Tuk Cäkä Ɣɔaa 3 - RUAC KUƆTH IN RƐL RƆ

Kac nath dui̱rä

¹ Nɛ̈nɛ jɛ, thɔ̱l ɛ jɛn le̱y mi pɛl kɛ pɛl mi wän wän rɛy le̱e̱yni diaal tin ci Kuoth Nhial ni Kuoth kɛ cak. Cuɛ ciek thi̱ec i̱, “A ci Kuoth yɛ cu jiök i̱, ‘/Cia bi mi̱th rɛy jiɛn kakä diaal?’ ”

² Kä cu ciek ɛ loc i̱, “Dëëkɔ dɛy jiɛn kakä cam.

³ Kä ci Kuoth ɛ kulɛ lar ɛn ɣöö, /Cuarɛ mi̱th kɛ dɛy jiaath in te däär kakä, kä /cuarɛ jɛ cay guëër, mi wiaa jɛ cam bia li̱w.”

⁴ Kä nɛ̈nɛ jɛ, cuɛ ciek cu jiök i̱, “Kacɛ jɛ, /cia dëë li̱w,

⁵ kɛ ɣöö ŋäc Kuoth ɛ ɛn ɣöö mi wiaa jɛ wä cam, bi wuɔ̱thkun lɛ̈p kä bia cu pa̱a̱r kɛ Kuoth kɛ ŋäcdun kɛ gɔy kɛnɛ jiäk.”

⁶ Inɔ, mëë ci ciek jiath car ɛn ɣöö ɛ mi dëë rɔ lot kɛ mi̱eth, kɛnɛ ɣöö gɔaa nëndɛ, kä di̱t lɔcdɛ kɛ jɛ kɛ ɣöö ɛ mi dëë pɛlran jak kä ro̱ŋ, cuɛ rɔ puɔ̱t dɔw jiaath ɛmɔ kä cuɛ jɛ cam, kä cuɛ gua̱n cieŋdɛ moc bä.

⁷ Kä cu kɛn diaal wuɔ̱thkiɛn rɔ̱ lɛp, kä cukɛ ta̱a̱ juutädiɛn cu mir, kä cukɛ ji̱th jiaath ŋɔa̱a̱p tak ni bieyni, kä cukɛ rɔ̱ kuäth kɛ kɛ.

⁸ Kä mëë jäl Kuoth Nhial ni Kuoth rɛy kakä kɛ nyaŋ thiaŋ, cu wut kɛnɛ ciekdɛ ja̱lɛ liŋ, kä cukɛ rɔ̱ wä tɛ̱̈ɛ̱̈ rɛy kakä.

⁹ Cu Kuoth Nhial ni Kuoth wut cu cɔl i̱, “Ji̱n a ni kä?”

¹⁰ Cu wut jɛ loc i̱, “Cä ja̱lu liŋ rɛy kakä, kä cua̱ cu dual kɛ ɣöö thil ɣä kuum, cua rɔ cu tɛ̱̈ɛ̱̈.”

¹¹ Mëë ci Kuoth mɔmɔ liŋ, cuɛ wut cu thi̱ec i̱, “Ɛŋa mi lär jɛ ji̱ ɛn ɣöö thil ji̱ kuum? A ci ku mi̱th jiaath ëë cä ji̱ luek thi̱n?”

¹² Cu wut jɛ loc i̱, “Ɛn ciek ëë ci kam ɣä i̱ bakɔ te kɛɛl, cɛ ɣä ka̱m dɔw jiaath ɛmɔ, kä cua jɛ cu cam.”

¹³ Kä ɛn wa̱nɔ cu Kuoth Nhial ni Kuoth ciek thi̱ec i̱, “Ɛ le̱e̱y ŋu ɛnɛ ci lɛl ɛ!” Cu ciek ɛ loc i̱, “Ci thɔ̱l ɣä mɛ̈t mi̱thdɛ.”

Ŋuɔ̱k kuɔth kɛ lukdɛ

¹⁴ Cu Kuoth Nhial ni Kuoth thɔ̱l ku jiök i̱, “Ca ji̱ bit ɛlɔ̱ŋ rɛy ɣɔ̱ɔ̱k diaal kɛnɛ le̱y dɔaar diaal kɛ ɣöö ci mɛmɛ la̱t. Kɛ kui̱ ɛmɔ, bi ja̱l kɛ bapdu, kä bia̱ cami ni tur piɛny kɛ ni̱n te̱e̱kädu diaal.

¹⁵ Bä kamdun yɛnɛ ciek moc kɛ tɛr, amäni kam ganku kɛnɛ gaatkɛ. Ba wi̱cdu kuɛm ɛ kɛn, kä bi ŋul cio̱kdiɛn kac.”

¹⁶ Kä cuɛ ciek jiök i̱, “Ɣän bä lul lɔaacdu rep päthni ruëtädu. Kä bi dap kɛ dap mi bɛc bɛc mi ŋɛ̈p lɔcdu thi̱n, kä cäŋ tëë nɔ, bi lɔcdu ŋot nikɛ di̱t, kɛ go̱r cɔaadu, kä bɛ ji̱ ruac.”

¹⁷ Kä cuɛ A-dam jiök i̱, “Ba mun bit kɛ kui̱du, kɛ ɣöö ci ruac ciekdu liŋ. Kä ci jiath ëë cä ji̱ luek kɛ jɛ cam. Kɛ ni̱n te̱e̱kädu diaal bi mi̱th muun kɛ cuɔ̱c läätdä mi bum ɛ tet.

¹⁸ Kä wi̱c muɔ̱ɔ̱n bi do̱ny ni kuiy thi̱n kɛ kui̱du, kä nɛn ɛ, bi mi̱ethdu a juaac dɔaar.

¹⁹ Bi mi̱ethdu jek ɛ ni mi ci le̱th nhiamdu gi̱th, amäni mi wi̱i̱ wä loc muun, kɛ ɣöö bi̱i̱ raar thi̱n. Ɛ ji̱n tur piɛny, kä bi loc niɛ tuur.”

²⁰ Cu wut ciöt ciekdɛ cɔl i̱ Iib, kɛ ɣöö ɛ man nɛɛni diaal.

²¹ Kä cu Kuoth Nhial ni Kuoth A-dam kɛnɛ ciekdɛ lät kä bieyni dua̱li, kä cuɛ kɛ kuäth kɛ kɛ.

Tuk A-dam kɛnɛ Iib raar rɛy kakä E-dɛn

²² Ɛn guäth ɛmɔ cu Kuoth Nhial ni Kuoth cu wee i̱, “Täämɛ, nɛ̈nɛ jɛ, ci raan cu ce̱tkɛ ram kɛl kä kɔn, ŋäcɛ mi gɔaa kɛnɛ mi jiääk. Bɛ te i̱di mi wä raam ɔ wä mi̱thikä jiaath te̱e̱kä kä bɛ cu tëk kɛ tëk mi do̱raar!”

²³ Ɛ jɛn cuɛ raan cu tuɔ̱k raar rɛy kakä E-dɛn kɛ ɣöö bɛ mun ëë ta̱thkɛ jɛ thi̱n wä pur.

²⁴ Ɛ jɛn cuɛ wut tuɔ̱k raar rɛy kakä E-dɛn. Cuɛ puɔ̱ny mi ce̱tkɛ puɔ̱ny jääkä Kuɔth kɛnɛ mut mi rit rɔ kui̱cni diaal, la̱th kui̱ känyä ca̱ŋ kakä E-dɛn, gaŋkɛ duɔ̱ɔ̱p jiaath teekä.