Ɛth-ter 9 - RUAC KUƆTH IN RƐL RƆ

Juc ji̱ Juudh kɛ ji̱ tɛ̈riɛn

¹ Täämɛ, kɛ pay in wälrɛwdiɛn (Tio̱p in di̱i̱t), kɛ wäldiɔ̱k ni̱ni, cu ji̱ tɛ̈r ji̱ Juudh ŋa̱th kɛ ɣöö bikɛ buɔ̱m ji̱ Juudh tiam. Kä ɛ jɛn cäŋ in dee kulɛ cop kɛ ruac kua̱r guäthdɛ. Duundɛ ɣöö, cu cäŋ ɛmɔ rɔ gɛr, ɛ cu lɛ buɔ̱m ni ji̱ Juudh kä ji̱ tɛ̈riɛn.

² Ɛ jɛn, cu ji̱ Juudh diaal rɔ̱ duɔ̱ɔ̱l wi̱i̱nikiɛn, rɛy wi̱i̱ni Kua̱r ni Ä-ɣɛ̈c-we-roc diaal, kɛ ɣöö ba nɛy tëë görkɛ näkdiɛn ben näk. Kɛ ɣöö thilɛ ram mi bi lɛ cuɔ̱ŋ nhiamdiɛn, kɛ ɣöö cu nɛy diaal ŋɛ̈ɛ̈r kɛ dual kɛ kui̱diɛn.

³ Kä cu ruëëc wi̱i̱ni diaal kɛnɛ bööth kɛ kua̱r amäni ruëëc dhɔaar kua̱r ji̱ Juudh luäk, kɛ ɣöö dualkɛ kɛ Mɔr-da-kay.

⁴ Kɛ ɣöö ci Mɔr-da-kay tekɛ buɔ̱m mi di̱i̱t ni rɛy dhɔaar kua̱r. Kä cu kɛ̈k Mɔr-da-kay wee kɛ mi reepɛ rɔ wi̱i̱ni kua̱r diaal, kä cu buɔ̱mdɛ wee kɛ mi di̱tdɛ bä.

⁵ Inɔ, cu ji̱ Juudh ji̱ tɛ̈riɛn diaal näk kɛ ko̱r, cukɛ kɛ ŋuɔ̱t kä cukɛ kɛ däk. Cukɛ tëë diaal tëë görkɛ ɛ kɛn lät kä nɛy diaal tëë la lo̱k kɛ kɛ.

⁶ Däär wec Cu-cɛ̈n, cu ji̱ Juudh nɛy ti kur dhieec näk, kä cukɛ kɛ däk bä (500).

⁷ Cu kɛ nɛy ti̱ti̱ näk, Par-cɛ̈n-da-thɔ kɛnɛ Dal-pon kɛ Ɛ̈th-pa-thɔ,

⁸ kɛnɛ Po-ra-tha kɛ A-dɛ̈l-yɔ kɛnɛ Ä-ri-dha-thɔ,

⁹ kɛ Par-mɛ̈c-tɔ kɛnɛ Ä-ri-thay kɛ Ä-ri-day kɛnɛ Way-dha-tha.

¹⁰ Kɛn da̱ŋ wäl kɛ gaat Ɣa-man gat Ɣɛ̈-mɛ-da-thɔ min la gua̱n tɛ̈r ji̱ Juudh. Duundɛ ɣöö, thilɛ duɔ̱ɔ̱r kä kuakiɛn mi cu kɛn ɛ pɛc.

¹¹ Ɛn cäŋ ɛmɔ cua pek nɛɛni diaal tin ca näk däär wec Cu-cɛ̈n wä la̱r kuäär.

¹² Kä cu kuäär Ciëk Kua̱r ni Ɛth-ter jiök i̱, “Ci ji̱ Juudh nɛy ti kur da̱ŋ dhieec näk wi̱c Cu-cɛ̈n amäni gaat Ɣa-man da̱ŋ wäl ca kɛ näk bä. Kä ɛŋu mi ci kɛn ɛ kulɛ la̱t rɛy wi̱i̱ni kua̱r tin kɔ̱kiɛn? Täämɛ, ɛŋu mi thieeci? Ba jɛ ka̱m ji̱. Kä ɛŋu mi dɔ̱ŋ mi go̱o̱ri? Ba jɛ nöŋ ji̱.”

¹³ Kä cu Ɛth-ter ɛ loc wëë i̱, “Mi dee kuäär ɛ nhɔk, iruun dëë ji̱ Juudh diaal tin te däär wec Cu-cɛ̈n nhök ɣöö ba cäŋ ɛ walɛ mɛmɛ lɛl ala ŋut. Kä a gaat Ɣa-man da̱ŋ wäl wa ŋap guäth ŋäpä.”

¹⁴ Kä cu kuäär ruac mi ba wä la̱t thöp, cua ruac thöp däär wec Cu-cɛ̈n kä cua gaat Ɣa-man da̱ŋ wäl wä ŋap.

¹⁵ Kä cu ji̱ Juudh tëë te kä Cu-cɛ̈n rɔ̱ dol bäkɛ cäŋ kä wäl ŋuaan kä pay in wälrɛwdiɛn (Tio̱p in di̱i̱t), kä cukɛ nɛy ti kur diɔ̱k (300) näk kä Cu-cɛ̈n. Duundɛ ɣöö /ka̱n duɔ̱ɔ̱r kɛl kä kuakiɛn pɛc.

¹⁶ Ni̱nɔ, cu ji̱ Juudh tëë te wi̱i̱ni kua̱r tin kɔ̱kiɛn rɔ̱ dol bäkɛ ɣöö bikɛ rɔ̱ gaŋ kä ji̱ tɛ̈riɛn. Kä cu ji̱ tɛ̈riɛn rɔ̱ luär kɛ, kä cukɛ kɛ näk nɛy ti bathdɔɔri ti jiɛn bärɔw wi̱cdɛ dhieec (75,000). Duundɛ ɣöö /kenkɛ duɔ̱ɔ̱r kɛl kä kuakiɛn pɛc.

¹⁷ Mɛmɛ tuɔɔkɛ kɛ cäŋ kä wäldiɔ̱kdiɛn kä pay in cɔal i̱ (Tio̱p in di̱i̱t). Kä kɛ cäŋ kä wäl wi̱cdɛ ŋuaan cukɛ lɔ̱ɔ̱ŋ kä cukɛ cäŋ ɛmɔ jakä cäŋ ti̱mä kɛnɛ tɛ̈th lɔaac.

Cäŋ lɔ̱ŋä mi cɔal i̱ Pu-rim

¹⁸ Duundɛ ɣöö ji̱ Juudh tëë te kä Cu-cɛ̈n cu kɛ rɔ̱ duɔl guäth kɛl kɛ cäŋ kä wäldiɔ̱k kɛnɛ cäŋ kä wäl ŋuaan, kä cu kɛ lɛ wä lɔ̱ɔ̱ŋ kɛ cäŋ kä wäl dhieec. Kä cu kɛ cäŋ ɛmɔ jakä cäŋ lɔ̱ŋä tɛthä lɔaac.

¹⁹ Ɛn guäth ɛmɔ, cu ji̱ Juudh tëë cieŋ rɛy ciëŋ kɛnɛ gëëk wec cäŋ kä wäl ŋuaan kä pay in cɔal i̱ (Tio̱p in di̱i̱t) jakä cäŋ lɔ̱ŋä kɛnɛ tɛ̈th lɔaac, cuɛ la cäŋ lɔ̱ŋä mi la kɛn rɔ̱ a jäkä muc kɛnɛ mi̱th thi̱n kɛ̈l kɛ̈ɛ̈li.

²⁰ Mɔr-da-kay cuɛ ŋɔak diaal ti̱ti̱ gɔ̱a̱r piny. Kä cuɛ ji̱ Juudh diaal tëë te rɛy wi̱i̱ni Kua̱r ni Ä-ɣɛ̈c-we-roc tin thia̱k kɛnɛ tin nɔ̱a̱n gɔ̱a̱r warɛgakni.

²¹ Cuɛ kɛ jak kä ɣöö bikɛ cäŋ kä wäl ŋuaan kä pay in cɔalkɛ i̱ (Tio̱p in di̱i̱t) tit. Kä cukɛ cäŋ kä wäl dhieec kä jɛn pay ɛmɔ tit bä runi diaal,

²² cäŋ ɛmɔ cuɛ ce̱tnikɛ cäŋ ëë tiam ji̱ Juudh ɛ ji̱ tɛ̈riɛn, kɛnɛ pay ëë dee la pay li̱ethdiɛn, mëë cu wieediɛn rɔ looc ni tɛ̈th lɔaac, kä cu cäŋ pärädiɛn rɔ looc ni cäŋ lɔ̱ŋä kä kɛ. Kä cukɛ ni̱n tɔ̱tɔ̱ jakä ni̱n ti̱mä kɛnɛ ni̱n tɛthä lɔaac, cu kɛn a ni̱n ti la rɔ̱ a ja̱k kɛ kä muc mi̱thni kamnikiɛn kɛ̈l kɛ̈ɛ̈li thi̱n, kä muɔckɛ can thi̱n kɛ muc.

²³ Kä cu ji̱ Juudh mɛmɛ jakä ŋut, ce̱tnikɛ mëë ci Mɔr-da-kay ɛ gɔ̱r kɛ kui̱diɛn.

²⁴ Ɣa-man gat Ɣɛ̈-mɛ-da-thɔ in la raan Ä-gag mëë la gua̱n tɛ̈r ji̱ Juudh. Mëë cu mi jiääk car kɛ kui̱ ji̱ Juudh kɛ ɣöö bɛ kɛ däk, kä cuɛ gaakni yuɔr kɛ ɣöö bɛ cäŋ in bɛ däknikɛ ŋa̱c.

²⁵ Duundɛ ɣöö, mëë ci Ɛth-ter cärkɛ tin jiäk ŋa̱c, cuɛ ben nhiam kua̱r, cu kuäär ruac lat, kä cua gɔ̱r ɛn ɣöö ɛ cär Ɣa-man tin jiääk tin cɛ la̱t kɛ ciöt ji̱ Juudh ku pɛn ni wi̱cdɛ pa̱ny. Kä a jɛn kɛnɛ gaatkɛ wa ŋap guäth ŋäpä.

²⁶ Kä kɛ kui̱ ɛmɔ cua cäŋ ɛmɔ cu cɔl i̱ Pu-rim kɛ kɔr cio̱tdä kä ɣöö Pur. Kä kɛ ɣöö ci ŋɔak diaal ti̱ti̱ tuɔɔk kä kɛ, kɛnɛ jiäk tin ci ben kä kɛ,

²⁷ cu ji̱ Juudh cäŋ ɛmɔ cu ka̱n ɛla duŋdiɛn kɛnɛ kuaykiɛn amäni nɛy diaal tin ca rɔ̱ ma̱tkɛ. Kä cu kɛn ɛ lar ɛn ɣöö bikɛ ni̱n da̱ŋ rɛw ti̱ti̱ a tiit a thil pa̱k run kä run, ce̱tnikɛ mëë ci Mɔr-da-kay ɛ gɔ̱a̱r piny.

²⁸ Ba ni̱n ti̱ti̱ la tiɛtkɛ kä ba kɛ käp rɛy ri̱cni diaal, bakɛ käp ɛ thuk duëli diaal kɛnɛ wi̱i̱ diaal kɛ rɛ̈k diaal, kä kɛn ni̱n Pu-rim ti̱ti̱ a /ca ti̱etdiɛn kɛnɛ ti̱emdiɛn bi met päl ɛ ri̱c diaal tɔ̱ bi ben tɔ̱.

²⁹ Kä cu Ciek Kua̱r ni Ɛth-ter nya Ä-bi-ɣa-yil kɛnɛ Mɔr-da-kay in la raan ji̱ Juudh ruac gɔ̱r kɛ lua̱ŋ kuäärädiɛn, kɛ ɣöö ba warɛgak in rɛwdɛ mëë ci Mɔr-da-kay ɛ gɔ̱r kɛ kui̱ Pu-rim jakä thuɔ̱k.

³⁰ Kä cua warɛgakni ja̱k kɛ kui̱ malä kɛnɛ gɔɔy ciɛŋä ji̱ Juudh diaal, cua jäkä wi̱i̱ kuäärä Ä-ɣɛ̈c-we-roc diaal ti kuɔ̱r kɛl wi̱cdɛ jiɛn da̱ŋ rɛw wi̱cdɛ bärɔw (127).

³¹ Kä cua ruac lat bäkɛ ɣöö bakɛ la tiɛtkɛ ce̱tnikɛ gua̱a̱thdiɛn ɛmɛ rɛy runä, ce̱tnikɛ gɔ̱a̱r in ca gɔ̱ɔ̱r nikɛ ɛ raan ji̱ Juudh ni Mɔr-da-kay kɛnɛ Ciëk Kua̱r ni Ɛth-ter ɛn ɣöö bikɛ la ni̱nkiɛn, amäni kuaykiɛn ɛla ŋut ce̱tkɛ min la tiɛmkɛ thek mi̱thni kɛnɛ pa̱riɛn.

³² Kä ruac Ciëk Kua̱r ni Ɛth-ter ɛ jɛn ɛ ni̱n ka̱pkɛ ni Pu-rim ɛ bum, cua mɛmɛ jakä gɔ̱a̱rkɛ piny inɔ.