Tuk Cäkä Ɣɔaa 12 - RUAC KUƆTH IN RƐL RƆ

Ciöt Kuɔth kɛ Ab-ram

¹ Nɛ̈nɛ jɛ, täämɛ cu Kuoth Nhial Ab-ram ku jiök i̱, “Jiɛc rɔ ro̱o̱lu kɛnɛ watku kɛ thok duëël guur kä wër ro̱o̱l mi bä nyuɔ̱th ji̱.

² Bä do̱r mi di̱i̱t cak kɛ ji̱. Bä ji̱ poth kä bä kɛ̈kdu jak kä jɔc kɛ ɣöö bi naath nöŋ puɔ̱th.

³ Bä nɛy diaal tin puɔthkɛ ji̱ poth, kä bä tin diaal tin lamkɛ ji̱ lam. Kä döör diaal wi̱i̱ muɔ̱ɔ̱n baakɛ poth kɛ ciötdu.”

⁴ Min cɛ min ca la̱r jɛ ɛ Kuoth Nhial liŋ, cuɛ jiɛn ni kä kɛɛl, kä cu Lɔt wä kɛ jɛ kɛɛl. Kä mëë jiɛcɛ kä Ɣa-ran, Ab-ram runkɛ kɛ run ti jiɛn bärɔw wi̱cdɛ dhieec.

⁵ Kä cuɛ ciekdɛ ni Tha-ray naŋ kɛnɛ gat däman ni Lɔt kɛnɛ kuak diaal tëë la nyinkiɛn, kɛnɛ nɛy diaal tëë ci kɛn kɛ jëk rɔ kä Ɣa-ran, kä cukɛ tɛth raar a wäkɛ ro̱o̱l Kɛ-naan. Mëë cikɛ cu cop ɛn thɔ̱ŋi i̱,

⁶ cu Ab-ram rɛy wec cu luk a räth guäth jiaath Morɛ in di̱i̱t kä Cɛ-kɛm. Ɛn guäth ɛmɔ te ji̱ Kɛ-naan thi̱n ɛn wi̱c.

⁷ Ɛ jɛn cu Kuoth Nhial rɔ cu nyuɔ̱th Ab-ram kä cuɛ jɛ jiök i̱, “Bä wec ɛmɛ ka̱m kuayku.” Inɔ cu Ab-ram Kuoth Nhial in ci rɔ nyuɔ̱th jɛ ta̱th yi̱k.

⁸ Ɛn wi̱ni cuɛ ɣo̱th pe̱e̱k wec in te kä käny ca̱ŋ dhɔaar in cɔal i̱ Beth-ɛl, dhɔɔr in tekɛ bi̱eli, kä cuɛ kɛmɛdɛ pua̱t piny thi̱n, te Beth-ɛl kui̱ konyä ca̱ŋ kä te Aay kui̱ känyä ca̱ŋ. Kä ɛn wi̱ni cuɛ Kuoth Nhial ta̱th yi̱k kä cuɛ jɛ pal.

⁹ Kä cu Ab-ram ja̱lɛ cuɔ̱p ɛ lɛm lɛm wädɛ pe̱e̱k rööl Kɛ-naan in cɔal i̱ Nɛ-gɛb.

Ab-ram kä I-jëp

¹⁰ Kä mëë ci wec ku tekɛ buɔth mi di̱i̱t, cu Ab-ram rɔ bar ro̱o̱l I-jëp kɛ ɣöö bɛ wä cieŋ thi̱n ala ram mi duundɛ puɔt kɛ buɔth kɛ ɣöö ci buɔth di̱t.

¹¹ Mëë ci ku thia̱k ni ɣöö bɛ ro̱l I-jëp ŋäthikä, cuɛ ciekdɛ ni Tha-ray jiök i̱, “Täämɛ guic ɛ, ɣän ŋa̱cä jɛ ɛn ɣöö ɛ ji̱n ciekdä mi tekɛ maan.

¹² Kä mi wä ji̱ rööl I-jëp ji̱ wä nɛn, bikɛ jɛ cu lar i̱, ‘Mɛmɛ ɛ jɛn ciekdɛ,’ kä bikɛ ɣä cu näk, kä min te ni jɛn thi̱n bikɛ ji̱ päl a tëk.

¹³ Mal ɛ lar i̱ ɛ ji̱n nyimaar kɛ ɣöö dëë mal cu jek kɛ ji̱, kɛnɛ ɣöö dëë tëkdä kän kɛ kui̱du.”

¹⁴ Mëë ci Ab-ram coth rɛy rööl I-jëp cu ji̱ I-jëp Tha-ray nɛn ɛn ɣöö ɛ ciek mi tekɛ maan mi di̱i̱t.

¹⁵ Kä mëë ci kua̱r lätni Pɛro jɛ nɛn, cukɛ jɛ wä liëk gɔɔy ciek ɛmɔ, kä cua jɛ naŋ cieŋdɛ.

¹⁶ Kä cu Pɛro Ab-ram ciɛŋ ni gɔaa kɛ kui̱dɛ. Kä cuɛ rɔ jëk det kɛnɛ ɣɔ̱k kɛ tut muɔ̱li kɛ kuaany wutni kɛnɛ män kɛ ŋut muɔ̱li kɛnɛ thɔ̱a̱rɔa̱a̱li.

¹⁷ Kä nɛ̈nɛ jɛ, cu Kuoth Nhial Pɛro kɛnɛ ji̱ cieeŋdɛ moc kɛ riɛk mi di̱i̱t kɛ kui̱ ciëk Ab-ram ni Tha-ray.

¹⁸ Mëë ci riɛk ɛmɔ cop, cu Pɛro Ab-ram jäk kä raan kä cuɛ jɛ jiök i̱, “Ɛŋu ɛnɛ ci lät kä ɣä mi? Ɛŋu mi /keni ɣä jiök i̱ jɛn ɛ ciekdu mɔ?

¹⁹ Ɛŋu mëë laari jɛ i̱ ɛ nyimaar? Kɛ kui̱c ɛmɔ cä jak kä ciekdä. Kä täämɛ, ciekdu mɔn, naŋ ɛ kä wër.”

²⁰ Kä cuɛ jɛ kuëny wutni ti ba jɛ nam kɛnɛ ciekdɛ kɛ nyinkɛ diaal.