Ɛdhra 8 - RUAC KUƆTH IN RƐL RƆ

Ciööt nɛɛni te bä pe̱cä kɛɛl kɛ Ɛdhra

¹ Cu ti̱ti̱ a bööth dho̱ri kɛnɛ nɛy tëë ca gɔ̱r kɛɛl kɛ kɛ tëë bä kɛɛl kɛ ɣä kä Bɛ̈-bi-lɔn mëë ruec ni kuäär ni Är-tɛ̈k-cɛ̈th-tɛ.

² Kä kuay Pi-nɛ-ɣath cua Ger-com, kä kuay I-ta-mar cua Da-ni-yel, kä kuay Dee-bid cua Ɣä-tuc.

³ Kä kuay Cɛ-kɛ̈n-yaa, kä kuay Pɛ̈r-oc cua Dhɛ-kar-yaa, kä cua gɔ̱r kɛɛl kɛ nɛy ti kuɔ̱r wi̱cdɛ jiɛn dhieec.

⁴ Kä kuay Pɛ̈-ɣɛ̈th-mo-ab cua Ɛl-ɣɛ-ɣo-e-nay gat Dhɛ-rɛ̈-yaa kɛɛl kɛ nɛy ti kur rɛw.

⁵ Kä kuay Dhɛ̈tu cua Cɛ-kɛ̈n-yaa gat Yä-dhi-el kɛɛl kɛ nɛy ti kur diɔ̱k.

⁶ Kä kuay A-din, cua Ɛ-bɛd gat Jo-na-than kɛɛl kɛ nɛy ti jiɛn dhieec.

⁷ Kä kuay Ee-lam, cua Yɛ-cɛ̈-yaa gat Ä-thɛ̈l-yaa kɛɛl kɛ nɛy ti jiɛn bärɔw.

⁸ Kä kuay Cɛ-pɛ̈t-yaa, cua Dhɛ-bɛ̈d-yaa gat Mi-ka-el kɛl kɛɛl kɛ nɛy ti jiɛn bädäk.

⁹ Kä kuay Yo-ab, cua O-bad-yaa gat Yɛ-ɣi-el kɛɛl kɛ nɛy ti kur rɛw wi̱cdɛ nɛɛ wäl bädäk.

¹⁰ Kä kuay Bani cua Cɛ-lo-mith gat Yo-thip-yaa kɛɛl kɛ nɛy ti kuɔ̱r wi̱cdɛ jiɛn bäkɛl.

¹¹ Kä kuay Be-bay, cua Dhɛ-kar-yaa gat Ɣɛ̈-ka-tan kɛɛl kɛ nɛy ti jiɛn rɛw wi̱cdɛ bädäk.

¹² Kä kuay Ɛ̈dh-gad, cua Yo-ɣa-nan gat Ɣɛ̈-ka-tan kɛɛl kɛ nɛy ti kuɔ̱r wi̱cdɛ nɛɛ wäl.

¹³ Kä kuay Ä-do-ni-kam min jɔak kä cɔalkɛ, ciötdɛ Ɛ-li-pa-lɛt, cua Yɛ-i-el kɛnɛ Cɛ-mɛ̈-yaa kɛɛl kɛ nɛy ti jiɛn bäkɛl.

¹⁴ Kä kuay Big-way, cua U-thay kɛnɛ Dha-kur kɛɛl kɛ nɛy ti jiɛn bärɔw.

Kuɔ̱m Ɛdhra kɛ ji̱ Lii-bay kɛ kui̱ la̱t luaak Kuɔth

¹⁵ Kä cua̱kɛ mat thok kiɛɛr in lo̱ny pi̱kɛ kä Ɛ̈-ɣäwa, kä cuakɔ pua̱t thi̱n kɛ ni̱n diɔ̱k. Kä mëë cä naath car kɛ bööth palä, cuɛ thil raan ji̱ Lii-bay mi cua̱ jek thi̱n.

¹⁶ Kä cua Ɛ-li-dhɛr, kɛnɛ Ä-ri-yel, kɛ Cɛ-mɛ̈-yaa, kɛnɛ Ɛl-na-than-ya-rib, kɛ Ɛl-na-than, kɛnɛ Na-than, kɛ Dhɛ-kar-yaa, kɛnɛ Mɛ-cu-lam bööth nath, kɛ Yo-ya-rib kɛnɛ Ɛl-na-than tin la ji̱ ŋi̱i̱cä, cua̱kɛ cɔl.

¹⁷ Kä cua̱kɛ jäk kä Ido min la bo̱o̱th kä Ka-thip-yaa, kä cuakɛ la̱r min ba wä la̱r Ido kɛnɛ gaat man la̱a̱t luaak Kuɔth kä Ka-thip-yaa, kɛ ɣöö ba nɛy jäk kä nɛy ti bi ben lät rɛy luaak Kuɔth.

¹⁸ Kɛ ɣöö te Kuothda kɛɛl kɛ nɛy, cua nɛy nöŋ Ce-reb-yaa mi luäŋ la̱t kä kuay Mɛ̈k-li gat Lii-bay, gat I-thɛ-rɛl, kɛ gaat Ce-reb-yaa kɛ gaat mani nɛɛ wäl bädäk.

¹⁹ Kɛ Ɣä-cɛ̈b-yaa kɛɛl kɛnɛ Yɛ-cɛ̈-yaa kä kuay Mɛ-ra-ri kɛ ji̱ maarädiɛn kɛ gaatkiɛn cukɛ a nɛy ti jiɛn rɛw.

²⁰ A /ci nɛy ti kur rɛw wi̱cdɛ jiɛn da̱ŋ rɛw tin la la̱a̱t luaak Kuɔth te thi̱n, tëë ci Dee-bid kɛnɛ ji̱ kɔarɛ kɛ la̱th go̱lä kɛ ɣöö ba ji̱ Lii-bay luäk. Kä ca kɛn diaal gɔ̱r ciöötni.

Böth Ɛdhra kɛ naath thek kɛnɛ pal

²¹ Ɛn wi̱ni thok Kiɛɛr Ɛ̈-ɣäwa, cua ɣöö ba̱kɔ thɛɛk lat, kɛ ɣöö ba̱kɔ rɔ̱ luɔc piny nhiam Kuɔthda, kɛ ɣöö ba̱kɔ mal thiec kä jɛ kɛ kui̱da, kɛnɛ gaatkɔ, kɛ kuakɔ diaal.

²² Kɛ ɣöö dualä, bä kuäär thiec kɛ rɛm kɛnɛ jiöŋkööri kɛ ɣöö dëë nɛy gaŋ kä ji̱ tɛ̈r rɛy duɔ̱pda. Kä cuakɔ kuäär jiök i̱, “Te Kuothda kɛɛl kɛ nɛy diaal tin görkɛ jɛ, kä te kɛ̈cdɛ kɛ nɛy tin lökɛ jɛ.”

²³ Inɔ cuakɔ thɛɛk kä cuakɔ Kuothda pal kɛ kui̱ kä nɛmɛ, kä cuɛ pala liŋ.

Muc kɛ kui̱ luaak Kuɔth

²⁴ Ɛ jɛn cua̱ bööth palä da̱ŋ wäl rɛw la̱th go̱lä. Ce-reb-yaa, kɛnɛ Ɣä-cɛ̈b-yaa, kɛɛl kɛ ji̱ maarädiɛn da̱ŋ wäl.

²⁵ Kä cuakɛ ka̱m ciɛk in bo̱r kɛnɛ da̱a̱p kɛ kuak tëë ci kuäär kɛnɛ luëëkɛ kɛ ji̱ kɔarɛ kɛ ji̱ I-thɛ-rɛl diaal ɛ ŋun kɛ kui̱ luaak Kuɔth.

²⁶ Cuakɛ ka̱m ciɛk in bo̱r mi te ki̱luni ti kur diɔ̱k wi̱cdɛ dhieec kɛ nuth, kɛnɛ kuakɛ ti te ki̱luni ti jiɛn ŋuaan wi̱cdɛ dhieec kɛ nuth, kɛ da̱a̱p mi tëë ki̱luni ti jiɛn ŋuaan wi̱cdɛ dhieec kɛ nuth,

²⁷ kɛ took dääpä ti jiɛn da̱ŋ rɛw ti tëë ki̱luni bädäk kɛ nuth, kɛ kuak cikä min yian da̱ŋ rɛw ti gɔw ce̱tkɛ da̱a̱p.

²⁸ Kä cua̱kɛ jiök i̱, “Rɛl yɛn rɔ̱ kä Kuoth Nhial, kä rɛl kuak rɔ̱. Kä ciɛk in bo̱r kɛnɛ da̱a̱p kɛ muc tɛthkä lɔaac kä Kuoth Nhial Kuoth guuri.

²⁹ Guɛcɛ kɛ kä tiɛtdɛ kɛ mäni mi ciakɛ thɛm nhiam bööthni palä tin di̱t kɛnɛ ji̱ Lii-bay kɛ bööth thukni duëli I-thɛ-rɛl kä Jɛ-ru-tha-lɛm, rɛy duëli luaak Kuɔth Nhial.”

³⁰ Inɔ cu bööth palä kɛ ji̱ Lii-bay ciɛk in bo̱r kɛnɛ da̱a̱p kɛ kuak ka̱n, kä cukɛ kɛ nööŋ rɛy luaak Kuɔth kä Jɛ-ru-tha-lɛm.

Loc kä Jɛ-ru-tha-lɛm

³¹ Kä cuakɔ däk piny kɛ cäŋ kä wäl rɛw kä pay in jio̱liɛn jɔk Kiɛɛr Ɛ̈-ɣäwa, wa̱kɔ kä Jɛ-ru-tha-lɛm. Kä te Kuothda kɛɛl kɛ nɛy, cuɛkɔ kän kä ji̱ tɛ̈r kɛnɛ nɛy tëë cakɔ nyurikä dup.

³² Cuakɔ ben tekɛ ni̱n diɔ̱k kä Jɛ-ru-tha-lɛm.

³³ Kɛ ŋuaan ni̱ni, cua ciɛk in bo̱r kɛnɛ da̱a̱p kɛ kuak la̱th tetdä bo̱o̱thä palä ni Mɛ-re-moth gat U-ri-yaa rɛy luaak Kuɔth, tëë kɛɛl kɛnɛ Ɛl-a-dhar gat Pi-nɛ-ɣath, kä te ji̱ Lii-bay kɛɛl kɛ kɛ, ala Yo-dha-bad gat Yɛ-cuwä gat No-ɛ̈d-yaa gat Bi-nuwi.

³⁴ Kä cua ti diaal kuɛn kɛ pekdiɛn kä cuakɛ thɛm, kä cua themdiɛn gɔ̱a̱r piny.

³⁵ Ɛn guäth ɛmɔ cu nɛy tëë luny jɔk pe̱cä muc in waŋkɛ thöp Kuoth I-thɛ-rɛl, thääk wäl rɛw kɛ kui̱ ji̱ I-thɛ-rɛl diaal, kɛ dɛy deet ti jiɛn bäŋuan wi̱cdɛ bärɔw, kɛ rueeth deet ti jiɛn bärɔw wi̱cdɛ bärɔw, kɛ thääk deet böwni da̱ŋ wäl rɛw kɛ kui̱ dui̱rä. Cuakɛ thöp kɛn diaal ala muc mi wa̱ŋkɛ Kuoth Nhial.

³⁶ Kä cukɛ warɛgak ruac kua̱r ka̱m bööth kɛnɛ ruëëc tin te kui̱ Yiëër Yu-pɛ-ree-tidh. Kä cukɛ naath luäk kɛ ta̱th luak Kuɔth.