Tuk Cäkä Ɣɔaa 27 - RUAC KUƆTH IN RƐL RƆ

Puɔ̱th Ay-dhɛk Kɛ Je-kɔb

¹ Täämɛ guäth ëë ci Ay-dhɛk cu dɔŋ kä cɛ nyinkɛ yäm a ci nëndɛ a mi̱r mi̱r, cuɛ gatdɛ min di̱i̱t ni E-thɔ cɔl, kä cuɛ jɛ jiök i̱, “Gatdä.” Kä cu gatdɛ jɛ loc i̱, “Ɣän ɛn gua̱di̱n.”

² Cuɛ jɛ jiök i̱, “Mɔ nɛɛni jɛ mɔ ɛn täämɛ ɣän cä dɔŋ kä kuecä cäŋ li̱ethdä.

³ Täämɛ, ji̱n käni yio̱w ka̱kdu kɛnɛ gök dɛɛni daŋädu kä wër käkni ɣä le̱y,

⁴ kä bi jɛ ben thal ni kɛ tha̱t in la go̱r lɔcdä jɛ, kä bi jɛ cu nöŋä, kɛ ɣöö dëë ji̱ poth kam in ŋuɔtdä ta̱a̱ te̱e̱kä.”

⁵ Täämɛ min ruac Ay-dhɛk kɛ gatdɛ ni E-thɔ liŋ Rɛ-bɛ-ka ruacdiɛn. Kä min ci E-thɔ wä kak kɛ ley,

⁶ cu Rɛ-bɛ-ka gatdɛ ni Je-kɔb jiök i̱, “Ɣän cä guur liŋ ruacɛ kɛ dämuɔɔr ni E-thɔ i̱,

⁷ ‘Ji̱n wër käkni ɣä le̱y kä biɛ ben tha̱l ɣä kɛ ɣöö dëë ji̱ ben poth nhiam Kuɔth Nhial kam in ŋuɔtdä ta̱a̱ te̱e̱kä.’

⁸ Täämɛ, gatdä, liŋ ruacdä.

⁹ Wër rɛy de̱e̱t kä no̱ŋni ɣä dɛy deet da̱ŋ rɛw, kɛ ɣöö dëë kɛ cu ben tha̱l guur ni kɛ pe̱k in go̱o̱rɛ kɛ lɔcdɛ.

¹⁰ Kä de̱ri jɛ cu nöŋ mi̱eth kɛ ɣöö dëë guur ji̱ wä poth kam in ŋotdɛ /ke̱nɛ ni li̱w.”

¹¹ Kä cu Je-kɔb man jiök i̱, “Nɛn ɛ, dämaar ni E-thɔ ɛ ram mi puɔ̱ny mi̱em, kä ɣän puɔth puɔ̱nydä.

¹² Bɛ kulɛ te i̱di mi wä gua̱a̱r puɔ̱nydä wä thiap, bɛ cu wee mɛɛtä ni jɛ. Inɔ, ɣän bä cu nöŋ ni rɔɔdä kuëth nhiamdɛ a /ci mɔ puɔ̱th.”

¹³ Kä cu man ɛ jiök i̱, “Gatdä, kuëth ɔ bi jek ɔ bɛ te wi̱i̱dä. Kä liŋ ni min la̱tdä ji̱, kä wër nöŋ nikɛ ɣä.”

¹⁴ Ɛ jɛn, cuɛ cu wä, kä cuɛ kɛ wä nöŋ man, kä cu man kɛ thal ni kɛ tha̱t in go̱r lɔc gua̱n ɛ.

¹⁵ Kä cu Rɛ-bɛ-ka bieyni E-thɔ ka̱n, kɛn bieyni tin gɔw ni kɛn pa̱ny tëë cɛ tɔ̱w due̱e̱l kɛ jɛ kɛɛl, kä cuɛ kɛ la̱th puɔ̱ɔ̱ny Je-kɔb.

¹⁶ Kä cuɛ köl dɛɛni de̱e̱t tin kɔŋ par te̱tnikɛ kä cuɛ gua̱a̱th in puɔth ŋuääkdɛ pärikä bä.

¹⁷ Kä ɛ jɛn, cuɛ mi̱eth in cɛ thal ni kurä kɛnɛ mi la juray cu ka̱m Je-kɔb.

¹⁸ Mëë cɛ kɛ ka̱m jɛ, cu Je-kɔb kɛ naŋ kä cuɛ gua̱n ben jiök i̱, “Guä,” kä cuɛ jɛ loc i̱, “Ɣän ɛn, gatdä, ɛ ji̱n ŋa gani?”

¹⁹ Cu Je-kɔb ɛ loc i̱, “Ɛ ɣän kɛ̱̈ɛ̱̈du ni E-thɔ. Cä min ci la̱t ɣä thuk kɛ lätni, ku rɔ jiac nyuur täämɛ, kä bi min cä wä kak cam kɛ ɣöö deri ɣä cu poth.”

²⁰ Cu Ay-dhɛk gatdɛ thi̱ec i̱, “Ɛ ciɛ ku jek i̱di mɔ ci pɛ̈th inɔ mɔ, gatdä?” Cuɛ gua̱n loc i̱, “Ci Kuoth Nhial min la Kuothdu jɛ yiëël kɛ nhiamdä.”

²¹ Cu Ay-dhɛk Je-kɔb ku jiök i̱, “Bër cɔ̱ɔ̱r, gatdä, kä a ba̱a̱ puɔ̱nydu ben thiap mi ɛ ji̱n gatdä ni E-thɔ ɛpuc.”

²² Mëë ci Je-kɔb wä kä jɛ thiäkä, cu gua̱n ɛ thiap kä cuɛ wee i̱, “Ɛn duɔ̱ɔ̱r ce̱t jɔwdu kɛ jɔw Je-kɔb, kä te̱tku kɛ te̱t E-thɔ.”

²³ /Kenɛ jɛ ŋa̱c kɛ ɣöö te te̱tkɛ kɛ mi̱em ce̱tnikɛ te̱t E-thɔ. Kɛ kui̱ ɛmɔ cuɛ jɛ cu poth.

²⁴ Min ɛ jɛn i̱ pothɛ jɛ, cuɛ jɛ nyɔk nikɛ thi̱ec i̱, “Ji̱n lapi gatdä ni E-thɔ ɛ puc?” Kä cu Je-kɔb ɛ loc i̱, “Ɛ ɣän.”

²⁵ Cuɛ jɛ cu jiök i̱, “Ŋun ɛ ɛnɔ ci wä kak ɔ, a jɛ ba̱a̱ ben cam kɛ ɣöö dëë ji̱ cu poth.” Ɛ jɛ nɔ, cuɛ jɛ cu nöŋ jɛ, kä cuɛ mi̱th. Cu gatdɛ jɛ nöŋ kɔaŋ kä cuɛ maath.

²⁶ Mëë cɛ ku maath, cuɛ gatdɛ cu jiök i̱, “Ti̱i̱cni rɔ thiäkä, gatdä, bër cim ɣä.”

²⁷ Ɛ jɛn, cuɛ cu ben thiäkä kä cuɛ jɛ cim. Mëë ci Ay-dhɛk bieyni Je-kɔb ŋuäc, cuɛ jɛ poth wëë i̱, “Nɛn ɛ, ce̱t ŋuäny pua̱a̱ny gatdä kɛ ŋuäny kakä mi ci Kuoth Nhial ɛ poth.

²⁸ A Kuoth moc ka̱a̱ku kɛ nhial mi ro̱ŋ, a dëë bɛlku kɛnɛ kɔaaŋku lɛny dɔɔr.

²⁹ Bi döör diaal ji̱ lätikä, kä bikɛ rɔ̱ goŋ kɛ ji̱. Bi la kuäär rɛy gan muɔɔri, kä bi gaat muɔɔr rɔ̱ goŋ kɛ ji̱. Ba nɛy diaal tin kuɛ̈thkɛ ji̱ kuɛth, kä ba kɛn diaal tin puɔthkɛ ji̱ poth.”

³⁰ Guäth ëë ci Ay-dhɛk ku thuɔ̱k kɛ puɔ̱th Je-kɔb, kä ɛ niɛ jiɛn Je-kɔb gekä gua̱n, cu däman ni E-thɔ luny jɔk käk.

³¹ Jɛn cuɛ ri̱ŋ lɛni thal ni kɛ jɛn tha̱t in go̱r lɔc gua̱n ɛ, kä cuɛ jɛ nöŋ gua̱n, kä cuɛ jɛ ben jiök i̱, “Jiɛc ni rɔ nyuur, Gua̱a̱thdä, kä bi min cä wä kak cam, kɛ ɣöö deri ɣä cu poth.”

³² Cu gua̱n ɛ thi̱ec i̱, “Ɛ ji̱n ŋa?” Cuɛ jɛ loc i̱, “Ɛ ɣän gatdu ni E-thɔ min la kɛ̱̈ɛ̱̈du.”

³³ Niɛ wa̱nɔ, cuɛ Ay-dhɛk puɔ̱nydɛ lath ɛlɔ̱ŋ, kä cuɛ wee i̱, “Kä kuɛ la ŋa ɛn ni̱n ci ɣä nöŋ ri̱ŋ lɛ̱̈ɛ̱̈ mi cɛ kak? Kä guäth in ti̱i̱ jɔ̱ɔ̱r cä ri̱i̱ŋdɛ cam ni kɛɛliw, cua jɛ cu poth, kä bi puɔ̱th ɛmɔ a duŋdɛ amäni cäŋ kɛl.”

³⁴ Min ci E-thɔ ruac ɛmɔ liŋ kä gua̱n, cuɛ wak kɛ jɔw mi di̱i̱t, kä cuɛ gua̱n jiök i̱, “Mal ɣä ni poth bä, gua̱a̱thdä!”

³⁵ Kä min te ni jɛn thi̱n, cu gua̱n ɛ jiök i̱, “Ci dämuɔɔr ɣä ben mɛt kä cɛ puɔ̱thdu ben kual.”

³⁶ Ɛn wa̱nɛ mɔ, cu E-thɔ ɛ cu jiök i̱, “Ca jɛ ku cɔal ni guäthdɛ ɛpuc ni Je-kɔb, ɛ nɛ cɛ ɣä loc kɛ mët ni kä rɛɛwɛ, ɛ jɛn cɛ gua̱a̱th di̱tädä kɔŋ wen kä täämɛ cɛ puɔ̱thdä lɛni ben kual.” Kä cuɛ gua̱n lɛni thi̱ec i̱, “Ji̱n, /cɛ cu thil puɔ̱th mi ci mal duɔ̱th ɣä?”

³⁷ Cu Ay-dhɛk ɛ loc i̱, “Cä jɛ jak kä kuääru, kä cä dämani diaal jak kä kuaanykɛ, kä cä jɛ puɔ̱th bɛl ti ŋuan. Ɣän bä ji̱ kulɛ lät kä ŋu, gatdä?”

³⁸ Cu E-thɔ ɛ jiök i̱, “Ci nɔmɔ cua̱ niɛ jɛn pe̱k puthädu a thil dɔ̱diɛn? Poth ɣä bä, gua̱a̱thdä.” Kä cuɛ pa̱r kɛ jɔw mi di̱i̱t.

³⁹ Cu gua̱n ɛ jiök i̱, “Bi gua̱a̱th ciɛŋädu nɔ̱a̱n kɛ mun mi ro̱ŋ nhial ɛ, kä bi mundu thil bɛl ti com.

⁴⁰ Bi mi̱ethdu jek kɛ ko̱r kɛnɛ mac, kä bi la kuany dämuɔɔr. Kuɛ la ɣöö, cäŋ in wi̱i̱ ŋɔa̱a̱ŋ yaakä, bi rɔ lony kä jɛ.”

Wä Je-kɔb kä närɛ ni La-ban

⁴¹ Ɛn guäth ɛmɔ cu E-thɔ däman ni Je-kɔb cu luɔ̱c tɛr kɛ kui̱ puthä min ci gua̱n ɛ ka̱m jɛ, kä cuɛ riet kɛ lɔcdɛ i̱, “Kɛn ni̱n tin ba par ni gua̱a̱r cikɛ thiak. Bä rɔ cu jek gua̱a̱th mi na̱kä ni dämaar ni Je-kɔb.”

⁴² Mëë ci Rɛ-bɛ-ka ca̱p gatdɛ min cɛ lat liŋ kä naath, ɛ jɛn cuɛ gatdɛ ni Je-kɔb cɔl kä cuɛ jɛ jiök i̱, “Dämuɔɔr bi̱i̱mɛ näkdu.

⁴³ Liŋ min la̱tdä ji̱, gatdä. Ji̱n bar rɔ niɛ täämɛ kä wër kä dämaar ni La-ban ro̱o̱l Ɣa-ran.

⁴⁴ Wër teni kɛɛl kɛ jɛ kɛ ni̱n ti tɔt, amäni mi wä waŋ lɔaac dämuɔɔr wä thuɔ̱k.

⁴⁵ Kä kɛ kɔr kä mi, wëë min ci lät kä jɛ wä pa̱l rueec, bä ji̱ jäk kä raan kä bi̱i̱ ciööl jɔk. /Ciɛ luɔt ɛn ɣöö dërɛ bath nhiamdä kɛ cäŋ kɛl yɛn da̱ŋ rɛw ni kɛɛl.”

⁴⁶ Ɛ jɛ nɔ, cu Rɛ-bɛ-ka Ay-dhɛk ku jiök i̱, “Ɣän ci tëkdä bɛ̈c ɛlɔ̱ŋ kɛ kui̱ nyieet Ɣɛ̈th ti̱ti̱. Mi wä Je-kɔb lɛni kuɛɛn rɛydiɛn kɛn nyi̱er ti nɛ̈ɛ̈nä ɛn wanɛ ti, thilɛ mi bi rɔ lot rɛy te̱e̱kädä.”