Tuk Cäkä Ɣɔaa 22 - RUAC KUƆTH IN RƐL RƆ

Ɣɔ̱n ŋäthä A-bɛ-ram

¹ Kɛ kɔr kä ti̱ti̱ diaal cu Kuoth A-bɛ-ram ɣɔ̱n. Cuɛ ciöt i̱, “A-bɛ-ram!” Cu A-bɛ-ram ɛ loc i̱, “Ɣän ɛn.”

² Cu Kuoth Nhial ɛ jiök i̱, “Täämɛ käni gatdu min kɛl kärɔa ni Ay-dhɛk, jɛn kɛlu min nhɔki ɛlɔ̱ŋ, kä wër kɛ jɛ dhɔɔr in cɔal i̱ Mɔ-ri-ya. Ɛn thɔ̱ŋi wër tho̱pni jɛ ɣä ala muc mi waŋkɛ wi̱i̱ pa̱a̱m in bä wä nyuɔ̱th ji̱.”

³ Kä mëë ci A-bɛ-ram mɔmɔ liŋ, cuɛ ke̱e̱r ni po̱o̱tdä, cuɛ jiɛn ba̱k ala tɔŋ ti ba wä waaŋ ni muc, cuɛ muulɛ rialikä, kä cuɛ wutni da̱ŋ rɛw kä la̱a̱tkɛ naŋ kɛɛl kɛ jɛ kɛ gatdɛ ni Ay-dhɛk, cuɛ cu jiɛɛn wädɛ guäth ëë ci Kuoth ɛ la̱r jɛ.

⁴ Mëë cikɛ ja̱l kɛ ni̱n da̱ŋ diɔ̱k, cu A-bɛ-ram lët kä cuɛ gua̱a̱th ɛmɔ nɛn ni nänä.

⁵ Ɛn wa̱nɔ cuɛ la̱a̱tkɛ ku jiök i̱, “Duɔthɛ ɛn wanɛ kɛɛl kɛ muul, täämɛ ɣän kɔnɛ jɛn dhɔl ɛmɛ bakɔ Kuoth wä pal wi̱ni mi, kɛ kɔrɛ bakɔ cu luny kä yɛ.”

⁶ Min cɛ kɛ jiök inɔ, cuɛ gatdɛ ni Ay-dhɛk cu jak kä kapɛ tɔŋ jiɛn, kä jɛn puɔ̱nydɛ A-bɛ-ram rɔmɛ mac kɛnɛ ŋɔ̱m. Cukɛ cu wä.

⁷ Min jälkɛ, cu Ay-dhɛk gua̱n ku jiök i̱, “Gua̱.” Cu gua̱n wee i̱, “Ɛ ji̱n i̱di gatdä.” Cuɛ gua̱n jiök i̱, “Kɔn ja̱lnɛ kɛ mac kɛnɛ tɔŋ, kä dɛl in bi ku la muc mi ba waŋ ani?”

⁸ Kä cuɛ jɛ loc i̱, “Gatdä, ɛn Kuoth puɔ̱nydɛ bɛ dɛl ŋun mi ba thöp jɛ ala muc mi waŋkɛ.” Kä cukɛ cu wä.

⁹ Mëë cikɛ cop guäth ëë lar Kuoth ɛ, cu A-bɛ-ram yi̱k täth, kä cuɛ tɔŋ car thi̱n, kä cuɛ gatdɛ ni Ay-dhɛk cu yian, kä cuɛ jɛ cak wi̱i̱ tɔ̱ɔ̱ŋ wi̱i̱ yi̱kä.

¹⁰ Mëë cɛ nɔmɔ la̱t, cuɛ ŋɔ̱m cu guath kɛ ɣöö bɛ gatdɛ ŋot.

¹¹ Kä nɛ̈nɛ jɛ, cu jääk Kuɔth Nhial jɛ cɔl ni nhial i̱, “A-bɛ-ram! A-bɛ-ram!” Kä cuɛ nhɔk i̱, “Ɣän ɛn.”

¹² Cu jääk Kuɔth ɛ ku jiök i̱, “/Cu dhɔl ɛmɔ gue̱e̱r a bi jɛ lät kä mi jiääk, kɛ ɣöö cä ku ŋa̱c täämɛ ɛn ɣöö ji̱n luthi Kuoth, nikɛ min /ke̱ni gatdu pën ɣä, jɛn gatdu min kɛl kärɔa.”

¹³ Ɛn wa̱nɛ mɔ cu A-bɛ-ram liɛɛc kä cuɛ tutdɛ̈ɛ̈l rɔmä nɛn mi ca tuɔ̱ŋkɛ rɔk kuiyni. Cuɛ jɛ wä nööŋ kä cuɛ jɛ ben thöp Kuoth ala muc mi waŋkɛ kɛ gua̱a̱th gatdɛ.

¹⁴ Kɛ kui̱ ɛmɔ cuɛ gua̱a̱th ɛmɔ cɔl i̱ Kuoth Nhial ŋunɛ ŋɔak. Ɛ jɛ nɔ, amäni täämɛ la lar naath ɛ i̱, “Wi̱i̱ pa̱a̱m Kuɔth Nhial jek kɛ duɔ̱ɔ̱r thi̱n.”

¹⁵ Cu jääk Kuɔth Nhial ɛ lɛni cɔl ni nhial,

¹⁶ kä cuɛ jɛ jiök i̱, “Mɛmɛ ɛ ruac Kuɔth Nhial, cɛ wee i̱, ‘Ɣän la̱thä guk ruac mi thil nyɔak kamädä kɔnɛ ji̱ kɛ kui̱ kä ɣöö ci nɛmɛ la̱t, kä /ke̱ni gatdu pen ɣä.

¹⁷ Ɣän bi̱i̱ poth kɛ puɔ̱th mi bä kuayku jak kä ŋuan ce̱tnikɛ ciɛr nhial kiɛ liɛt thuɔk yiëër. Kä bi kuayku rɛ̈k ji̱ tɛ̈riɛn mac.

¹⁸ Bi döör diaal wi̱i̱ muɔ̱ɔ̱n puɔ̱th jek kɛ kuayku kɛ ɣöö ji̱n ci ruacdä liŋ.’ ”

¹⁹ Niɛ wa̱nɔ cu A-bɛ-ram kɛnɛ gatdɛ cu loc kä la̱a̱tkɛ kä cukɛ cu wä Ber-cɛ-ba kɛn diaal. Kä cu A-bɛ-ram cieŋ ɛn win i̱.

Gaat Na-ɣor

²⁰ Kɛ kɔr kä ti̱ti̱, cua A-bɛ-ram lɛni la̱r lär i̱, “Ciek dämuɔɔr ni Na-ɣor cɛ dap kɛ gaat.

²¹ Gatdɛ min kɛ̱̈ɛ̱̈ ɛ Udh, cu däman ni Buudh kɛnɛ Kɛ-mu-ɛl min cɔal gatdɛ i̱ Ä-ram,

²² kɛ Kɛ-thɛd, kɛ Ädho, kɛ Pil-dac, kɛ Yid-lap, kɛ Bä-thu-ɛl.”

²³ min cɔal nyaadɛ i̱ Rɛ-bɛ-ka. Ci Mil-ka gaat bädäk tɔ̱tɔ̱ da̱p däman A-bɛ-ram ni Na-ɣor.

²⁴ Kä cu luɔm Na-ɣor ni Rɛ-u-ma gaat ti̱ti̱ dap, Tɛba, Gaam, Taac, kɛ Maakaa.