Tuk Cäkä Ɣɔaa 15 - RUAC KUƆTH IN RƐL RƆ

Guk kam Kuɔth kɛnɛ Ab-ram

¹ Kɛ kɔr kä ti̱ti̱ cu Kuoth Nhial rɔ nyuɔ̱th Ab-ram kɛ la̱k, kä cu Ab-ram jɔw liŋ mi wee i̱, “A lɔcdu bum, Ab-ram ɛ ɣän ko̱tdu. Kɛ pe̱k ŋäthädu, mucdu ɛ mi di̱i̱t ɛlɔ̱ŋ.”

² Kä cu Ab-ram ɛ loc i̱, “Kuäär ni Kuoth, bi mucdu cu la ŋu kɛ ɣä, kä ɣän thilɛ ɣä gat. Ɛ ni Ɛ-li-dhɛr raan Da-math-kɛth.

³ Thilɛ ɣä gat mi la gatdä ɛ ni kuanydä kɛ ɣöö /keni ɣä moc gaat.”

⁴ Ɛ jɛn, min cɛ cu ruac inɔ, cu Kuoth Nhial jɛ ku jiök i̱, “Nɛnɛ, /cɛ bia̱ jɛn la gatdu mɔ, ɛ ni gatdu min gatdu pa̱ny.”

⁵ Cuɛ Ab-ram cɔal raar rɛy duëël kä cuɛ jɛ jiök i̱, “Liɛc pua̱a̱r, kä guic ciɛrkɛ tin /ci dëë luäŋ kɛ kuën. Inɔ kɛn kuayku bi pe̱kdiɛn pa̱a̱r nikɛ kɛ.”

⁶ Cu Ab-ram ruac Kuɔth Nhial ŋäth, kä kɛ kui̱c ɛmɔ cu Kuoth Nhial ciɛŋkɛ nhɔk.

⁷ Ɛ jɛn cu Kuoth Nhial Ab-ram ku jiök i̱, “Ɛ ɣän Kuoth Nhial ëë no̱o̱ŋ ji̱ raar kä Ur ni ro̱o̱l ji̱ Kɛ̈l-da-ya kɛ ɣöö bä mun ɛmɛ ben ka̱m ji̱ ala duŋdu.”

⁸ Cu Ab-ram ɛ thi̱ec i̱, “Lö Kuäär ni Kuoth Nhial, bä jɛ ku lɛ ŋa̱c i̱di i̱?”

⁹ Ɛn wa̱nɔ cu Kuoth Nhial jɛ loc i̱, “Wër näkni ɣä nac mi runkɛ diɔ̱k kɛnɛ nac dɛ̈ɛ̈l mi tëë run diɔ̱k, kɛ ruath dɛ̈ɛ̈l mi tëë run diɔ̱k, kɛ dɔw guukä kiɛ kunöör kɛl.”

¹⁰ Ɛ jɛn, mëë ci Ab-ram mɔmɔ liŋ, cuɛ kɛ na̱k Kuoth kɛn diaal, cuɛ kɛ ba̱k ni da̱ri, cuɛ le̱y ɔ baakɛ car taarä guäth kɛl a thil ni diit, kɛ kɛn tin /kenɛ ba̱k.

¹¹ Mëë ci cuɔɔr ben nyuur guäth ri̱i̱ŋ, cu Ab-ram kɛ tur.

¹² Guäth ëë wä cäŋ kɛ mi konyɛ cuɛ Ab-ram kuer ni̱en mi di̱i̱t, kä cuɛ jɛ kuer dual mi jiäk ɛlɔ̱ŋ.

¹³ Kä nɛ̈nɛ jɛ, cu Kuoth Nhial ɛ jiök i̱, “Ŋäcni jɛ agɔaa ɛn ɣöö a /ka̱n mun ɛmɛ ni guäl ɛ kuayku, kɛn bikɛ a ja̱a̱l rööl go̱lä kä bikɛ te yaakä kɛ run ti kur ŋuaan.

¹⁴ Kä duundɛ ɣöö bä do̱r in ci kɛ yak moc riɛk, kä lunyädiɛn jɔk bikɛ ben kɛ ŋɔak ti ŋuan ɛlɔ̱ŋ.

¹⁵ Kä ji̱n puɔ̱nydu pa̱ny, bi ni̱nku thuk kɛ mal, kä bi dɔŋdu cuɔ̱p.

¹⁶ Kä /cikɛ bi luny muun ɛmɛ ɛ ni mi wa ri̱c in ŋuaandiɛn wä di̱eth kä kɛ, kɛ ɣöö bi la̱t nyuɔɔni ji̱ Ɛ-mor ŋot a /ke̱nɛ ni thuuk.”

¹⁷ Inɔ, mëë ci cäŋ ku kony guäth ëë ci ɣɔw kua̱ muth, nɛ̈nɛ jɛ, cu gua̱a̱th ri̱i̱ŋ tin kɔŋ tekɛ mi ce̱t kɛ tul dhar kɛnɛ mac mi bo̱l, kä kɛn re̱tkɛ kɛ där baakni le̱e̱yni tɔ̱tɔ̱.

¹⁸ Ni kɛ jɛn cäŋ ɛmɔ cu Kuoth Nhial guɔ̱k kɛ Ab-ram kä cuɛ jɛ jiök i̱, “Niɛ walɛ cä mun ɛmɛ ka̱m kuayku, a tɛmɛ ni kiir I-jëp a wëë kuɛr ni kiir Yu-pɛ-ree-tidh in di̱i̱t,

¹⁹ jɛn mun min mɔ mun ji̱ Kɛɛn kɛnɛ ji̱ Kɛ-nadh kɛ ji̱ Kadh-mon

²⁰ kɛnɛ ji̱ Ɣɛ̈th kɛ ji̱ Pɛ-rii-dhi kɛ ji̱ Rɛpa

²¹ kɛnɛ ji̱ Ɛ-mor kɛ ji̱ Kɛ-naan kɛ ji̱ Gir-gac amäni ji̱ Yɛ-buth.”