Ɛdhra 6 - RUAC KUƆTH IN RƐL RƆ

Nyɔak jek ruac Ko-rɛc

¹ Ɛ jɛn cu kuäär ni Dɔr-ya-wɛc ruac lar, kä cu naath wä go̱r kä Bɛ̈-bi-lɔn, duëël in la warɛgakni kumɛ a tɔ̱a̱wkɛ thi̱n.

² Kä cua warɛgak jek kä Ɛ̈k-bɛ-tana wec in di̱i̱t in te kä Ma-day, kä mɛmɛ ɛ min ca gɔ̱r thi̱n wëë i̱,

³ “Kɛ ruɔ̱n ruec kua̱r ni Ko-rɛc in nhiam, cu kuäär ni Ko-rɛc ruac lar kɛ kui̱ luaak Kuɔth kä Jɛ-ru-tha-lɛm, ɛn ɣöö ɛ luak Kuɔth nyɔakɛ kɛ ta̱th, ɛn gua̱a̱th in la muc a thöpkɛ thi̱n, kä thöpkɛ muc tin waŋkɛ thi̱n. Kä bi bärɛ a jua̱th tetni ti jiɛn bäkɛl, kä bi ɣäp ɣääpdɛ a jua̱th tetni ti jiɛn bäkɛl,

⁴ kɛɛl kɛ bëër päämni ti di̱t da̱ŋ diɔ̱k kɛ ber jiɛn kɛl. Kä a yio̱wkɛ yuɔrkɛ piny kä yio̱w kumɛ.

⁵ Kä ɛ da̱a̱p kɛnɛ kuak cikä min bo̱r nyin luaak Kuɔth, tëë ca ka̱n ɛ Nɛ-bu-kad-nɛ-dhar luaak Kuɔth in te kä Jɛ-ru-tha-lɛm, kä cɛ nööŋ kä Bɛ̈-bi-lɔn, akɛ luɔckɛ luaak Kuɔth kä Jɛ-ru-tha-lɛm, ɛ mɔ luɔckɛ guäthdɛ. La̱thɛ kɛ rɛy luaak Kuɔth.”

Lär Dɔr-ya-wɛc kɛ loc la̱t thi̱n

⁶ Kä cu Dɔr-ya-wɛc kɛ loc i̱, “Ji̱n Tɛ̈-tɛ-nay rueec wec Kuec Kiɛɛr Yu-pɛ-ree-tidh, kɛ Cɛ-thar-bo-dhɛ-nay, kɛ ji̱ kɔarun nɔa̱a̱nɛ rɔ.

⁷ /Cuarɛ wä rɛy la̱t luaak Kuɔth ɛ mɔ. Ɛ rueec ji̱ Juudh kɛnɛ bööthkiɛn nyɔakɛ luak Kuɔth ɛmɔ kɛ ta̱th guäthdɛ.

⁸ Kä ɣän ɛn täämɛ la̱rä yɛ min bia lät kä kɛn bööth ji̱ Juudh ti̱ti̱ kɛ kui̱ nyɔak ta̱th luaak Kuɔth ɛ mi. Bia yio̱w la̱t ka̱m nɛy ti̱ti̱ kɛn diaal kä yio̱w kumɛ, yio̱w tho̱lböök wi̱i̱ni Kuec Kiɛɛr Yu-pɛ-ree-tidh.

⁹ Kä mɔ ba go̱rɔ (ce̱tkɛ rueeth thääkni, rueeth rɔɔmni, det kɛ kui̱ mucä min wa̱ŋkɛ Kuɔth puɔ̱rä, bɛl, milɛ, kɔaŋ, kiɛ liɛth, mi wa thiec ɛ bööth palä tin te kä Jɛ-ru-tha-lɛm) ka̱mɛ jɛ kɛ ciaŋ a thil pa̱k,

¹⁰ dɔ̱ŋ ba Kuoth puɔ̱rä thöp muc ti tɛ̈thkɛ lɔcdɛ, kä dee kɛ pal kɛ kui̱ teekä kua̱r kɛnɛ gaatkɛ.

¹¹ Kä bä lɛni lar bä ɛn ɣöö ramɔ wä ŋuɔ̱t ɛ mi wä woc ɔ, ba kɔay guëëth raar duëëlɛ, kä ba jɛ yiɛth kɛ jɛ kä ba jɛ ŋap, kä bi duelɛ a di̱r juaacni.

¹² Kä bi Kuoth in palkɛ ɛn wi̱ni kuäär kiɛ nɛy tɔ̱ bi luaak Kuɔth in te kä Jɛ-ru-tha-lɛm nyɔk kɛ däk ɔ woc. Kä ɣän Dɔr-ya-wɛc bä lar ɛn ɣöö a jɛ la̱tkɛ kɛ tiit mi di̱i̱t.”

Lëy luaak Kuɔth

¹³ Kɛ kui̱ ruac in ca lar ɛ kuäär ni Dɔr-ya-wɛc, cu Tɛ̈-tɛ-nay, rueec wec Kuec Kiɛɛr Yu-pɛ-ree-tidh kɛnɛ Cɛ-thar-bo-dhɛ-nay kɛ ji̱ kɔariɛn min ci kuäär ni Dɔr-ya-wɛc ɛ la̱rkɛ la̱t ni tiitdä.

¹⁴ Kä cu bööth ji̱ Juudh wä agɔaa lät luaak Kuɔth, cuɔmkɛ kɛ ɛ göökiɛn ni Ɣa-gay kɛnɛ Dhɛ-kar-yaa gat Ido. Kä cukɛ ta̱th luaak Kuɔth thuk ce̱tnikɛ ruac Kuɔth I-thɛ-rɛl kɛnɛ ruac Ko-rɛc, kɛ Dɔr-ya-wɛc, kɛ Är-tɛ̈k-cɛ̈th-tɛ kua̱r Pa-rath.

¹⁵ Kä cu ta̱th luaak Kuɔth thuɔ̱k kɛ cäŋ kä diɔ̱k kä pay wäl rɛw, kɛ bäkɛl runi ruec kua̱r ni Dɔr-ya-wɛc.

¹⁶ Kä cu ji̱ I-thɛ-rɛl, kɛ bööth palä kɛ ji̱ Lii-bay kɛ duɔth nɛɛni tëë luny jɔk pe̱cä tiɛmkɛ cäŋ leyä luaak Kuɔth kɛ tɛ̈th lɔaac.

¹⁷ Kä cukɛ muc thöp kɛ cäŋ leyä luaak, thääk ti kuɔ̱r kɛ dɛy deet ti kur rɛw kɛ rueeth deet ti kur ŋuaan, kä kɛ muc dui̱rä cua thääk deet böwni da̱ŋ wäl rɛw thöp kɛ kui̱ ji̱ I-thɛ-rɛl diaal ce̱tkɛ pek thuk duëlikiɛn.

¹⁸ Kä cukɛ bööth palä la̱th guäthdiɛn, kä cua ji̱ Lii-bay la̱th bunädiɛn kɛ kui̱ palä Kuɔth kä Jɛ-ru-tha-lɛm, ce̱tkɛ min ca gɔ̱r rɛy buɔk Muthɛ.

Cäŋ Bälä

¹⁹ Kɛ cäŋ kä wäl ŋuaan kä pay in jio̱l cu pɛ̈ɛ̈c ca̱ŋ Bälä tim.

²⁰ Kä cu bööth palä kɛ ji̱ Lii-bay pua̱nykiɛn lɛ̈y, kä cukɛn gɔw diaal. Kä cu ji̱ Lii-bay ruath dɛ̈ɛ̈l ca̱ŋ Bälä näk kɛ kui̱ pɛ̈ɛ̈cni diaal, kɛnɛ kui̱ ganmani, kɛ kui̱ bööthni palä, kɛnɛ kui̱diɛn.

²¹ Kä cua cam ɛ ji̱ I-thɛ-rɛl tëë luny jɔk pe̱cä, kɛɛl kɛ nɛy diaal tin ca rɔ liɛny go̱lä, kä nɛy tin palkɛ kuth guäyni nɛɛni tin ciaŋkɛ wec, kɛ ɣöö ba Kuoth Nhial Kuoth I-thɛ-rɛl pal.

²² Kɛ ni̱n bärɔw cua ti̱mä mi̱eth in thil thuɔp la̱t kɛ tɛ̈th lɔaac. Kɛ ɣöö ci Kuoth Nhial kɛ moc tɛ̈th lɔaac kɛ ɣöö cɛ lɔc kua̱r A-thi-ri-ya ri̱t, cɛ kɛ luäk kɛ ta̱th luaak Kuɔth, Kuoth I-thɛ-rɛl.