Tuk Cäkä Ɣɔaa 29 - RUAC KUƆTH IN RƐL RƆ

Cuɔp Je-kɔb dhɔɔr näärɛ ni La-ban

¹ Ɛ jɛn, cu Je-kɔb ja̱lɛ cu nyɔk kɛ cot kä cuɛ wä ro̱o̱l nɛɛni tin ciaŋkɛ ni kui̱ käny ca̱ŋ.

² Cuɛ jiw mi te däärdɔaar nɛn. Cuɛ gua̱th bua̱a̱ni de̱e̱t da̱ŋ diɔ̱k nɛn wi̱i̱dɛ. Ɛ jɛn jiw in la ma̱a̱thkɛ det diaal thi̱n, kä ca thokdɛ kum kɛ päm mi di̱i̱t.

³ La rial yiëën de̱e̱t päm ɛmɔ jɔk thok jiɛw guäth in ci det diaal rɔ̱ jɔl kɛ duɔ̱l ni kɛn diaal ɛ ko̱k, kä bikɛ kɛ cu ma̱a̱th. Kä mi cikɛ det thuk kɛ mäth, bikɛ jɛ cu nyɔk kɛ kap thi̱n.

⁴ Min ci Je-kɔb cop rɛydiɛn kɛn ji̱ de̱e̱t, cuɛ kɛ thi̱ec i̱, “Dämaari, kɛ yɛn ji̱ dhɔaar in mith?” Cukɛ jɛ loc i̱, “Kɛ kɔn ji̱ Ɣa-ran.”

⁵ Cuɛ kɛ nyɔk nikɛ thi̱ec i̱, “Ŋa̱cɛ wut mi cɔal i̱ La-ban gat wutdä mi cɔal i̱ Na-ɣor?” Cukɛ jɛ loc i̱, “Ŋa̱ckɔ jɛ.”

⁶ Cuɛ kɛ cu thi̱ec i̱, “Jɛn malɛ?” Cukɛ jɛ jiök i̱, “Malɛ ɛlɔ̱ŋ. Kä nyaadɛ ni Re-cɛl bëë mɔ bä kɛ detkɛ kɛɛl.”

⁷ Cuɛ kɛ cu jiök i̱, “Nɛ̈nɛ jɛ, ŋot cäŋ kɛ di̱t, kä nɛmɛ /ciɛ jɛn gua̱a̱th mi dëë yiɛl ni ɣɔ̱k cieŋ. Gɔaa ni ɣöö bia kɛ ma̱a̱th kä bia kɛ cu luɔc laak.”

⁸ Kä cukɛ jɛ loc i̱, “/Cakɔ kɛ bi ma̱a̱th amäni mi wä bua̱a̱n de̱e̱t diaal wä ben kä ba päm cu rial jɔk thok jiɛw, ɛ jɛn bakɔ kɛ kulɛ ma̱a̱th ɔ.”

⁹ Kä guäth in ŋotdɛ kɛ ruac kɛ kɛ, cu Re-cɛl cop kɛ bua̱n de̱e̱t gua̱n, kɛ ɣöö ɛ nyam mi yiëën deet.

¹⁰ Min ci Je-kɔb Re-cɛl nɛn min la nya näärɛ ni La-ban, kɛnɛ de̱t La-ban, cuɛ wä kä cuɛ päm wä rial jɔk thok jiɛw, kä cuɛ de̱t näärɛ ma̱a̱th.

¹¹ Cuɛ Re-cɛl cim, kä cuɛ wiee.

¹² Ɛ jɛn cuɛ rɔ la̱t Re-cɛl ɛn ɣöö ɛ gat waydɛ ni Rɛ-bɛ-ka. Ni ɛ wa̱nɔ cu Re-cɛl riŋ kä cuɛ jɛ wä la̱r gua̱n.

¹³ Min wä La-ban kɛ̈k gatdä nyiman ni Je-kɔb liŋ, cuɛ rɔ pur kɛ ɣöö bikɛ ben jëk. Min cikɛ jëk cuɛ Je-kɔb bom kä cuɛ jɛ cim, kä cuɛ jɛ naŋ dhɔɔrɛ. Ɛ jɛn cu Je-kɔb La-ban ku la̱t tëë diaal tëë ci tuɔɔk.

¹⁴ Ɛ jɛn cu La-ban ɛ ku jiök i̱, “Ɛpuc, ji̱n lapi ci̱en jiɛcdä pa̱ny.” Ɛ jɛn, cukɛ cu cieŋ kɛɛl kɛ pay kɛl.

Kuen Je-kɔb kɛ Leya kɛnɛ Re-cɛl

¹⁵ Mëë ci Je-kɔb pay cu thuk dhɔɔr näärɛ ni La-ban, cu La-ban ɛ cu jiök i̱, “Cäŋɛ ni mi lapi gat nyimaar ɛ, /cɛ rɔ lot ɛn ɣöö de̱ri ɣä lätikä a thilɛ mi jeki. Lar ɛ kɛ ŋuni kɛn tin dëë rɔ lot ala kök kɛ pe̱k kä tin ci lät kä ɣä tɔ̱.”

¹⁶ Ɛn wanɛ mɔ La-ban tëë kɛ nyi̱er da̱ŋ rɛw, nyam in di̱i̱tdiɛn cɔal ɛ Leya, kä gurɛ ɛ Re-cɛl.

¹⁷ Leya ɛ duar nyin, kä Re-cɛl gɔaa nëndɛ kä liakkɛ ni maandɛ.

¹⁸ Kä kɛ ɣöö Je-kɔb di̱t ni nhökdɛ kɛ Re-cɛl, cuɛ La-ban jiök i̱, “Ɣän bä ji̱ lätikä kɛ run da̱ŋ bärɔw kɛ kui̱ nyaadu min tɔ̱t ni Re-cɛl.”

¹⁹ Cu närɛ jɛ loc i̱, “Gɔaa ni kämdɛ ji̱ kä kämdɛ ram mi guä, kuan lät.”

²⁰ Ɛ jɛ nɔ, cu Je-kɔb cu lät kɛ run bärɔw kɛ ɣöö bɛ Re-cɛl jek, kä kɛn run tɔ̱tɔ̱ cukɛ ce̱tnikɛ ni̱n ti tɔt ɛlɔ̱ŋ kä jɛ kɛ ɣöö di̱t nhökdɛ kɛ jɛ.

²¹ Mëë cɛ run tɔ̱tɔ̱ thuk, cuɛ näärɛ ku jiök i̱, “Ɣän cä gua̱a̱th ëë can lat thuk. Ku ɣä ka̱m ciekdä.”

²² Ɛ jɛn, cu La-ban mi̱th kuën rialikä, kä cuɛ ji̱ wec diaal cɔal dhɔɔrɛ.

²³ Kä min ci ɣɔw a thiaŋ, nɛ̈nɛ jɛ, cuɛ nyaadɛ ni Leya nöŋ Je-kɔb due̱e̱l, kä cu Je-kɔb niɛɛn kɛ jɛ.

²⁴ (Ɛn wa̱nɔ ci La-ban nya la̱tdɛ mi cɔal i̱ Dhil-pa thöp nyaadɛ ni Leya ala nya läätädɛ.)

²⁵ Kua jɛ lɛ me̱t nɛn bɛ, mëë ruɔ̱n kɛ runwaŋ cu nyal a Leya. Cu Je-kɔb La-ban ku thi̱ec i̱, “Ɛŋu ɛnɛ ci lät kɛ ɣä mi? A /cɛ kua kui̱ Re-cɛl ɛ nëë la̱tdä ni ji̱ ikä? Ɛŋu ci ɣä mɛt ɔ?”

²⁶ Cu La-ban ɛ loc i̱, “/Cɛ tëë kɛ kɔ ɛn wanɛ ɛn ɣöö ba raan nyaadɛ min tɔt kuɛn kɛ nhiam kä nyam in di̱t ni jɛn.

²⁷ Thuk puɔ̱t buɔ̱ɔ̱l kuen ɛmɛ kɛ jɛn juɔk ɛmɛ, kä jɛn Re-cɛl ba lɛni ka̱m ji̱ bä ala kök kɛ pe̱k läätdä min bi lät kä ɣä kɛ run bärɔw ti kɔ̱kiɛn.”

²⁸ Cu Je-kɔb ɛ nhɔk, kä cuɛ kuëndɛ thuk kɛ ni̱n bärɔw, kä kɛ kɔrɛ cuɛ Re-cɛl kuɛn.

²⁹ Cu La-ban läät nyaal mi cɔal i̱ Bila thöp nyaadɛ ni Re-cɛl ala nya läätädɛ.

³⁰ Ɛ jɛ nɔ, cu Je-kɔb Re-cɛl kuɛn bä, kä cuɛ nhɔk ni jɛ ɛlɔ̱ŋ kä Leya. Kä cuɛ La-ban lätikä kɛ run bärɔw kɔ̱kiɛn.

Gaat Je-kɔb

³¹ Mëë ci Kuoth Nhial ɛ nɛn ɛn ɣöö /ca Leya nhɔk, cuɛ jɛ moc dap guäth in cuɛ Re-cɛl pi̱em thi̱n.

³² Cu Leya cu ruët kä cuɛ gat mi dhɔl dap, cuɛ ciötdɛ cɔl i̱ Rɛ-u-ben, kɛ ɣöö ɛ jɛn i̱, “Ci Kuoth Nhial riɛk gäyädä nɛn. Täämɛ bi cɔwdä ɣä ku nhɔk.”

³³ Cuɛ rɔ lɛni nyɔk kɛ ruët kä cuɛ dap kɛ dhɔl, kä cuɛ wee i̱, “Ci Kuoth Nhial ɛ liŋ ɛn ɣöö lo̱k kɛ ɣä, kä cɛ ɣä cu ka̱m ɛn dhɔl ɛ bä.” Cuɛ ciötdɛ cu cɔl i̱ Cim-on.

³⁴ Cuɛ ruët lɛni nyɔk, kä cuɛ dho̱o̱l dap, kä cuɛ wee i̱, “Täämɛ bi cɔwdä rɔ cu ma̱t ɣä kɛ ɣöö cä jɛ da̱p dhɔɔl da̱ŋ diɔ̱k.” Cuɛ ciötdɛ cu cɔl i̱ Lii-bay.

³⁵ Cuɛ ruët nyɔk bä, kä cuɛ dap kɛ dho̱o̱l. Cuɛ wee i̱, “Täämɛ ɣän bä Kuoth Nhial cu liak.” Cuɛ ciötdɛ cu cɔl i̱ Juda. Kä cuɛ lɛ te lɔrä kɛ gua̱a̱th mi bäär.