 - RUAC KUƆTH IN RƐL RƆ

Bar Je-kɔb kɛ rɔ kä La-ban

¹ Täämɛ cu Je-kɔb cu liɛŋ kɛ tin lat gaat La-ban kɛ ɛ lar kɛn ɛ i̱, “Ɛn Je-kɔb cɛ tin tɔ̱ nyin gua̱ndan ka̱n ni kɛn diaal, kä cɛ ria̱ŋdɛ nɔmɔ jek rɛy kuakni gua̱ndan pa̱ny.”

² Cu Je-kɔb ɛ tit bä ɛn ɣöö ciaŋ in ciɛŋ La-ban ɛ ni jɛ /cɛ ce̱tkɛ ciaŋ ëë kɔŋ tekɛ jɛ kɛ nhiam.

³ Ɛ jɛn, cu Kuoth Nhial Je-kɔb ku jiök i̱, “Wër, locni ro̱o̱l guurdɔɔŋni kɛnɛ watku, kä ɣän bä te kɛɛl kɛ ji̱.”

⁴ Ni ɛn wa̱nɔ, cu Je-kɔb Re-cɛl kɛnɛ Leya cɔl kɛ ɣöö bikɛ ben röm ni gua̱a̱th yiëën de̱e̱t in la te de̱tkɛ thi̱n.

⁵ Mëë cikɛ ben, cuɛ kɛ jiök i̱, “Ɣän cä jɛ tit ɛn ɣöö guurun /cɛ ɣä ciɛŋ kɛ ciaŋ ëë la ciɛŋɛ ni ɣä ni wänkä.

⁶ Yɛn da̱ŋ rɛw ŋa̱cɛ jɛ ɛn ɣöö ɣän cä guurun lätikä nikɛ buɔ̱mdä kɛɛliw,

⁷ kä cuɛ ŋot nikɛ mi mɛɛtdɛ ɣä, kä cɛ kökdä nyɔk ni kä wäl. Duundɛ ɣöö /ken Kuoth ɛ jak kä mi bɛ ɣä lät kä mi jiääk.

⁸ Ɛn guäth ɔ cɛ wee i̱, ‘Bi kökdä a dët tin cuɔri,’ di̱eth det diaal ni dɛy ti cuɔri, kä kɛ gua̱a̱th in cɛ wee i̱, ‘Bi kökdä a dët tin kuac,’ ɛn wa̱nɔ di̱eth det diaal ni dɛy ti kuac.

⁹ Kɛ kui̱ ɛmɔ ci Kuoth nyin guurun woc kä cɛ kɛ ka̱m ɣä.

¹⁰ Kɛ cäŋ kɛl kɛ gua̱a̱th in la buɔ̱p det rɔ̱ thi̱n, ɣän cä la̱k läkikä, kä cua tut de̱e̱t tin buɔ̱pkɛ det nɛn tekɛ kɛ ti cua̱ny kɛnɛ cuɔri kɛ ti kuac.

¹¹ Niɛ rɛy läkä cu jääk Kuɔth ɣä cɔl i̱, ‘Je-kɔb’, kä cua jɛ loc i̱, ‘Ɣän ɛn.’

¹² Cuɛ ɣä cu jiök i̱, ‘Guic ɛ, nɛɛni jɛ täämɛ ɛn ɣöö kɛn tut de̱e̱t tin buɔ̱pkɛ det kɛ ti cua̱ny kɛnɛ ti cuɔri kɛ ti kuac, kɛ ɣöö ɣän nɛ̈ɛ̈nä mɔ lät La-ban ɛ kä ji̱ mɔ.

¹³ Ɛ ɣän Kuoth ëë nyuth rɔ ji̱ kä Beth-ɛl guäth ëë ci päm yi̱r thi̱n kɛ liɛɛth kä ci rɔ yac nhiamdä. Jiɛcni ɛn täämɛ kä woc rɔ ɛn ro̱o̱l ɛ, kä locni ro̱o̱lu.’ ”

¹⁴ Mëë cikɛ ruacdɛ ku liŋ, cu Re-cɛl kɛnɛ Leya wee i̱, “Lɛ̈ɛ̈kɔ lɛ ŋot kɛ kui̱ mi bakɔ nyɔk kɛ jek rɛy nyinä gua̱a̱ra?

¹⁵ Kɔn pua̱nykɔ ciɛŋ gua̱a̱ra kɔ ce̱tkɛ män rööl go̱lä. Cɛ kɔ kɔak kä cɛ pe̱k yio̱o̱ni tëë jekɛ kɛ pua̱nykɔ tɛŋ.

¹⁶ Jɛn ria̱ŋ ɛ di̱i̱t ɛmɛ ci Kuoth ɛ tɛt kä gua̱a̱ra mi, ɛ duŋda kɔn kɛ gaatkɔ kɛɛl. Täämɛ liŋ ni min lär Kuoth ɛ ji̱.”

¹⁷ Ɛ jɛ nɔ, min ko̱o̱t Je-kɔb gaatkɛ kɛnɛ mänkɛ jio̱kni thɔ̱a̱rɔa̱a̱li,

¹⁸ kä ɣo̱o̱thɛ detkɛ kɛnɛ ŋɔakɛ diaal tëë cɛ jëk rɔ kä Pa-dan-a-ram, cuɛ jiɛɛn locɛ kä gua̱n ni Ay-dhɛk kä Kɛ-naan.

¹⁹ Kɛ jɛn gua̱a̱th ɛmɔ ci La-ban wä guäth ŋukni mi̱emni de̱e̱tkɛ, kä min ŋotdɛ tëë jɔ̱ɔ̱r, cu Re-cɛl kolaaŋ gua̱n diaal kual.

²⁰ Cu Je-kɔb wi̱c La-ban raan Ä-ram cu bath inɔ, kɛ ɣöö /ke̱nɛ jɛ la̱r jiɛɛndɛ.

²¹ Ɛ jɛ nɔ, cuɛ cu ɣöth kɛ kuakɛ diaal kɛɛl, cuɛ kir Yu-pɛ-ree-tidh jiɛth kä cuɛ wä ro̱o̱l päämni mi cɔal i̱ Gil-yad.

²² Kɛ kɔr ni̱ni da̱ŋ diɔ̱k cua La-ban ben la̱r ɣöö ci Je-kɔb rɔ kual.

²³ Kä cu La-ban ɛ guɔ̱ɔ̱r kɛɛl, kɛnɛ gaat man kɛ ni̱n da̱ŋ bärɔw amäni mëë cɛ cop ro̱o̱l päämni Gil-yad.

²⁴ Kä nɛ̈nɛ jɛ, kɛ jɛn wäär ɛmɔ cu Kuoth ben kä La-ban kɛ la̱k, kä cuɛ jɛ gok jio̱kɛ jɛ i̱, “Nik ni jɛ ɛn ɣöö thilɛ mi bi lat kɛ Je-kɔb.”

²⁵ Mëë ci La-ban ɛ ku cop, cuɛ Je-kɔb ben jek cɛ wecdɛ pua̱t wi̱i̱ pa̱a̱m ɛmɔ, kä cu La-ban kɛnɛ dämani pua̱t bä kui̱diɛn.

²⁶ Mëë cikɛ pua̱t, cuɛ cu ben kä Je-kɔb kä cuɛ jɛ thi̱ec i̱, “Ɛŋu lätdi nɛmɛ ɔ, ɛŋu mɛtdi ɣä mɔ a bi nyieekä cu naŋ ce̱tkɛ pɛ̈ɛ̈c ko̱o̱r?

²⁷ Ɛŋu mɛɛtdi ɣä mɔ a curi jiɛɛn kɛ tɛ̱̈ɛ̱̈ a /ke̱ni ɣä la̱r lär? Ɣän dëë ji̱ nam kɛ tɛth lɔac mi di̱i̱t mi dëë pua̱t bul.

²⁸ Ɛŋu /ke̱ni ɣä jak kä la̱tdä gaat nyiëëtkä kɛnɛ nyieekä kä maalɛ mɔ? Ji̱n ci nyiëth ɛlɔ̱ŋ.

²⁹ Ɣän ta̱a̱ kɛ lua̱ŋ mi dëë lät ni yɛ kä mi jiääk, duundɛ ɣöö thiaaŋ kɛ wäär ci Kuoth guur ɣä gok ɛn ɣöö thilɛ mi bä lät kä ji̱.

³⁰ Ji̱n kuali rɔ kɛ ɣöö ci lɔcdu di̱t kɛ dhɔrun, kä ji̱n, ɛŋu mɔ kuali kolaaŋ dhɔaarä mɔ?”

³¹ Cu Je-kɔb ɛ loc i̱, “Ɣän cä dual, ŋa̱cä ni ɣöö bi nyieeku tɛt kä ɣä kɛ buɔ̱m.

³² Kä kɛ kui̱ kolaaŋniku, a ram in ba kɛ jek kä jɛ li̱w. Täämɛ, nyoth duŋdu mɔ te rɛy kuaknikä mɔ nhiam ji̱ maaräda diaal, kä käni jɛ.” Kä Je-kɔb, /cɛ jɛ ŋäc ɛn ɣöö ci Re-cɛl kɛ kual.

³³ Ɛ jɛ nɔ, cu La-ban ku wä rɛy kɛmɛ Je-kɔb kɛ Leya kɛnɛ kuaany mään da̱ŋ rɛw, kä thilɛ mi cuɛ jek. Kä min känyɛ raar rɛy kɛmɛkä Leya, cuɛ coth kä duŋ Re-cɛl.

³⁴ Ɛn guäth ɛmɔ jɛn Re-cɛl cɛ kolaaŋ tɔ̱tɔ̱ ka̱n kä cɛ kɛ cuɔt rɛy tho̱cä nyuurä jɔak thɔ̱a̱rɔa̱a̱lɛ, kä tëë nyuurä wi̱i̱diɛn. Cu La-ban rɛy kɛmɛkä go̱r ni kɛɛliw kä /ke̱nɛ kɛ jek.

³⁵ Ɛn wa̱nɛ mɔ cu Re-cɛl gua̱n jiök i̱, “A lɔcdu /ci jiäk kɛ ɣä, kuäärä, /cä rɔ bi luäŋ kɛ cuɔ̱ŋ nhiamdu kɛ ɣöö ta̱a̱ kɛ buɔth mään.” Cu La-ban go̱r ɛlɔ̱ŋ kä /ke̱nɛ jɔɔk tɔ̱tɔ̱ jek.

³⁶ Ni ɛn wa̱nɔ, cu Je-kɔb kɛ̈c kä cuɛ kac nhial kɛ La-ban i̱, “Ɛŋu mi cä ya̱r? Min cä dui̱rä ɛŋu ɛn nɔ ci ɣä cuɔp lɛɛr ni jiäk ɔ?

³⁷ Ji̱n ci kuakä diaal rɛydiɛn go̱r. Mi tëë kɛ duŋdu mi ci jek, läthni jɛ piny wanɛ mɛ nhiam nɛɛnikä kɛnɛ nɛɛku kä akɛ latkɛ kamdan.

³⁸ Täämɛ ɣän cä te kɛɛl kɛ ji̱ kɛ run ti jiɛn da̱ŋ rɛw. Kɛn runi tɔ̱tɔ̱ thilɛ dɛl kɛl rɛy deetku mi ci me̱t thɔ̱ɔ̱r, kä /ka̱n ri̱ŋ tha̱a̱k dɛ̈ɛ̈lu me̱t la̱th thok.

³⁹ Kä kɛ kui̱ de̱e̱t tin ci le̱y kɛ cam, ɣän /ka̱n ji̱ me̱t nöŋ ri̱ŋkiɛn, la piɛkä ni gua̱thkiɛn. Mi tëë kɛ dɛl mi ca kual kɛ cäŋdäär kiɛ wäärdäär la läthi jɛ ni wi̱i̱dä.

⁴⁰ La tho̱ŋ cäŋ ɣä kɛ cäŋdäär kä näk kɔ̱k ɣä kɛ wäär, kä kui̱c waŋdä ni̱en,

⁴¹ kɛn run tɔ̱tɔ̱ tëë ruɔ̱ɔ̱nä kɛ ji̱ kɛɛl cieŋdu. Cä lät thi̱n kɛ run da̱ŋ wäl ŋuaan kɛ kui̱ nyiëëtku da̱ŋ rɛw, kä kɛ run bäkɛl cä lät kɛ kui̱ de̱e̱tku, kä ji̱n ci kök lätnikä nyɔk kɛ wa̱ny ni kä wäl.

⁴² Duŋ thil ni ɣöö ci Kuoth gua̱a̱r te kɛɛl kɛ ɣä, jɛn Kuoth A-bɛ-ram, Kuoth in luth Ay-dhɛk ni jɛ, ɛn täämɛ guɛcä jɛ de̱ri ɣä jak kä wä ni lɔrä a thil mi kämi ɣä. Kä min te ni jɛn thi̱n, ci Kuoth cuɔ̱cdä nɛn kɛnɛ la̱t in bum in cä la̱t, kä cɛ ji̱ cu luek thiaaŋ.”

Mat Ruac kam Je-kɔb kɛnɛ La-ban

⁴³ Ɛn wa̱nɛ mɔ cu La-ban ɛ loc i̱, “Kɛn nyi̱er kɛ nyieekä, kä gaatkiɛn kɛ nyinkä, kɛn det kɛ nyinkä, kɛn ti nɛɛni ti ni kɛn diaal, kɛ nyinkä. Kä ɛn täämɛ ɣän bä nyieekä kɛnɛ gaat tin ca dap ɛ kɛn lɛɛl ni ŋu?

⁴⁴ Ji̱n, bër la̱thnɛ guk ruac piny kamädan, ɣän kɔnɛ ji̱, a jɛ tekɛ nëën kɛ mat ruacdan.”

⁴⁵ Ɛ jɛn, cu Je-kɔb lɛ̈l cu ka̱n kä cuɛ jɛ cuŋ ala päm ti̱mä.

⁴⁶ Kä cuɛ watkɛ jak kä duɔlkɛ pääm, ɛ jɛn cukɛ pääm cu di̱er piny guäth kɛl. Kä min cikɛ kɛ ku di̱r, cukɛ cu mi̱th gekä di̱rä ɛn wa̱nɔ.

⁴⁷ Cu La-ban gua̱a̱th ɛmɔ cɔl i̱ Yɛ-gar-thä-du-thɔ, kä cɔl Je-kɔb ɛ i̱ Ga-led.

⁴⁸ Ɛ jɛn, cu La-ban Je-kɔb cu jiök i̱, “Jɛn di̱r päämni ɛmɛ ba neen matdä ruacdan ɛn walɛ.” Ɛ jɛn kui̱ kä mëë cɔaalkɛ ni jɛ i̱ Ga-led.

⁴⁹ Cɔalkɛ jɛ bä i̱ Midh-pa kɛ ɣöö ɛ jɛn i̱, “A Kuoth Nhial guic kamdan guäth in /ci kɔn rɔ̱ nɛn.

⁵⁰ Mi wi̱i̱ nyieekä yak kiɛ mi wi̱i̱ män kɔ̱kiɛn wä kuɛ̈n wi̱i̱diɛn, cäŋ bɛ thil raan mi la ne̱e̱n thi̱n, ŋäcni jɛ ɛn ɣöö bi Kuoth a ne̱e̱n kamädan.

⁵¹ “Ɛn di̱r päämni ɛmɔ kɛnɛ jɛn päm ti̱mä ɛmɛ cä jɛ jak kä ke̱y kamädan kɔnɛ ji̱.

⁵² Ɛn di̱r päämni kɛnɛ päm ti̱mä bikɛ la pe̱k këth kam rölikɔn. Ɣän /cä di̱r päämni mɛmɛ bi bäl a bä ko̱r wä tɛr kɛ ji̱ kui̱dɛ, kä ji̱n bä, /ci päm ti̱mä mɛmɛ bi bäl a bi ɣä ben mak kɛ ko̱r kui̱dɛ.

⁵³ A Kuoth A-bɛ-ram min la Kuoth Na-ɣor luk kamdan.” Ɛ jɛn, cu Je-kɔb rɔ cu yac kɛ ciöt Kuɔth in luth gua̱n ni Ay-dhɛk jɛ.

⁵⁴ Kä cuɛ Kuoth na̱k duɔ̱ɔ̱r mi la muc ɛn wi̱i̱ pa̱a̱m ɛmɔ, kä cuɛ nɛɛkɛ diaal cɔal thi̱n, kä cukɛ mi̱th. Kä cukɛ cu niɛɛn ɛn wi̱i̱ pa̱a̱m.

⁵⁵ Mëë ruɔ̱n cu La-ban gaat nyiëëtkɛ ciɛm, amäni nyieekɛ bä cuɛ kɛ ciɛm, kä cuɛ kɛn diaal poth. Cuɛ kɛ jiök kua wä kɛ mal, kä cuɛ cu loc dhɔɔrɛ.