Tuk Cäkä Ɣɔaa 13 - RUAC KUƆTH IN RƐL RƆ

Däk Lɔt piny kɛn Ab-ram

¹ Täämɛ cu Ab-ram cu jiɛn ni kä I-jëp wädɛ pe̱e̱k wec in cɔal i̱ Nɛ-gɛb kä Kɛ-naan, cuɛ jiɛn kɛɛl kɛnɛ ciekdɛ, kä cuɛ nyinkɛ diaal naŋ kɛ jɛ kɛɛl, amäni Lɔt cuɛ wä bä kɛ jɛ kɛɛl.

² Kä jɛn Ab-ram tëë kɛ det ti ŋuan, kɛ ɣɔ̱k amäni ciɛk in bo̱r kɛnɛ da̱a̱p.

³ Cuɛ ja̱lɛ tok ni kä Nɛ-gɛb ɛ lɛm lɛm, wädɛ kä Beth-ɛl amäni mëë cɛ cop kam Beth-ɛl kɛnɛ Aay mëë mɔ gua̱a̱th ëë cɛ kɛmɛdɛ kɔŋ pua̱t thi̱n bä,

⁴ kä cɛ Kuoth kɔŋ ta̱th yi̱k thi̱n. Kä ɛn wi̱ni cu Ab-ram Kuoth Nhial pal.

⁵ Kä täämɛ jɛn Lɔt ëë jiɛc kɛɛl kɛnɛ Ab-ram tëë kɛ det bä kɛnɛ ɣɔ̱k matdiɛn amäni ji̱ cieeŋdɛ pa̱ny kɛ kuaanykɛ.

⁶ Ɛn wa̱nɛ mɔ, /ke̱n wal ro̱ŋ kɛ kui̱diɛn kɛn da̱ŋ rɛw kɛɛl, kɛ ɣöö tekɛ kɛ ɣɔ̱k ti ŋuan gua̱thnikiɛn diaal,

⁷ kɛnɛ ɣöö ciɛŋ yiëën ɣɔ̱ɔ̱kiɛn ni gak kamnikiɛn kä rɔ̱. Kɛn ni̱ni tɔ̱tɔ̱ dhɔr ɛmɔ cieŋni ji̱ rööl Kɛ-naan thi̱n kɛnɛ ji̱ rööl Pɛ-rii-dhi.

⁸ Ɛ jɛ nɔ cu Ab-ram Lɔt ku jiök i̱, “Thilɛ mi dënɛ gak, kiɛ mi dëë yiëën ɣɔ̱ɔ̱kä jɛ gak kɛnɛ yiɛɛn ɣɔ̱ɔ̱ku kɛ ɣöö kɔn lapnɛ gaat ciëk.

⁹ Täämɛ mun ɛ mi /cɛ te nhiamdu kɛɛliw? Mi wi̱i̱ wä mɛk ni pe̱k caam. Ɣän bä pe̱k cuëëc ka̱n, kä mi wi̱i̱ mɛk ni cuec bä cam ka̱n.”

¹⁰ Niɛ wa̱nɔ, cu Lɔt pan Jɔr-dɛn cu car ni kɛɛliwdɛ a wä räth ni Dho-ar, kä cuɛ jɛ nɛn ɛ mun ɣɔ̱ɔ̱k mi gɔaa ce̱tkɛ mun kakä Kuɔth Nhial kɛnɛ mun rööl I-jëp. Mɔmɔ ɛ mëë /ke̱n Kuoth Nhial wec Thɔ-dɔm kɛnɛ Go-mo-ra ni däk.

¹¹ Ɛ jɛ nɔ cu Lɔt pan Jɔr-dɛn ni kɛɛliwdɛ cu mëk rɔɔdɛ kä cuɛ cu ja̱l wee kui̱ käny ca̱ŋ. Cukɛ rɔ cu da̱a̱k inɔ,

¹² cu Ab-ram cieŋ rööl Kɛ-naan kä Lɔt cuɛ ciɛŋ ni kam rɛ̈kni paan Jɔr-dɛn. Cuɛ wee mi ɣo̱o̱thɛ kɛmɛnikɛ amäni mëë cɛ thia̱k kɛ Thɔ-dɔm.

¹³ Kä täämɛ ji̱ rööl Thɔ-dɔm kɛ nɛy ti ji̱ nyuɔɔni kä ŋuan dueerkiɛn ɛlɔ̱ŋ nhiam Kuɔth Nhial.

Ɣöth Ab-ram Ɣɛb-ron

¹⁴ Mëë ci Lɔt cu jiɛɛn, cu Kuoth Nhial Ab-ram ku jiök i̱, “Gui̱cni ɛ ɛn guäth ɛ ti̱i̱ cuŋä thi̱n ɛ amäni pe̱k ɔ bi luäŋ kɛ cuɔ̱p kɛ waŋdu mɔ, guic nhiamdu kɛ jɔkdu kä liɛc pe̱k ɔ wëë kä käny ca̱ŋ ɔ kɛnɛ pe̱k ɔ wëë kä kony ca̱ŋ ɔ,

¹⁵ kɛ ɣöö ɛn mun ɛ nɛɛni mi, ni kɛɛliwdɛ, bä jɛ ka̱m ji̱ yɛnɛ kuayku ala duundun amäni cäŋ kɛl.

¹⁶ Bä kuayku re̱p a bikɛ ŋuan ce̱tnikɛ tur piɛny in /ci raan ɛ dëë luäŋ kɛ kuën?

¹⁷ Jiɛcni kä wër jäl di̱t wec kɛnɛ bärɛ, kɛ ɣöö bä jɛ ka̱m ji̱.”

¹⁸ Ɛ jɛ nɔ, cu Ab-ram kɛmɛdɛ cu ɣöth kä cuɛ jɛ wä pua̱t gekä jiɛn Ma-mɛ-ri kä Ɣɛb-ron kä cuɛ Kuoth Nhial ta̱th yi̱k ɛn wi̱ni.