Tuk Cäkä Ɣɔaa 10 - RUAC KUƆTH IN RƐL RƆ

Gaat gan Nowa

¹ Täämɛ ti̱ti̱ kɛ kɛn ciööt gan Nowa ni Cɛm kɛ Ɣɛ̈m kɛ Ya-pɛth tëë ci kɛn kɛ di̱eth kɛ kɔr nyɔac.

² Gaat Ya-pɛth kɛn ti̱n, Go-mɛr kɛ Ma-gog kɛ Ma-dhay kɛ Ya-wan kɛ Tu-bal kɛ Mɛ-cɛk kɛ Ti-rath.

³ Go-mɛr gaatkɛ kɛ Ac-kä-nadh kɛnɛ Ri-path kɛ To-gar-ma.

⁴ Kä Ya-wan gaatkɛ kɛ Ɛ-li-ca kɛ Tar-cic kɛ Ki-tim kɛ Ro-da-nim.

⁵ Tɔ̱tɔ̱ kɛ kɛn diëëth nɛɛni tin ciaŋkɛ ni gëk bäpdiit. Tɔ̱tɔ̱ kɛ kɛn pek gan Ya-pɛth rölikiɛn kɛ ciëëŋkiɛn kɛ döörikiɛn kɛ thukiɛn ti gööl.

⁶ Gaat Ɣɛ̈m ti̱n, Kuc kɛ I-jëp kɛnɛ Put kɛ Kɛ-naan.

⁷ Cu gaat Kuc a Thɛba kɛnɛ Ä-wi-la kɛ Thab-ta kɛnɛ Rɛɛma kɛ Thab-tä-ka. Cu gaat Rɛɛma a Cɛba kɛnɛ Dɛ-dan.

⁸ Kä cu Kuc Nim-rɔd di̱eth, kä cuɛ la jio̱l nɛɛni tëë bum ni kɛn ɛlɔ̱ŋ wi̱i̱ muɔ̱ɔ̱n.

⁹ Cu Nim-rɔd a kääk le̱e̱ni mi lia̱a̱ nhiam Kuɔth Nhial. Ɛ jɛn ɛ ni̱n la wa i̱, “Päärɛ kɛ Nim-rɔd mëë mɔ kääk le̱e̱ni mi lia̱a̱ nhiam Kuɔth Nhial.”

¹⁰ Cu wi̱i̱ tëë ruaacɛ rɔ lɔth ni rɛɛk Ba-bɛl kɛ Ɛ̈-rɛk kɛnɛ A-kad, te kɛn diaal rɛy rööl Ci-nar.

¹¹ Cuɛ jiɛɛn ɛn ro̱o̱l ɛmɔ kä cuɛ wä ro̱o̱l A-thi-ri-ya, kä cuɛ Ni-nɛ-be täth kɛ Rɛ-böth-ir kɛ Kala

¹² kɛ Rɛ-thɛn kam Ni-nɛ-be kɛnɛ Kala, min la rɛk in di̱t ni jɛn.

¹³ Cu I-jëp Lu-dim di̱eth kɛnɛ Ä-na-mim kɛ Lɛɛ-bim kɛnɛ Nap-tu-im,

¹⁴ kɛ Pa-ru-thim, kɛ Ka-thä-lim kɛnɛ Ku-riit kɛ min mɔ gua̱ndɔɔŋ ji̱ Pi-li-thɛt.

¹⁵ Gaat Kɛ-naan kɛ Dhi-don min la gatdɛ min kɛ̱̈ɛ̱̈ kɛnɛ Ɣɛ̈th,

¹⁶ kä cu Kɛ-naan a gua̱ndɔɔŋ ji̱ Yɛ-buth kɛ ji̱ Ɛ-mor kɛ ji̱ Gir-gac

¹⁷ kɛ ji̱ Iwi kɛ ji̱ Arka kɛ ji̱ Thiin

¹⁸ kɛ ji̱ Ar-wad kɛ ji̱ Dhɛ-mar kɛnɛ ji̱ Ä-math. Kɛ gua̱a̱th ëë wä nhiam cu thuk duëli gan Kɛ-naan rɔ däkä piny

¹⁹ a cu pe̱k këth dhɔaariɛn rɔ lɔth ni kä Dhi-don a wä nikä Gɛ-raar a räth ni Gadha, kä a lɛnɛ nikä Thɔ-dɔm kɛnɛ Go-mo-ra kɛ A-dɛ-ma kɛnɛ Dhɛ-bo-yim a räth ni Laca.

²⁰ Tɔ̱tɔ̱ kɛ kɛn gaat Ɣɛ̈m kɛ rölikiɛn kɛ ciëëŋkiɛn kɛ dho̱rikiɛn kɛ thukiɛn ti gööl.

²¹ Kä Cɛm däman Ya-pɛth in di̱i̱t cuɛ lɛni tekɛ gaat, kä ɛ jɛn gua̱ndɔɔŋ gan E-bɛr diaal.

²² Gaat Cɛm kɛ kɛn Ee-lam kɛ A-cur kɛ Ar-pak-cad kɛ Lud kɛnɛ Ä-ram.

²³ Cu gaat Ä-ram a Udh kɛ Ɣul kɛ Gɛ-thɛr kɛnɛ Mac.

²⁴ Cu Ar-pak-cad a gua̱n Cɛla, kä cu Cɛla E-bɛr di̱eth.

²⁵ Cu E-bɛr gaat da̱ŋ rɛw di̱eth, gat kɛl cɔalɛ Pɛ-lɛg kɛ ɣöö ni̱nikɛ cua naath diaal däk gööli wi̱i̱ muɔ̱ɔ̱n, kä cu ciöt däman a Yɔk-tan.

²⁶ Cu Yɔk-tan Al-mo-dhad di̱eth kɛnɛ Cɛ-lɛp kɛ Ä-dhar-ma-wɛth kɛ Yara

²⁷ kɛ Ä-do-ram kɛ U-dhal kɛ Diik-la

²⁸ kɛ O-bal kɛ Ä-bi-meel kɛ Cɛba

²⁹ kɛ O-për kɛ Ä-wi-la kɛnɛ Yo-bab. Kɛn tɔ̱tɔ̱ diaal kɛ kɛn gaat Yɔk-tan.

³⁰ Kä cu gua̱a̱th ëë cikɛ cieŋ thi̱n rɔ lɔth ni kä Meca min wä Thɛ-par a räth päämni lotdä känyä ca̱ŋ.

³¹ Tɔ̱tɔ̱ kɛ kɛn gaat Cɛm rölikiɛn kɛ ciëëŋkiɛn dho̱rkiɛn kɛ thukiɛn ti gööl.

³² Ti̱ti̱ kɛ kɛn gaat Nowa kɛ kɔr nyɔac kɛ pe̱k karikiɛn kɛnɛ dho̱rkiɛn. Kä kɛ cu döör wec muɔ̱ɔ̱n diaal rɔ di̱eth kɛ kɔr nyɔac.