Ɛdhra 3 - RUAC KUƆTH IN RƐL RƆ

Nyɔak palä kɛ tuk

¹ Kɛ bärɔw päthni cu ji̱ I-thɛ-rɛl diaal cieŋ wi̱i̱nikiɛn. Kä cukɛ rɔ mat ala kɛl kä Jɛ-ru-tha-lɛm.

² Cu Yɛ-cuwä gat Yo-dha-dak kɛnɛ gaatman ni bööth palä kɛ Dhɛ-ru-ba-bɛl gat Cɛ-ɛ̈l-ti-el kɛnɛ ji̱ maarädɛ rɔ jiɛc, kä cukɛ yi̱k Kuɔth I-thɛ-rɛl täth, mi ba muc tin waŋkɛ thöp wi̱i̱dɛ, ce̱tnikɛ min ca gɔ̱r rɛy buɔk ŋuɔ̱tni Muthɛ raan Kuɔth.

³ Kɛ ɣöö dualkɛ kɛ ji̱ wec, cukɛ yi̱k nyɔk kɛ ta̱th guäthdɛ mëë wen, kä cukɛ Kuoth Nhial thöp muc tin waŋkɛ kɛ runwaŋ kɛnɛ thiaŋ wi̱i̱dɛ.

⁴ Kä ce̱tnikɛ min ca gɔ̱r, cukɛ ti̱em bi̱lɛkä la̱t ce̱tnikɛ pek mucni tin la waŋkɛ, cuakɛ thöp ce̱tnikɛ tin la thöpkɛ kɛ cäŋ kɛl.

⁵ Kä kɛ kɔr kä nɔmɔ cua muc tin wenkä tin waŋkɛ, kɛ muc tukä path, kɛ muc ti̱mä Kuɔth Nhial diaal kɛ ni̱n tin ca mɛk, kɛ muc nɛɛni diaal tin thöpkɛ Kuoth Nhial kɛ ca̱riɛn.

⁶ Kä cukɛ Kuoth Nhial tok kɛ tho̱p muc tin waŋkɛ kɛ cäŋ in jio̱l kɛ bärɔw päthni. Duundɛ ɣöö cu luak Kuɔth Nhial ŋot a /ka̱n tok kɛ ta̱th.

⁷ Kä cukɛ yio̱w ka̱m kuëëc päämni kɛnɛ ŋa̱a̱t jiɛn. Kä cukɛ ji̱ Dhi-don kɛnɛ ji̱ Dhor moc mi̱eth, kɔaŋ kɛ liɛɛth kɛ ɣöö ba jiɛn ti luɔ̱ɔ̱r nööŋ kä Lɛ-ba-nɔn kɛ rɛy yiëër, naŋkɛ kɛ kä Yapa. Ce̱tkɛ mëë ca lar ɛ Ko-rɛc kuäär Pa-rath.

Nyɔak tukä ta̱th luaak Kuɔth Nhial

⁸ Kɛ rɛw päthni kɛ rɛw runi kɛ kɔr kä mëë cikɛ ben luaak Kuɔth kä Jɛ-ru-tha-lɛm, cu Dhɛ-ru-ba-bɛl gat Cɛ-ɛ̈l-ti-el, kɛ Yɛ-cuwä gat Yo-dha-dak, kɛ duɔth ganmani, kɛ bööth palä, kɛ ji̱ Lii-bay, kɛ nɛy diaal tëë ci luny kä Jɛ-ru-tha-lɛm pe̱cä la̱t tok. Kä cukɛ ji̱ Lii-bay kuany wi̱i̱ la̱t luaak Kuɔth Nhial a känɛ jɛ ni kä nɛy tin tekɛ run ti jiɛn da̱ŋ rɛw a wä nhial.

⁹ Kä cu Yɛ-cuwä kɛnɛ gaatkɛ, kɛ ji̱ maarädɛ, kɛ Kɛ̈d-mi-el kɛnɛ gaatkɛ (kɛn kɛ kuay Juda), kɛ gaat Ɣe-na-dad, kɛ gaatkiɛn kɛnɛ ji̱ maarädiɛn ji̱ kɛn Lii-bay ti̱ti̱ diaal rɔ̱ mat kɛɛl guɛckɛ la̱t luaak Kuɔth.

¹⁰ Kä min ci ta̱a̱th luak Kuɔth Nhial tok kɛ ta̱th, cu bööth palä ben a te bieynikiɛn puɔ̱ɔ̱nydiɛn kɛ kaaŋni kɛ ji̱ Lii-bay gaat A-thap kɛ thuɔmni, kɛ ɣöö ba Kuoth Nhial ben puany, ce̱tkɛ mëë ca lat ɛ Dee-bid kuäär I-thɛ-rɛl.

¹¹ Cukɛ Kuoth Nhial puany kɛ diit kä lär kɛn ɛ tɛ̈th lɔaac i̱, “Kuoth gɔaaɛ, kä tëë kɛ nhök mi thil pek kɛ I-thɛ-rɛl.” Kä cu nɛy diaal köök kɛ jɔw mi di̱i̱t, kɛ min puɔny kɛn Kuoth Nhial, kɛ ɣöö ca ta̱th luaak Kuɔth Nhial tok.

¹² Duundɛ ɣöö cu di̱t ti ŋuan kä bööth palä kɛnɛ ji̱ Lii-bay kɛ bööth thuk duëli tëë ca luak Kuɔth ëë nhiam nɛn, wiee kɛ jɔw mi di̱i̱t mëë ca luak Kuɔth nɛn ta̱thkɛ jɛ, kä rɔal nɛy tin kɔ̱ŋ kɛ tɛ̈th lɔaac.

¹³ Kä inɔ thilɛ ram mi dee jɔw raam in tɛ̈th lɔcdɛ kɛnɛ jɔw raam in wiee ŋic, kɛ ɣöö rɔal naath ɛlɔ̱ŋ, a liɛŋkɛ jɔw ni nɔ̱nä.