Ɛdhra 5 - RUAC KUƆTH IN RƐL RƆ

¹ Täämɛ cu go̱o̱k ni Ɣa-gay kɛnɛ Dhɛ-kar-yaa gat Ido ruac go̱o̱kä la̱t ji̱ Juudh tin te kä Juda kɛnɛ Jɛ-ru-tha-lɛm kɛ ciöt Kuɔth I-thɛ-rɛl.

² Kä cu Dhɛ-ru-ba-bɛl gat Cɛ-ɛ̈l-ti-el kɛnɛ Yɛ-cuwä gat Yo-dha-dak luak Kuɔth Nhial in te kä Jɛ-ru-tha-lɛm tok kɛ mi nyɔakɛ jɛ kɛ ta̱th. Kä cu go̱o̱k Kuɔth te kɛɛl kɛ kɛ, cuakɛ luäk.

³ Kɛ jɛn gua̱a̱thɔ kɛl ɔ cu Tɛ̈-tɛ-nay rueec wec kui̱ Kiɛɛr Yu-pɛ-ree-tidh kɛnɛ Cɛ-thar-bo-dhɛ-nay kɛ ji̱ kɔariɛn ben kä kɛ, kä cukɛ thiec i̱, “Ɛŋa jio̱k yɛ mɔ bia luak Kuɔth ɛ mi nyɔk kɛ ta̱th a bia thuk?”

⁴ Kä cukɛ kɛ thiec bä i̱, “Kä kɛ ŋaani kɛn tin ta̱thkɛ luak Kuɔth ɛ mi?”

⁵ Duundɛ ɣöö tiit Kuoth bööth ji̱ Juudh, kä /kenkɛ ta̱th ka̱p cuɔ̱ŋ amäni mi ci ruac wä kä Dɔr-ya-wɛc kä ca luɔc warɛgakädɛ jek.

⁶ Kä cu nɛmɛ a min ca gɔ̱a̱r rɛy warɛgakä ɛ Tɛ̈-tɛ-nay rueec wec Kui̱ Kiɛɛr Yu-pɛ-ree-tidh kɛnɛ Cɛ-thar-bo-dhɛ-nay kɛ ji̱ kɔariɛn tin te Kui̱ Kiɛɛr Yu-pɛ-ree-tidh gɔ̱a̱rkɛ jɛ kuäär ni Dɔr-ya-wɛc i̱,

⁷ “Ɛ mal tekɛ kuäär ni Dɔr-ya-wɛc.

⁸ Ŋäcni jɛ kuäär ɛn ɣöö cakɔ wä wi̱i̱ni Juda, luaak Kuɔth in di̱i̱t. Ca jɛ nyɔk kɛ ta̱th kɛ pääm ti di̱t, kä ca jiɛn la̱th wi̱i̱ pa̱nyni. Kä ɛn la̱t wëë agɔaa, kä lät ɛ kɛn.

⁹ Kä ca̱kɔ bööth thiec kɛ ram ɔ lär ɛ kɛ mɔ i̱ ba luak nyɔk kɛ ta̱th a ba thuk.

¹⁰ Kä cakɔ ciöötkiɛn thiec kɛ ɣöö bakɔ ji̱ la̱r nɛy tin bööthkiɛn.

¹¹ Kä cukɛ nɛy loc i̱, ‘Kɛ kɔn ja̱a̱ŋ Kuɔth nhial kɛnɛ piny, kä nyɔk nɛy ni luak Kuɔth ëë ca täth ni wal a ci thuɔ̱k ɛ kuäär I-thɛ-rɛl in di̱t kɛ ta̱th.

¹² Kɛ ɣöö ci gua̱nikɔ Kuoth nhial jak kä gak, cuɛkɛ la̱th tetdä Nɛ-bu-kad-nɛ-dhar kuäär Bɛ̈-bi-lɔn kä Kɛ̈l-da-ya mëë däk ɛn luak Kuɔth ɛmɛ, kä cuɛ naath pɛ̈c kä Bɛ̈-bi-lɔn.

¹³ Cuɛ ku la ɣöö kɛ ruɔ̱n ruec Ko-rɛc in nhiam kuäär Bɛ̈-bi-lɔn, cuɛ ruac lar kɛ ɣöö ba luak Kuɔth nyɔk kɛ ta̱th.

¹⁴ Kä cɛ da̱a̱p kɛnɛ kuak cikä min bo̱r nyin luaak Kuɔth kä Jɛ-ru-tha-lɛm tëë ca naŋ ɛ Nɛ-bu-kad-nɛ-dhar, kä cɛ la̱th rɛy luak kä Bɛ̈-bi-lɔn, ka̱m raar kä Bɛ̈-bi-lɔn, kä cuɛ kɛ ka̱m Cec-bɛ̈-dhar mëë cɛ jak kä rueec.

¹⁵ Kä cuɛ jɛ ka̱m kuak i̱ wër lätnikɛ luak Kuɔth in te kä Jɛ-ru-tha-lɛm, kä ɛ luak Kuɔth nyɔakɛ kɛ ta̱th guäthdɛ.

¹⁶ Kä cu Cec-bɛ̈-dhar ben cuɛ luak Kuɔth ben tok kɛ ta̱th kä Jɛ-ru-tha-lɛm. Niɛ guäth ɛmɔ tëë täth ɛn luak amäni walɛ, kä ŋotdɛ /kenɛ ni thuɔ̱k.’

¹⁷ Kɛ kui̱c ɛmɔ, kuäär a jɛ görkɛ rɛy warɛgakni kua̱ri kä Bɛ̈-bi-lɔn, mi tëë kɛ ruac mi ci kuäär ni Ko-rɛc ɛ lar kɛ nyɔak ta̱th luak Kuɔth kä Jɛ-ru-tha-lɛm. Kä jäk ni nɛy ŋukdu kuäär kɛ ruac ɛmɛ.”