Ɛdhra 9 - RUAC KUƆTH IN RƐL RƆ

Pal Ɛdhra kɛ kui̱ kuen juri

¹ Kɛ kɔr kä min ca ti̱ti̱ la̱t, cu bööth ben kä ɣä wäkɛ i̱, “/Ken ji̱ I-thɛ-rɛl kɛ bööth palä kɛ ji̱ Lii-bay rɔ̱ lɛy kä ji̱ wec kɛnɛ lätkiɛn tin jiäk, ji̱ Kɛ-naan, kɛnɛ ji̱ Ɣɛ̈th, kɛ ji̱ Pɛ-rii-dhi, kɛnɛ ji̱ Yɛ-buth, kɛ ji̱ Am-on, kɛnɛ ji̱ Mo-ab, kɛ ji̱ I-jëp, kɛ ji̱ Ɛ-mor.

² Cikɛ nyieet nɛɛni tɔ̱tɔ̱ kuen rɔ̱ kɛnɛ gaatkiɛn. Kɛ kui̱c ɛmɔ ci nɛy ti gɔw rɔ̱ mat kɛ ji̱ wec. Kä ɛn thil ŋäthä nɛmɛ bëë kä bööth kɛnɛ ruëëc.”

³ Kä mëë cä nɔmɔ liŋ, cua̱ bieynikä rɛ̈t kɛ kɛ̈c, kä cua̱ miem wecdä yut kɛnɛ ti̱kdä, kä cua rɔ gul kɛ jiath lɔaac.

⁴ Kä cu nɛy diaal tin dual kɛ riet Kuɔth I-thɛ-rɛl rɔ dol gekädä kɛ kui̱ thil ŋäthä nɛɛni tin luny jɔk pe̱cä. Kä cua rɔ gul kɛ jiath lɔaac cu mäni gua̱th in la thöpkɛ muc thiaŋ.

⁵ Kä kɛ gua̱th mucni thiaŋ cua̱ rɔ jiɛc thekädä kɛ bieynikä ti ci rɛ̈t, kä cua rɔ ka̱m mua̱a̱l palä Kuoth Nhial Kuothdä

⁶ wa̱a̱ i̱, “Aɣ Kuothdä, ɣän pöcä kä jiɛth lɔcdä kɛ ɣöö bä ji̱ pal, Kuothdä, kɛ ɣöö dueerkɔ ca wi̱cda leny, kä cikɛ pal ni pua̱a̱r.

⁷ Ni kä gua̱nikɔ cu mäni walɛ di̱t dueerkɔ. Kä kɛ kui̱ dueerikɔ, kɔn kɛ kua̱rkɔ, kɛ bööth paläda, ca nɛy la̱th tetni kua̱r wec, ca nɛy pɛc kä ca nɛy näk, kä ca nɛy ciɛŋ ɛ jiäk, cu mäni walɛ.

⁸ Kä täämɛ kɛ gua̱th mi tɔt cu Kuoth Nhial Kuothdan kɔn nyuɔ̱th mal. Kɛ ɣöö banɛ tekɛ tëk, kä bɛ kɔn moc lo̱c guäthdɛ min rɛl rɔ, inɔ bi Kuothdan wäŋkɔn mɛr kä bɛ kɔn moc tëk mi tɔt rɛy yieenädan.

⁹ Cäŋ ni mëë kɛ kɔn ja̱a̱ŋ /ken Kuothdan kɔn päl rɛy yieenädan. Cɛ kɔn nyuɔ̱th nhök mi thil pek nhiam kua̱ri Pa-rath. Kä cɛ kɔn ka̱m tëk kɛ ɣöö banɛ luak Kuɔthdan nyɔk kɛ ta̱th, kä ba gua̱th tin ci da̱k bany, kä banɛ ka̱n cu jek kä Juda kɛnɛ Jɛ-ru-tha-lɛm.

¹⁰ “Kä täämɛ lö Kuothda ɛŋu mi ba̱kɔ ku lɛ lar kɛ kɔr kä nɛmɛ? Kɛ ɣöö ca̱kɔ luëëku lo̱k,

¹¹ tëë ci ŋun kɛ ja̱a̱ŋku ni go̱o̱k mëë wi̱i̱ i̱, ‘Ɛn mun ɛ wiaa thi̱n ɛ bia wä ciɛŋɛ, ɛ mun mi ca ya̱r ɛ nɛy tin cieŋ thi̱n, kɛ lätkiɛn tin jiäk. Ci kɛn ɛ thiäŋ kɛ lät jiäkiɛn kui̱ni diaal.

¹² Kɛ kui̱c ɛmɔ /cuarɛ nyieetkun kuen gaatkiɛn, kä /cuarɛ nyieetkiɛn kuen gaatkun. Kä /cuarɛ maliɛn go̱r kɛnɛ gɔykiɛn, kɛ ɣöö bia buɔ̱m, camɛ gɔy muɔ̱ɔ̱n, kä ba̱nyɛ jɛ gaatkun ala duŋdiɛn mi do̱raar.’

¹³ Kä mi ci tuɔɔk kä kɔnɛ, ɛ luɔt lätnikɔn tin jiäk kɛnɛ dueran in di̱i̱t, kä ŋotdɛ Kuothdan cɛ kɔn duäc kɛ duäc mi kuiyni jɛn kä min dënɛ jek kɛ kui̱ dueerikɔn, kä cɛ kɔn moc tëk mi ce̱tkɛ nɛmɛ.

¹⁴ A bakɔ ŋuɔ̱tku ku nyɔk kɛ lo̱k a ba̱kɔ rɔ wä mat kɛ nɛy ti la̱tkɛ ti jiäk ti? Kä bi ku gaak kɛ nɛy a bi kɔ däk, a bakɔ thil duɔth kiɛ ti bi tëk?

¹⁵ Aɣ Kuoth Nhial ni Kuoth I-thɛ-rɛl, ɛ ji̱n Kuoth mi thuɔ̱k, kɛ ɣöö ca̱kɔ duɔth ɛn walɛ a tëk. Kä täämɛ kɔn ta̱kɔ nhiamdu nikɛ dueerkɔ, kɛ ɣöö thilɛ ram mi dee cuɔ̱ŋ nhiamdu kɛ kui̱ nɛmɛ kä.”