Tuk Cäkä Ɣɔaa 25 - RUAC KUƆTH IN RƐL RƆ

Gaat A-bɛ-ram kɛ Kɛ-tu-ra

¹ Täämɛ A-bɛ-ram cɛ rɔ nyɔk kɛ kue̱n kɛ ciek mi cɔal i̱ Kɛ-tu-ra.

² Cuɛ ciek ɛmɔ di̱eth gaat ti̱ti̱, Dhim-ran kɛ Yɔk-can kɛ Mɛ-dhan kɛnɛ Mid-yan kɛ Ic-bak kɛnɛ Cua.

³ Cu Yɔk-can gaat rɛw di̱eth ti tɔ̱ Cɛba kɛnɛ Dɛ-dan. Cu gaat Dɛ-dan a A-cu-rim kɛ Lɛ-tu-cim kɛnɛ Lɛ-u-mim.

⁴ Cu gaat Mid-yan a, Eepa kɛnɛ E-pɛr kɛ Ä-nok kɛnɛ Ä-bi-dhä kɛ Ɛ-la-da. Tɔ̱tɔ̱ kɛn diaal kɛ gaat Kɛ-tu-ra.

⁵ Kä cu A-bɛ-ram kuakɛ diaal ka̱m gatdɛ ni Ay-dhɛk.

⁶ Kä mëë ŋot A-bɛ-ram kɛ tëk, cuɛ gaat luɔɔmnikɛ moc kɛ muc, kä cuɛ kɛ tuk, kɛ ɣöö bikɛ na̱n kɛ Ay-dhɛk. Kä cukɛ wä kui̱ rööl känyä ca̱ŋ.

Lia̱a̱ A-bɛ-ram kɛnɛ kuɔ̱nydɛ

⁷ Täämɛ cu run te̱e̱kä A-bɛ-ram diaal a run ti kuɔ̱r kɛl wi̱cdɛ jiɛn bärɔw wi̱cdɛ dhieec.

⁸ Kä cuɛ cu li̱w a ro̱ŋ lɔcdɛ rɛy te̱e̱kä mi bäär.

⁹ Cu gaatkɛ da̱ŋ rɛw Ay-dhɛk kɛnɛ I-ca-mel jɛ kony kɔ̱k Mak-pe-la mëë te rɛy kakä Ɛp-rɔn gat Dho-ɣar raan Ɣɛ̈th. Ɛ jɛn kak ëë thiëëk kɛ Ma-mɛ-ri,

¹⁰ Mëë kɔk A-bɛ-ram ɛ nhiam gan Ɣɛ̈th, kä ɛ jɛn gua̱a̱th ëë ca ciek A-bɛ-ram ni Thara kɔŋ kony thi̱n.

¹¹ Kä kɛ kɔr li̱eth A-bɛ-ram cu Kuoth Nhial Ay-dhɛk poth kä cuɛ cu ciɛŋ ni Beer-laa-rɔy.

Gaat I-ca-mel

¹² Liɛŋɛ jɛ täämɛ, ti̱ti̱ kɛ gaat I-ca-mel gat A-bɛ-ram ëë da̱pkɛ jɛ ɛ nya rööl I-jëp ni A-gar, jɛn nyam ëë mɔ läät Thara.

¹³ Ti̱ti̱ kɛ kɛn pe̱k ciöötni gan I-ca-mel a ca kɛ guir ni guɔ̱ɔ̱ri. Nɛ-ba-yɔth ɛ jɛn gatdɛ min kɛ̱̈ɛ̱̈, cu dämani a Ke-dhar kɛ Adh-beel kɛ Mi-ba-tham

¹⁴ kɛ Mic-mä kɛ Dhuma kɛ Mathɔ

¹⁵ kɛ A-dad kɛ Teemɔ kɛ Yɛ-tur kɛ Na-pic kɛnɛ Kedh-ma.

¹⁶ Tɔ̱tɔ̱ kɛ kɛn ciööt kua̱ri thuk duëli gan I-ca-mel da̱ŋ wäl rɛw rɛy ciëëŋikiɛn kɛnɛ dho̱rkiɛn.

¹⁷ Täämɛ mëë li̱w I-ca-mel, runkɛ kɛ run ti kuɔ̱r kɛl wi̱cdɛ jiɛn diɔ̱k wi̱cdɛn bärɔw.

¹⁸ Kä kɛn thuk duëli gan I-ca-mel cukɛ ciɛŋ ni ro̱l in te kam Ä-wi-la kɛnɛ Cur ke̱th rööl I-jëp lotdä A-thi-ri-ya. Kä cukɛ cieŋ tiilä kamnikiɛn kɛ dämanikiɛn diaal.

Da̱p E-thɔ kɛnɛ Je-kɔb

¹⁹ Täämɛ ti̱ti̱ kɛ gaat Ay-dhɛk gat ëë ci A-bɛ-ram ɛ di̱eth.

²⁰ Kä jɛn runkɛ kɛ run ti jiɛn ŋuaan guäth ëë kuɛnɛ Rɛ-bɛ-ka nya Bä-thu-ɛl raan rööl Ä-ram rɛɛk Pa-dan-a-ram, Rɛ-bɛ-ka ɛmɔ ɛ jɛn nyiman La-ban.

²¹ Cu Ay-dhɛk ciekdɛ jääny a thil gat, kɛ kui̱c ɛmɔ cuɛ Kuoth Nhial thi̱ec kɛ kui̱dɛ. Mëë cɛ jɛ thi̱ec, cu Kuoth Nhial palɛ liŋ, kä cu Rɛ-bɛ-ka ruët.

²² Kä min cɛ ruët, nɛ̈nɛ jɛ, cu gaat dhuɔ̱ɔ̱r ɛlɔ̱ŋ jiidɛ. Kä cuɛ thi̱ec i̱, “Ɛŋu tuɔɔk nɛmɛ kä ɣä mɔ?” Kɛ kui̱ ɛmɔ cuɛ go̱r ni ɣöö bɛ jɛ thi̱ec kä Kuoth Nhial.

²³ Kä cu Kuoth Nhial ɛ loc i̱, “Te jicdu kɛ döör da̱ŋ rɛw, kä bi dap kɛ nɛy da̱ŋ rɛw ti bi ciaaŋdiɛn gua̱c. Bi buɔ̱m ni do̱r kɛl kä min dɔ̱ŋ, kä gat in di̱t ni jɛn bɛ gat in tɔt lätikä.”

²⁴ Mëë ci päth rue̱tädɛ thuɔ̱k, cuɛ dap kɛ cuɛ̈ɛ̈k.

²⁵ Min ci gat in nhiam käny raar, tithɛ ɛ cuät, kä puɔ̱nydɛ ni kɛɛliw kɛ mi̱em. Ɛ jɛ nɔ, cukɛ ciötdɛ cɔl i̱ E-thɔ.

²⁶ Kä min ci gat in jio̱l ben raar, cua jɛ guɔ̱ɔ̱r ɛ däman a käpɛ ŋul cio̱kädɛ lɛɛr, kä cua ciötdɛ cɔl i̱ Je-kɔb. Mëë dapkɛ kɛ, ɛn guäth ɛmɔ Ay-dhɛk runkɛ kɛ run ti jiɛn bäkɛl ɛgi̱m.

²⁷ Kä mëë ci dhɔɔl tɔ̱tɔ̱ piith, cu E-thɔ a wut mi kääk le̱e̱yni mi di̱i̱t, mi ciɛŋ ni ta̱a̱ jɔa̱a̱r, kä cu däman ni Je-kɔb a wut mi muɔ̱l muɔ̱l mi la ciɛŋ ni cieŋ.

²⁸ Cu Ay-dhɛk nhɔk ni E-thɔ ɛlɔ̱ŋ kɛ ɣöö jekɛ cuɔm ri̱i̱ŋ le̱e̱yni tin la no̱ŋɛ jɛ. Kä Rɛ-bɛ-ka nhɔkɛ ni Je-kɔb.

²⁹ Nɛ̈nɛ jɛ, kɛ cäŋ kɛl mëë te Je-kɔb thät cuɛɛni ti dɛɛr, cu E-thɔ luny jɔk guäth jälikɛ ɛ ca näk ɛ buɔth ɛlɔ̱ŋ. Min cɛ cuɛy tin thalkɛ ŋuäc,

³⁰ cuɛ Je-kɔb lim i̱, “Jio̱mni ɣä ɛn cuɛɛni tɔ̱ luaal tɔ̱tɔ̱ kɛ ɣöö ci buɔth ɣä näk.” Cu luɔt kä mëë cɔaalkɛ ni jɛ i̱ Ɛ-dɔm cua nɔ.

³¹ Kä cu Je-kɔb jɛ loc i̱, “Kämni ɣä gua̱a̱th di̱tädu kɛ nhiam.”

³² Kä cuɛ Je-kɔb jiök i̱, “Ɛn täämɛ, ci thia̱k ni ɣöö bä muɔn, kä bi gua̱a̱th di̱tädä luɔtdɛ ku la ŋu kä ɣä mi wa̱a̱ li̱w.”

³³ Mëë cɛ nɔmɔ lar inɔ, cu Je-kɔb ɛ jiök i̱, “Mi ciɛ nhɔk, jɔl rɔ kɛ yac nhiamdä.” Ɛ jɛn, cuɛ rɔ cu yac nhiam Je-kɔb.

³⁴ Min cɛ rɔ cu yac, cu Je-kɔb ɛ cu moc kɛ juray kɛnɛ cuɛy tin kɔɔn. Cuɛ mi̱th, kä cuɛ maath, kä cuɛ rɔ jiɛc, kä cuɛ cu wä. Cu E-thɔ gua̱a̱th di̱tädɛ cu jak kä mi thil luɔt inɔ.