Ɛth-ter 8 - RUAC KUƆTH IN RƐL RƆ

Lär ji̱ Juudh ɣöö ba rɔ̱ gaŋ

¹ Kɛ jɛn cäŋ ɛmɔ, cu Kuäär ni Ä-ɣɛ̈c-we-roc Ciëk Kua̱r ni Ɛth-ter ka̱m dhɔr Ɣa-man ëë la gua̱n tɛ̈r ji̱ Juudh. Kä cu Mɔr-da-kay ben nhiam kua̱r, kɛ ɣöö ci Ɛth-ter kuäär la̱r maariɛn kɛnɛ Mɔr-da-kay.

² Kɛ kɔr ɛ, cu kuäär tiɛl yɛtädɛ mëë tɛɛtdɛ kä Ɣa-man ka̱m raar yɛtädɛ, kä cuɛ jɛ ka̱m Mɔr-da-kay. Kä cu Ɛth-ter dhɔr Ɣa-man cu ka̱m Mɔr-da-kay bä.

³ Cu Ɛth-ter rɔ nyɔk kɛ ruac bäkɛ kuäär, cuɛ rɔ yuɔr piny ciöknikɛ wiee ɛ kä lipɛ jɛ, kɛ ɣöö bɛ mëë jiääk ëë ci Ɣa-man in la raan Ä-gag ɛ rialikä kɛ kui̱ ji̱ Juudh moc pek.

⁴ Kä cu kuäär kɛɛt kuäärädɛ kap nhial kɛ kui̱ Ɛth-ter.

⁵ Kä cu Ɛth-ter rɔ jiɛc cuɛ wä cuɔ̱ŋ nhiam kua̱r. Cuɛ riet wëë i̱, “Mi dëë kuäär ɛ nhɔk, kɛnɛ mi ci kuäär lɔcdɛ tɛɛth kɛ ɣä, mi ɛ mi gɔaa kä kuäär ɛn nɛmɛ, a kuäär lär ɣä rietdɛ min cɛ nhɔk ni jɛ. Ɛ ruac gɔ̱a̱rkɛ, mi looc ni warɛgak ëë jiääk ëë gɔ̱a̱rkɛ ɛ Ɣa-man gat Ɣɛ̈-mɛ-da-thɔ raan Ä-gag, mëë gɔ̱ɔ̱rɛ kɛ ɣöö ba ji̱ Juudh diaal tëë cieŋ rɛy wi̱i̱ni kua̱r diaal näk.

⁶ Kɛ ɣöö, ɣän /cä lia̱a̱ kɛnɛ bɛ̈c bɛ̈ɛ̈c ti nɛ̈ɛ̈nä bëë kä nɛɛkä bi luäŋ kɛ ruɔ̱t. Kä /cɛ rɔ lot bä ɛn ɣöö dëë da̱k ɛ di̱i̱t ɛ bä kä ji̱ maarädä mi guec.”

⁷ Kɛ kɔrɛ, cu Kuäär ni Ä-ɣɛ̈c-we-roc ruac kɛ Ciëk Kua̱r ni Ɛth-ter kɛnɛ raan Juudh ni Mɔr-da-kay wëë i̱, “Guɛcɛ jɛ, ɣän cä Ɛth-ter ka̱m dhɔr Ɣa-man. Kä Ɣa-man cu kɛn ɛ ŋap guäth ŋäpä, kɛ kui̱ kä ɣöö cɛ jɛ go̱r ɛn ɣöö bɛ ji̱ Juudh näk.

⁸ Dërɛ warɛgak gɔ̱r ce̱tnikɛ min go̱o̱r lo̱ckun ɛ kɛ kui̱ ji̱ Juudh, kɛ ciöt kua̱r, kä dërɛ jɛ thany kɛ tiɛl kua̱r in la thäny kɛ jɛ. Kɛ ɣöö mi ca ruac gɔ̱r kɛ ciöt kua̱r, kä ca thany kɛ tiɛl kua̱r in la thäny kɛ jɛ, /ca jɛ dee gak.”

⁹ Ɛn guäth ɛmɔ, kɛ cäŋ kä jiɛn da̱ŋ rɛw wi̱cdɛ diɔ̱k, kä pay in diɔ̱ɔ̱kdiɛn duɔ̱ɔ̱ŋ, cua bulkamiini kua̱r cɔl. Cua ruac gɔ̱r ce̱tnikɛ tin diaal tin ci Mɔr-da-kay kɛ lat, kä gɔ̱a̱r kɛ jɛ ji̱ Juudh kɛnɛ bööth, kɛ ruëëc kɛnɛ kua̱r wi̱i̱ni ti kuɔ̱r kɛl wi̱cdɛ jiɛn da̱ŋ rɛw wi̱cdɛ bärɔw, (127) ɛ känɛ ni kä In-di-ya wä mäni Kuc, wec ɔ kɛ duɔ̱ɔ̱p in la gɔ̱r kɛ kɛ, kɛ do̱r ɔ kɛ thok in la ruac kɛ kɛ, cu mäni ji̱ Juudh bäkɛ duɔ̱ɔ̱p in la gɔ̱r kɛ kɛ, kɛnɛ thok in la ruac kɛ kɛ.

¹⁰ Cuɛ warɛgakni gɔ̱r kɛ ciöt Kua̱r ni Ä-ɣɛ̈c-we-roc, kä cuɛ thany kɛ tiɛl kua̱r in la thäny kɛ jɛ. Kä cua kɛ naŋ ɛ nɛy tin cɛ ja̱k, ti ci kɔt jio̱kni jiöŋkööri kuäärä ti pual puaal.

¹¹ Kɛ jɛn warɛgak ɛmɔ cu kuäär ji̱ Juudh nhök ɣöö bikɛ rɔ̱ la dol. Bi kɛn rɔ̱ gaŋ kä nɛy tin dee kɛ däk kä dee kɛ näk kä dee kɛ luc. Bikɛ rɔ̱ gaŋ kä rɛm döör kiɛ wec ɔ dee kɛ mak ɔ, kɛɛl kɛ gaatkiɛn kɛnɛ mänkiɛn, kä bikɛ rɔ̱ gaŋ kä nɛy tɔ̱ dee kuakiɛn pɛc tɔ̱,

¹² ɛn nɔmɔ ɛ cäŋ kɛl mi ca mat rɛy wi̱i̱ni Kua̱r ni Ä-ɣɛ̈c-we-roc diaal min la cäŋ kä wäl diɔ̱k kä pay in wälrɛwdiɛn (Tio̱p in di̱i̱t).

¹³ Kä ba kui̱ warɛgakä mɛmɛ wä lat ɛla ŋut, rɛy wi̱i̱ni diaal, kä ba jɛ la̱t nɛy diaal. Kä bi ji̱ Juudh rɔ̱ rialikä kɛ jɛn cäŋ ɛmɔ, kɛ ɣöö bikɛ ko̱r ka̱p ji̱ tɛ̈riɛn.

¹⁴ Kä cua jiöŋkööri kuäärä tin pual puaal kɔt ɛ ji̱kiɛn ce̱tnikɛ min ci kuäär ɛ lat. Kä cu kɛ rɔ̱ yal kɛ wuɔ̱ɔ̱r mi di̱i̱t ɛlɔ̱ŋ. Kä cua warɛgak wä thöp däär wec Cu-cɛ̈n in di̱i̱t.

¹⁵ Kɛ kɔrɛ cu Mɔr-da-kay cu jiɛɛn nhiam kua̱r, kä cuɛ wä raar, ɛ cɛ bi̱i̱ kuäärä mi yiel kɛnɛ mi bo̱r la̱th. Kä te wi̱cdɛ kɛ kum kuäärä mi ca la̱t kɛ da̱a̱p. Jɛn bä tëë kɛ bi̱i̱ dɔ̱diɛn mi määl mi ca la̱t ɛgɔaa kɛ bi̱i̱ mi di̱t kökdɛ. Ɛn guäth ɛmɔ, cu nɛy tin te däär wec Cu-cɛ̈n lo̱ckiɛn cu tɛɛth.

¹⁶ Kɛ kui̱c ɛmɔ cu ji̱ Juudh cu tekɛ buay kɛnɛ tɛ̈th lɔaac kɛ luth ɛn wa̱nɔ mɔ.

¹⁷ Rɛy wi̱i̱ni kɛnɛ rɛ̈k diaal tin ci ruac kua̱r kɛnɛ ŋutdɛ cop thi̱n, cu naath tekɛ ŋa̱th kɛnɛ tɛ̈th lɔaac mi di̱i̱t, kä ji̱ Juudh, cukɛ tekɛ ti̱em kɛnɛ lɔ̱a̱ŋ. Kä min di̱t ni jɛn ɛlɔ̱ŋ, cua ɣöö cu nɛy ti ŋuan rɔ̱ ri̱t ala ji̱ Juudh, kɛ ɣöö dualkɛ ɛlɔ̱ŋ kɛ ji̱ Juudh.