Ɛdhra 4 - RUAC KUƆTH IN RƐL RƆ

Lo̱k tha̱a̱ŋ nath kɛ nyɔak ta̱th luak Kuɔth

¹ Kä mëë ci ji̱ tɛ̈r Juda kɛnɛ Ben-ya-min ɛ liŋ ɛn ɣöö nɛy tëë luny jɔk pe̱cä ta̱thkɛ luak Kuɔth Nhial, Kuoth I-thɛ-rɛl,

² cukɛ ben kä Dhɛ-ru-ba-bɛl kɛnɛ bööth thuk duëli, kä cukɛ wee i̱, “A kɔ ta̱thkɔ kɛɛl kɛ yɛ. Kɛ ɣöö pal nɛy ni Kuothdun ce̱tkɛ yɛ, kä tho̱p nɛy ɛ muc ni mëë ku E-thar-ɣɛ̈-don kuäär A-thi-ri-ya nɛy nööŋ ɛn wa̱nɛ.”

³ Duundɛ ɣöö cu Dhɛ-ru-ba-bɛl kɛnɛ Yɛ-cuwä kɛ duɔth bööthni thuk duëli kɛ loc i̱, “Thilɛ mi bia luäk nɛy kä ta̱th luaak Kuɔthda. Kɔn kä rɔ̱ ba̱kɔ Kuoth Nhial Kuoth I-thɛ-rɛl ta̱th luak, ce̱tnikɛ min ci Ko-rɛc kuäär Pa-rath ɛ la̱r nɛy.” 5 kɛnɛ cio̱o̱k kä 24 latkɛ ni ta̱th luaak Kuɔth. Ɛ ruɔ̱n 521-484 a/ka̱n Yecu ni dap.

⁴ Kä cu ji̱ wec ɛ ɣɔ̱n i̱ ba ji̱ Juda jak kä dual kɛ ta̱th luaak.

⁵ Kä cukɛ nɛy ti bikɛ luek kä ta̱th luaak Kuɔth kɔk, kɛ ɣöö bakɛ jak kä ŋɔ̱a̱ŋ kä la̱tdiɛn kɛ ni̱n ruëc Ko-rɛc kuäär Pa-rath diaal cu mäni ni ruëc Dɔr-ya-wɛc kuäär Pa-rath.

Lo̱k tha̱a̱ŋ nath kɛ nyɔak ta̱th Jɛ-ru-tha-lɛm bä

⁶ Kɛ tuk Ä-ɣɛ̈c-we-roc kɛ kuäär, cukɛ warɛgak mi gɔny kɛn ɛ ji̱ Juda kɛnɛ ji̱ Jɛ-ru-tha-lɛm gɔ̱r.

⁷ Kä kɛ ni̱n kuäärä Är-tɛ̈k-cɛ̈th-tɛ kuäär Pa-rath, cu Bic-lam kɛnɛ Mith-rɛ-dath kɛ Tab-el kɛ duɔth bunädiɛn warɛgak gɔ̱a̱r Är-tɛ̈k-cɛ̈th-tɛ. Ɛn warɛgak ca gɔ̱r kɛ thok ji̱ Ä-ram nikɛ ba̱ni ji̱ Ä-ram.

⁸ Kä cu Rɛ-ɣum bo̱o̱th rɛ̈m kɛnɛ Cim-cay bulkamiin, warɛgak mi gɔanykɛ ji̱ Jɛ-ru-tha-lɛm kɛ jɛ gɔ̱a̱r kuäär ni Är-tɛ̈k-cɛ̈th-tɛ.

⁹ Cu Rɛ-ɣum bo̱o̱th rɛ̈m kɛnɛ Cim-cay bulkamiin, kɛ duɔth bunädiɛn warɛgak gɔ̱r kɛɛl kɛ ruëëc, kɛ kua̱r, kɛ ji̱ kɔar kua̱r, kɛ Pa-rath, kɛ ji̱ Ɛ̈-rɛk kɛ ji̱ Bɛ̈-bi-lɔn kɛ ji̱ Cu-cɛ̈n, min la Ee-lam,

¹⁰ kɛ nɛy ti ŋuan ti kɔ̱ŋ ti cua nooŋ ɛ, ji̱ Ɔth-nɛ̈-par min luɔ̱thkɛ kä cuɛ jak kä cieŋ wi̱i̱ni Tha-mɛ-ria kɛnɛ jɔk yiëër Yu-pɛ-ree-tidh.

¹¹ (Kä nɛmɛ ɛ min te rɛy warɛgakä min wä kä jɛ.) “Wee kä kuäär ni Är-tɛ̈k-cɛ̈th-tɛ. Jäk la̱a̱tku tin te wi̱i̱ni jɔk Kiɛɛr Yu-pɛ-ree-tidh ji̱ kä maliɛn. Kä täämɛ.

¹² Ŋäcni jɛ kuäär ɛn ɣöö ji̱ Juudh tëë jiɛy kä ji̱ kä ci ben kä kɔ ti, cikɛ wä kä Jɛ-ru-tha-lɛm. Nyɔk kɛn wec tɛ̈r ɛ jiääk ɛmɔ kɛ ta̱th. Cikɛ pänydɛ cuŋ kä bany kɛn ni jɛ.

¹³ Kä ŋäcni jɛ ɛn ɣöö mi wa nyɔk kɛ ta̱th kä bi pänydɛ loc thi̱n, /cikɛ tho̱lbo̱k bi thöp kɛnɛ karaamni, bi yio̱w kuäärä kuɛ̈ɛ̈.

¹⁴ Kä kɛ ɣöö kɛ kɔn la̱a̱t kua̱r, /cɛ ro̱ŋ ɛn ɣöö bi nɛy nɛmɛ nɛn a tuɔɔkɛ kä ji̱, kɛ kui̱c ɛ mɔ ɛ jɛn lär nɛy ɛ ji̱ mɔ kuäär,

¹⁵ kɛ ɣöö bi bok ruaacni guuri go̱r. Kä biɛ ŋa̱c rɛy buɔk ruaacni ɛn ɣöö wec ɛmɔ ɛ wec tɛ̈r mi jiääk, ɛ wec mi moc kua̱r riɛk mi la rɔ a luc naath ni wal. Ɛ jɛn mëë da̱kɛ jɛn wec ɛmɔ.

¹⁶ Inɔ ba̱kɔ ji̱ la̱r lär lö kuäär, ɛn ɣöö mi wa wec ɛmɔ wä nyɔk kɛ ta̱th, a bi pänydɛ thuɔ̱k, bi thil gua̱a̱th kä wi̱i̱ tin te Kui̱ Kiɛɛr Yu-pɛ-ree-tidh.”

¹⁷ Kä cu kuäär luɔc ja̱k wëë i̱, “Warɛgak wëë kä Rɛ-ɣum bo̱o̱th rɛ̈m kɛnɛ bulkamiin ni Cim-cay kɛ duɔth bunädiɛn in cieŋ kä Tha-mɛ-ria, kɛ duɔth wi̱i̱ni tin te Kui̱ Kiɛɛr Yu-pɛ-ree-tidh, malɛ.

¹⁸ Täämɛ warɛgak in cia jäk kä nɛy ca kuɛn ni kɛɛliw ni nhiamdä.

¹⁹ Ɣän cä ruac lat kä ca go̱r, kä ca jek ɛn ɣöö wec ɛmɔ la rɔ a lucɛ kua̱r, kä ɛ gua̱a̱th mi la rik a lät.

²⁰ Kä tëë kɛ kua̱r ti buɔ̱m buɔ̱ɔ̱m kä Jɛ-ru-tha-lɛm, ti ruackɛ wi̱i̱ Kuec Kiɛɛr Yu-pɛ-ree-tidh diaal, ti yuɔ̱r kɛ tho̱lbo̱k kɛnɛ karaamni.

²¹ Kä täämɛ la̱rɛ kɛ ruac, akɛ ka̱pkɛ la̱t cuɔ̱ŋ, a jɛ /ca nyɔk kɛ ta̱th ɛn wec ɛ mɔ amäni mi cä ruac lar.

²² Kä tiɛtdɛ jɛ, /cuarɛ jɛ dhɔt ɛn nɛmɛ. Ɛŋu bɛ tekɛ mi bi kuäär ya̱r ɔ?”

²³ Kä min ca warɛgak kua̱r ni Är-tɛ̈k-cɛ̈th-tɛ kuɛn nhiam Rɛ-ɣum bo̱o̱th rɛ̈m kɛnɛ bulkamiin ni Cim-cay kɛ buɔ̱ndiɛn, cukɛ wä kä Jɛ-ru-tha-lɛm kä ji̱ Juudh kɛ pɛ̈th, kä cukɛ kɛ ka̱p cuɔ̱ŋ täth wec kɛ buɔ̱m.

Nyɔak tuk ta̱th luaak Kuɔth

²⁴ Kä cu la̱t luaak Kuɔth in te kä Jɛ-ru-tha-lɛm cuɔ̱ŋ. Cuɛ cuɔ̱ŋ amäni rɛw runi ruëc Dɔr-ya-wɛc kuäär Pa-rath.