Ɛdhra 1 - RUAC KUƆTH IN RƐL RƆ

Lär Ko-rɛc kɛ loc ji̱ Juudh jɔk

¹ Kɛ ɣöö bi ruac Kuɔth Nhial ëë cɛ lat kɛ thok Yir-mɛ-yaa a thuɔ̱k, kɛ ruɔ̱n Ko-rɛc kuäär Pa-rath in nhiam, cu Kuoth Nhial Ko-rɛc kuäär Pa-rath jak kä latdɛ ruac rɛy kuäärädɛ kɛɛliw, kä cuɛ jɛ gɔ̱ri,

² “Nɛmɛ ɛ min ci Ko-rɛc kuäär Pa-rath ɛ lar. Ci Kuoth Nhial Kuoth puɔ̱rä, ɣä ka̱m kuäär wec muɔ̱ɔ̱n kɛɛliw, kä cɛ ɣä ka̱m ɣöö bä la̱t luak kä Jɛ-ru-tha-lɛm, kä Juda.

³ Kä ramɔ te rɛydun ɔ kä nɛɛkɛ diaal, a Kuothdɛ te kɛɛl kɛ jɛ, kä a jɛ wä kä Jɛ-ru-tha-lɛm, kä Juda, kä a nyɔk luak Kuɔth Nhial Kuoth I-thɛ-rɛl kɛ ta̱th ɛ jɛn Kuoth in te kä Jɛ-ru-tha-lɛm.

⁴ Kä nɛy tin ci duɔth a tëk gua̱thni tɔ̱ cieŋkɛ thi̱n ɔ, akɛ lua̱kɛ ɛ nɛy tin cieŋ kɛɛl kɛ kɛ, kɛ ciɛk in bo̱r kɛnɛ da̱a̱p, kɛ kuak, kɛ ley. A /ci muc tɛthkä lɔaac kɛ kui̱ luak Kuɔth in te kä Jɛ-ru-tha-lɛm te thi̱n.”

⁵ Kä a bööth thuɔk duel Juda kɛnɛ Ben-ya-min, kɛ bööth palä, kɛ ji̱ Lii-bay, kɛ ramɔ ci Kuoth lɔcdɛ liɛc ɔ rialkɛ rɔ ikä, ba luak Kuɔth Nhial in te kä Jɛ-ru-tha-lɛm wä nyɔk kɛ ta̱th.

⁶ Kä cu ji̱ thieekädiɛn kɛ moc kɛ kuak cikä min bo̱r kɛnɛ da̱a̱p kɛ kuak kɛ ley kɛ kuak ti di̱t kökdiɛn, a/ci muc tɛthkä lɔaac diaal te thi̱n.

⁷ Kä cu kuäär ni Ko-rɛc kuak luaak Kuɔth Nhial tëë ca naŋ ɛ Nɛ-bu-kad-nɛ-dhar kä Jɛ-ru-tha-lɛm, kä cɛ la̱th duëël kuth nikɛ ka̱m raar bä.

⁸ Kä cu Ko-rɛc kuäär Pa-rath ti̱ti̱ ka̱m raar kɛ tet Mith-rɛ-dath tɔ̱ɔ̱w kuakni, mëë cukɛ kuɛn tetdä Cec-bɛ̈-dhar bööth Juda.

⁹ Kä cu pekdiɛn a, took dääpä ti jiɛn diɔ̱k, took cikä min bo̱r ti bathdɔɔr kɛl, took ti kɔ̱ŋ ti jiɛn rɛw wi̱cdɛ bäŋuan,

¹⁰ lieeri dääpä ti jiɛn diɔ̱k, lieeri cikä min bo̱r ti kur ŋuaan wi̱cdɛ jiath kɛl, kɛ kuak ti kɔ̱kiɛn ti bathdɔɔr kɛl.

¹¹ Kä cu pek kuakni diaal kuak dääpä kɛnɛ kuak cikä min bo̱r a bathdɔɔri dhieec wi̱cdɛ kur ŋuaan. Kɛn kuak ti diaal ti̱ti̱ cu Cec-bɛ̈-dhar kɛ nööŋ mëë jiɛc pɛ̈ɛ̈c kä Bɛ̈-bi-lɔn bendiɛn kä Jɛ-ru-tha-lɛm.