Tuk Cäkä Ɣɔaa 11 - RUAC KUƆTH IN RƐL RƆ

Luak Ba-bɛl in bäär

¹ Ɛn wa̱nɔ nɛy diaal wi̱i̱ muɔ̱ɔ̱n la ruackɛ kɛ thok kɛl.

² Kä mëë ci naath ɣöth kui̱c känyä ca̱ŋ cukɛ dhɔr mi car car jek ro̱o̱l Ci-nar, cukɛ cu cieŋ thi̱n.

³ Kä cukɛ cu ruac kamnikiɛn i̱, “Bia, ta̱thnɛ rɔ tuɔpni kä banɛ kɛ cu bul.” Kä cukɛ duëlkiɛn täth kɛ tuɔpni kɛnɛ mun in la ruɛ̈thkɛ ni duël.

⁴ Ɛ jɛn, cukɛ cu wee i̱, “Bia, kuanɛ rɔ ben lät kä wec kɛnɛ luak mi bäär mi bi wi̱cdɛ cop ni puɔ̱rä. Banɛ rɔ̱ moc kɛ kɛ̈k kɛ ɣöö /canɛ bi̱lɛ riaw rɛy ɣɔaa.”

⁵ Ni ɛn wa̱nɔ cu Kuoth Nhial ben piny kɛ ɣöö bɛ wec kɛnɛ luak ëë ci naath ɛ täth ben gui̱l.

⁶ Kä mëë cɛ jɛ ben nɛn, cuɛ cu wee i̱, “Nɛ̈nɛ jɛ, kɛn kɛ nɛy ti do̱r kɛl, kä kɛn diaal ruackɛ kɛ thok kɛl. Kä nɛmɛ ɛ jɛn tuk lätnikiɛn tin bi tuɔɔk, kä thilɛ mi bi kɛ lɛ dhal.

⁷ Kuanɛ wä, banɛ thukiɛn wä nyon a /ca rɔ̱ bi̱lɛ liŋ kamnikiɛn.”

⁸ Ɛn wi̱ni cu Kuoth Nhial kɛ cu riaw kä rɛy ɣɔaa kɛɛliw, kä cukɛ la̱t wecdiɛn päl.

⁹ Kɛ kui̱ ɛmɔ cua wec ɛmɔ cɔl i̱ Ba-bɛl kɛ ɣöö ɛ jɛn gua̱a̱th ëë ci Kuoth Nhial ji̱ wec muɔ̱ɔ̱n diaal thukiɛn nyon thi̱n. Kä niɛ wi̱ni cu Kuoth Nhial kɛ jak kä bikɛ däk rɛy ɣɔaa kɛɛliw.

Gaat Cɛm

¹⁰ Täämɛ, ti̱ti̱ kɛ gaat Cɛm. Kɛ kɔr kä mëë ci nyɔc thuuk kɛ kɔr runi da̱ŋ rɛw, guäth ëë ci Cɛm runkɛ a run ti kuɔ̱r kɛl, cuɛ Ar-pak-cad di̱eth.

¹¹ Kɛ kɔr däpä Ar-pak-cad cu Cɛm te te̱e̱kä kɛ run ti kur dhieec kɔ̱kiɛn, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

¹² Guäth ëë ci Ar-pak-cad tekɛ run ti jiɛn diɔ̱k wi̱cdɛ dhieec cuɛ Cɛla di̱eth.

¹³ Kä kɛ kɔr däpä Cɛla cu Ar-pak-cad te te̱e̱kä kɛ run ti kur ŋuaan wi̱cdɛ diɔ̱k, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

¹⁴ Mëë ci Cɛla runkɛ a run ti jiɛn diɔ̱k cuɛ E-bɛr di̱eth.

¹⁵ Kä kɛ kɔr däpä E-bɛr cu Cɛla te te̱e̱kä kɛ run ti kur ŋuaan wi̱cdɛ diɔ̱k, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

¹⁶ Mëë ci E-bɛr runkɛ a run ti jiɛn diɔ̱k wi̱cdɛ ŋuaan cuɛ Pɛ-lɛg di̱eth.

¹⁷ Kä kɛ kɔr däpä Pɛ-lɛg cu E-bɛr lɛni te te̱e̱kä kɛ run ti kur ŋuaan wi̱cdɛ jiɛn diɔ̱k, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

¹⁸ Mëë ci Pɛ-lɛg runkɛ a run ti jiɛn diɔ̱k cuɛ Riw di̱eth.

¹⁹ Kä kɛ kɔr däpä Riw cu Pɛ-lɛg lɛni te te̱e̱kä kɛ run ti kur da̱ŋ rɛw wi̱cdɛ bäŋuan, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

²⁰ Mëë ci Riw runkɛ a run ti jiɛn diɔ̱k wi̱cdɛ rɛw cuɛ Thɛ-rug di̱eth.

²¹ Kä kɛ kɔr däpä Thɛ-rug cu Riw lɛni te te̱e̱kä kɛ run ti kur da̱ŋ rɛw wi̱cdɛ bärɔw, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

²² Mëë ci Thɛ-rug runkɛ a run ti jiɛn diɔ̱k cuɛ Na-ɣor di̱eth.

²³ Kä kɛ kɔr däpä Na-ɣor cu Thɛ-rug lɛni te te̱e̱kä kɛ run ti kur da̱ŋ rɛw ɛgi̱m, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

²⁴ Mëë ci Na-ɣor runkɛ a run ti jiɛn da̱ŋ rɛw wi̱cdɛ bäŋuan cuɛ Tɛra di̱eth.

²⁵ Kä kɛ kɔr däpä Tɛra cu Na-ɣor lɛni te te̱e̱kä kɛ run ti kuɔ̱r kɛl wi̱cdɛ jiath kɛl wi̱cdɛ bäŋuan, kä cuɛ dhɔɔl kɛnɛ nyi̱er kɔ̱kiɛn lɛni di̱eth.

²⁶ Mëë ci Tɛra runkɛ a run ti jiɛn bärɔw cuɛ Ab-ram di̱eth kɛnɛ Na-ɣor kɛ Ä-ran.

Gaat Tɛra

²⁷ Täämɛ ti̱ti̱ kɛ kɛn gaat Tɛra. Tɛra cuɛ Ab-ram di̱eth kɛnɛ Na-ɣor kɛ Ä-ran. Kä cu Ä-ran Lɔt di̱eth.

²⁸ Cu kɔŋ li̱w ni Ä-ran kä gua̱n ni Tɛra dhɔɔr ëë diëthkɛ jɛ thi̱n ni Ur rööl Kɛ̈l-da-ya.

²⁹ Kä cu Ab-ram kɛnɛ Na-ɣor kuɛɛn. Cu ciek Ab-ram a Tha-ray, kä cu ciek Na-ɣor a Mil-ka nyiman Ith-ka tin la nyiee Ä-ran.

³⁰ Duundɛ ɣöö, cu Tha-ray a rol.

³¹ Ɛ jɛn, cu Tɛra gatdɛ ni Ab-ram naŋ kɛnɛ gat döödɛ ni Lɔt gat Ä-ran, kɛ Tha-ray ciek gatdɛ ni Ab-ram, kä cuɛ jiɛɛn ni kɛɛl kɛ kɛ kä Ur ro̱o̱l Kɛ̈l-da-ya wä kɛ ro̱o̱l Kɛ-naan. Ku duundɛ la ɣöö mëë cikɛ cop ro̱o̱l Ɣa-ran cukɛ cieŋ ɛn wi̱ni.

³² Cu ni̱n te̱e̱kä Tɛra a run ti kur da̱ŋ rɛw wi̱cdɛ dhieec, kä cuɛ cu li̱w ro̱o̱l Ɣa-ran.