Tuk Cäkä Ɣɔaa 28 - RUAC KUƆTH IN RƐL RƆ

¹ Ɛ jɛn, cu Ay-dhɛk Je-kɔb cu ciöl rɔ, cuɛ jɛ poth, kä cuɛ jɛ gok i̱, “/Cu bi kuɛɛn rɛy nyieet rööl Kɛ-naan.

² Jiɛc rɔ kä wër ni kä Pa-dan-a-ram, wër dhɔɔr gua̱n muɔɔr ni Bä-thu-ɛl kä wër moc rɔ nyam kɛl kä nyiee nääru ni La-ban.

³ Ba ji̱ poth ɛ Kuoth in le̱ny buɔ̱mdɛ ti diaal, kä bɛ ji̱ moc gaat ti ŋuan, kä bɛ ji̱ jak kä döör ti ŋuan.

⁴ Bɛ ji̱ ka̱m puɔ̱thdɛ ëë cɛ kɔŋ poth ni A-bɛ-ram yɛnɛ gaatku kɛ ɣöö de̱ri mun ɛ lapi jääl thi̱n ɛ ciɛŋ, mun ëë cɛ ka̱m A-bɛ-ram.”

⁵ Ɛ jɛn, cu Ay-dhɛk Je-kɔb cu jäk kä Pa-dan-a-ram, kä cu Je-kɔb wä dhɔɔr gua̱ndɔɔŋdɛ ni Bä-thu-ɛl raan Ä-ram kɛ ɣöö bɛ wä cieŋ kɛɛl kɛ närɛ ni La-ban min di̱ethkɛ kɛɛl kɛnɛ man ni Rɛ-bɛ-ka.

Nyɔak kuen E-thɔ

⁶ Ɛn wanɛ mɔ cu E-thɔ ɛ ku ŋa̱c ɛn ɣöö ci Ay-dhɛk Je-kɔb poth kä cɛ jiök i̱ wër kä Pa-dan-a-ram kɛ ɣöö bɛ rɔ wä kuën ciek ɛn wi̱ni, kɛnɛ ɣöö mëë cɛ jɛ thuk kɛ puɔ̱th cɛ gok i̱, “/Ci bi kuɛɛn rɛy nyieet rööl Kɛ-naan,”

⁷ amäni ɣöö ci Je-kɔb ruac gua̱n kɛnɛ man liŋ kä cɛ wä ni Pa-dan-a-ram.

⁸ Ɛ jɛn, min ci E-thɔ ɛ ku jek ɛpuc ɛn ɣöö /ci gua̱n ni Ay-dhɛk lɔcdɛ tɛth kɛ nyi̱er rööl Kɛ-naan,

⁹ kɛ kui̱c ɛmɔ cuɛ wä kä gua̱nlendɛ ni I-ca-mel tin tɔ̱ gaat A-bɛ-ram kɛɛl kɛn gua̱n ni Ay-dhɛk, kä cuɛ nya I-ca-mel mi cɔal i̱ Maa-lath kuɛ̈n wi̱i̱ määnkɛ tin tekɛ jɛ ni wen, kä cɔal nyiman Maa-lath i̱ Nɛ-ba-yɔth.

La̱k Je-kɔb kä Beth-ɛl

¹⁰ Nɛ̈nɛ jɛ täämɛ cu Je-kɔb cu jiɛɛn ni kä Ber-cɛ-ba wëë kä Ɣa-ran.

¹¹ Kä mëë cɛ cop guäth mi te ɛn kam ɛ mɔ, cuɛ gua̱a̱th tɔ̱ɔ̱cädɛ rialikä thi̱n kɛ ɣöö ci cäŋ kony. Kä min cɛ tɔ̱ɔ̱c go̱r, cuɛ rɔ moc kɛ lɛ̈l pa̱a̱m mi cuɛ jak kä cääk, cuɛ niɛɛn ɛn wi̱ni.

¹² Guɛcɛ jɛ, jɛn cuɛ la̱k läkikä i̱, tëë kɛ ko̱o̱t mi jiɛc ni piny kä wä wi̱cdɛ rɔ yiath ni pua̱a̱r, kä cuɛ ja̱a̱k Kuɔth nɛn jälkɛ thi̱n, tin ko̱t kɛnɛ tin bëë piny.

¹³ Kä cuɛ Kuoth Nhial nɛn tëë cuŋä wi̱i̱ ko̱o̱tdä, kä cu Kuoth ɛ jiök i̱, “Ɛ ɣän Kuoth Nhial in la Kuoth guur ni A-bɛ-ram kä Kuoth Ay-dhɛk bä. Ɣän bä mun ɛ ti̱i̱ tɔ̱ɔ̱cä thi̱n ɛ ka̱m ji̱ yɛnɛ kuayku.

¹⁴ Ɣän bä kuayku re̱p kä bi pe̱kdiɛn ŋuan ce̱tnikɛ liɛt piɛny. Kä bi rɔ di̱eth amäni mi ci ɣɔw thiäŋ kɛɛliw, cam ɣɔaa, cuec ɣɔaa, kɛ nhiam kɛnɛ jɔk ɣɔaa. Kɛ puɔ̱th in cä poth ni ji̱ yɛnɛ kuayku, döör diaal wi̱i̱ muɔ̱ɔ̱n bikɛ ɣä thi̱ec kɛ ciötdu ɛn ɣöö bä kɛ poth bä.

¹⁵ Kä ŋäthɛ ɛn ɣöö ta̱a̱ kɛɛl kɛ ji̱. Ɣän bä ji̱ guɛc lɛɛr rɛy jäliku diaal tin bi jäl, kä bä ji̱ luɔ̱ɔ̱c ɛn muun ɛ, kɛ kui̱ kä ɣöö /cä ji̱ dëë me̱t pa̱l duɔ̱th amäni mi wa̱a̱ tin cä guk kä ji̱ cuɔ̱p ni kɛn diaal.”

¹⁶ Ɛn wanɛ mɔ cu Je-kɔb ke̱e̱r ni̱n kä cuɛ jɛ lar i̱, “Ɛpuc, Kuoth Nhial tëë ɛn wanɛ, kä ɣän /ka̱n jɛ ŋa̱c.”

¹⁷ Min ci dual ɛ käp, cuɛ wee i̱, “Kua gua̱a̱th mi jiɛth lo̱c nath ɛ di ɛnɛ. Jɛn /cɛ dëë a dɔ̱diɛn ɛni gua̱a̱th ciëŋä Kuɔth, kä bɛ dhil a jɛn duɔ̱ɔ̱p rööl nhial.”

¹⁸ Mëë ruɔ̱ndɛ cuɛ rɔ jiɛc ni bakä, cuɛ lɛ̈l in cɛ jak kä cääk ka̱n, kä cuɛ jɛ cuŋ ala päm ti̱mä, kä cuɛ wi̱cdɛ caw kɛ liɛɛth.

¹⁹ Cuɛ gua̱a̱th ɛmɔ ciötdɛ cɔl i̱ Beth-ɛl (min lot ni ɣöö due̱l Kuɔth), kä ni wenkä cɔalkɛ gua̱a̱th ɛmɔ ciötdɛ i̱ Luudh.

²⁰ Cuɛ ku pal i̱, “Aɣ ji̱n Kuoth, mi bi te kɛɛl kɛ ɣä kä bi ɣä tiɛt lɛɛr rɛy ja̱lä mi wa̱a̱ thi̱n ɛ, kä bi ɣä moc kɛ mi camä kɛnɛ bieyni ti la̱thä,

²¹ kä bi ɣä luɔ̱ɔ̱c dhɔr gua̱a̱r nikɛ mal, mi wëë wa̱a̱ jɛn inɔ, kä ji̱n Kuoth Nhial bi ji̱n kua̱ Kuothdä,

²² kä jɛn päm ɛmɛ cä cuŋ ala duŋ ti̱mä mi, jɛn bɛ la due̱lu. Kä ɣän bä ji̱ ka̱m kɛl kä wäl kä tin diaal tin bi ka̱m ɣä.”