Tuk Cäkä Ɣɔaa 14 - RUAC KUƆTH IN RƐL RƆ

Luäk Ab-ram kɛ Lɔt

¹ Kɛ kɛn ni̱ni tɔ̱tɔ̱, tëë kɛ kua̱r rɛ̈kni da̱ŋ ŋuaan. Tin la Am-ra-pɛl kuäär Ci-nar, kɛ Ar-yok kuäär Ɛ-la-thar, kɛ Kɛ-dɔr-la-mɛr kuäär Ee-lam, kɛ Ti-dal kuäär Gɔ-yim.

² Kä nɛ̈nɛ jɛ, kɛn kua̱r rɛ̈kni tɔ̱tɔ̱ cukɛ ko̱r tɛr kɛ kua̱r rɛ̈kni da̱ŋ dhieec ti kɔ̱kiɛn. Nɛmɛ ɛ Bɛrä kuäär Thɔ-dɔm, kɛ Bir-cä kuäär Go-mo-ra, kɛ Ci-nab kuäär A-dɛ-ma, kɛ Cɛm-i-bɛr kuäär Dhɛ-bo-yim kɛnɛ kuäär Bɛlä, kä Bɛlä ɛmɔ cɔal kɛ jɛ Dho-ar.

³ Kɛn diaal cukɛ röm paan Thi-dim min la Bar milɛkä.

⁴ Ko̱riɛn ɛmɔ tookɛ rɔ inɛ. Kɛ run da̱ŋ wäl rɛw ci kua̱r rɛ̈kni da̱ŋ dhieec ti̱ti̱ yaak rut tetdä Kɛ-dɔr-la-mɛr. Kä kɛ ruɔ̱n in wäl diɔ̱ɔ̱kdiɛn cu kua̱r rɛ̈kni tɔ̱tɔ̱ rɔ̱ luɔ̱c jɛ.

⁵ Kä mëë cikɛ rɔ̱ luɔ̱c jɛ inɔ, jɛn cuɛ jiɛɛn kɛ ruɔ̱n in wäl ŋuaandiɛn, jɛn kɛnɛ kua̱r pëëkdɛ, kä cukɛ ji̱ Rɛpa kä A-cɛ-roth-ka-ra-nim kɛ ji̱ Dhudh kä Ɣam, kɛ ji̱ Eem kä Ca-we-kir-ya-tha-yim,

⁶ kɛnɛ ji̱ Ɣori rɛɛk päämni Ɛ-dɔm wä mak piny, kä cukɛ kɛ joc amäni Eel-pa-ran guäth in thiëëk kɛ därdɔaar.

⁷ Kɛ lunydiɛn jɔk, cukɛ ben kɛ Een-mic-pat min la Ka-dɛc, kä cukɛ ji̱ rööl Ä-ma-lek amäni ji̱ rööl Ɛ-mor tëë ciaŋkɛ A-dhɛ-dhun-ta-mar tiam kɛ ko̱r.

⁸ Ɛ jɛn cu kuäär Thɔ-dɔm kɛnɛ kuäär Go-mo-ra kɛ kuäär A-dɛ-ma kɛnɛ kuäär Dhɛ-bo-yim amäni kuäär Bɛlä min la Dho-ar wä nyiëëny täpä Thi-dim

⁹ kɛ Kɛ-dɔr-la-mɛr kuäär Ee-lam, kɛ Ti-dal kuäär Gɔ-yim, kɛ Am-ra-pɛl kuäär Ci-nar kɛnɛ Ar-yok kuäär Ɛ-la-thar. Kua̱r da̱ŋ dhieec cukɛ nyiëëny kɛ kua̱r da̱ŋ ŋuaan.

¹⁰ Ɛn guäth ɛmɔ ɛn pan Thi-dim litdɛ puɔl ti tekɛ tua̱k. Kä mëë ci Kɛ-dɔr-la-mɛr kua̱r da̱ŋ dhieec tɔ̱tɔ̱ tiam kɛ ko̱r, cu kuäär Thɔ-dɔm kɛnɛ kuäär Go-mo-ra rɔ̱ bar. Kä mëë barkɛ rɔ̱, cukɛ pɛn rɛy puɔ̱li tɔ̱tɔ̱ kä cukɛ cuit thi̱n, guäth in cu duɔth nath tin kɔ̱kiɛn rɔ̱ bar rɛy päämni.

¹¹ Kɛn kua̱r da̱ŋ ŋuaan cukɛ ŋɔak diaal tin te wi̱c Thɔ-dɔm kɛnɛ Go-mo-ra ma̱a̱t kä cua rɔ̱ ri̱t kɛ kɛ,

¹² kä naŋkɛ gat däman Ab-ram ni Lɔt kɛ kɛ kɛɛl, kɛn diaal amäni nyinkɛ, kɛ ɣöö ciɛŋɛ ni wec Thɔ-dɔm.

¹³ Ɛ jɛ nɔ, mëë ci ko̱r cu thuɔ̱k, cu ram kɛl mi ci kään ɛn guäth ko̱o̱r gat E-bɛr ni Ab-ram ben la̱r lär cieŋdɛ gekä jiɛn ran Ɛ-mor ni Ma-mɛ-ri. Kä Ma-mɛ-ri jɛn ɛ däman Ɛc-kol kɛnɛ A-ner, kä kɛn diaal kɛ ji̱ pëëk kɛ Ab-ram.

¹⁴ Kä mëë ci Ab-ram ɛ cu liŋ ɛn ɣöö ca gat däman pɛc, cuɛ wutni tin buɔ̱m buɔ̱ɔ̱m kuany rɛy nɛɛnikɛ tin tɔ̱ die̱e̱l thuɔk duëëlɛ, kɛ nɛy ti kur diɔ̱k wi̱cdiɛn jiath kɛl wi̱cdɛ bädäk, kä cuɛ ji̱ tɛ̈riɛn juɔc ni dhɔr in cɔal i̱ Daan.

¹⁵ Kä mëë cɛ cop, cuɛ nɛɛkɛ däk kä piny mëë wa̱r kä cuɛ ji̱ tɛ̈riɛn mak piny kɛ wäärdäär. Cuɛ kɛ däk, a joocɛ kɛ ni dhɔr in cɔal i̱ Oba min te nhiam kä Da-math-kɛth,

¹⁶ cuɛ ŋɔak diaal tëë ca pɛc ɣär tetnikiɛn, kä cuɛ gat däman ni Lɔt luɔ̱ɔ̱c jɔk kɛnɛ kuakɛ diaal, kä cuɛ män luɔ̱ɔ̱c bä amäni nɛy tin pɛ̈ɛ̈c tin kɔ̱ŋ.

Puɔ̱th Mal-ki-dhɛ-dɛk kɛ Ab-ram

¹⁷ Kä täämɛ mëë ci Ab-ram cu luny jɔk jucä Kɛ-dɔr-la-mɛr kɛnɛ kua̱r pëëkdɛ, cu kuäär Thɔ-dɔm jɛ lor lotdä Cawe min mɔ ta̱p paan kua̱r.

¹⁸ Ɛn guäth ɛmɔ te wut mi la kuäär Ca-lɛm thi̱n mi cɔal i̱ Mal-ki-dhɛ-dɛk, kä ɛ jɛn bo̱o̱th palä Kuɔth in di̱t ni jɛn. Ɛn Mal-ki-dhɛ-dɛk ɛmɔ cuɛ kɛ nöŋ mi̱eth kɛnɛ kɔaŋ.

¹⁹ Kä cuɛ rieet puthä ti̱ti̱ la̱t Ab-ram wëë i̱, “Ɛ Ab-ram ba poth ɛ Kuoth in di̱t ni jɛn, min la cääk nhial kɛnɛ piny.

²⁰ Ɛ liak tekɛ Kuoth in di̱t ni jɛn, jɛn ram in ci ji̱ tɛ̈ru joc!” Kä cu Ab-ram jɛ ka̱m kɛl kä wäl nyinikɛ diaal.

²¹ Kä niɛ wa̱nɔ, cu kuäär Thɔ-dɔm in di̱i̱t Ab-ram jiök i̱, “Lucni ɣä nɛɛkä diaal, kä cu ŋɔak diaal lɛ ka̱n ala nyinku.”

²² Kä duundɛ ɣöö cu Ab-ram ɛ loc i̱, “Cä Kuoth Nhial in di̱t ni jɛn kä ti diaal, min la Cääk nhial kɛnɛ piny pal, kä cä yac ɛpuc,

²³ ɛn ɣöö thilɛ duɔ̱ɔ̱r mi bä ka̱n rɛy nyinäku, cäŋ kuɛ la lath kiɛ la̱a̱k warä, kɛ ɣöö /ciɛ bi lɛ lar i̱ ci ɣä moc ria̱ŋ ɛ ji̱n.

²⁴ Thilɛ mi göörä kɛ kui̱dä ɛ ni min ci nɛɛkä jɛ cam, kɛnɛ kui̱c in lot rɔ kɛ nɛɛkä tin ca ɣä luäk kɛ ko̱r. Tho̱p ni kɛ kui̱diɛn, A-ner kɛnɛ Ɛc-kol kɛ Ma-mɛ-ri akɛ ka̱nkɛ kui̱diɛn.”