Ɛth-ter 7 - RUAC KUƆTH IN RƐL RƆ

¹ Ɛn guäth ɛmɔ, cu kuäär kɛnɛ Ɣa-man wä guäth mi̱eth in ci Ciek Kua̱r ni Ɛth-ter ɛ rialikä.

² Kɛ rɛw ni̱ni mëë tekɛ mäth kɔŋä, cu kuäär rɔ nyɔk kɛ ruac kɛ Ɛth-ter wëë i̱, “Ɛŋu ɛn nëë ci thiec, lö Ciek Kua̱r ni Ɛth-ter? A cäŋɛ tha̱a̱ŋ kuäärädä, bä jɛ ka̱m ji̱.”

³ Kä cu Ciëk Kua̱r ni Ɛth-ter ɛ loc wëë i̱, “Mi ci lɔcdu tɛɛth kɛ ɣä lö kuäär, kä mi dee kuäär ɛ nhɔk, a tëkdä käänɛ, mɔmɔ ɛ jɛn min göörä. Kä a tëk nɛɛnikä kän, mɔmɔ ɛ jɛn min thiëëcä.

⁴ Kɛ ɣöö ca nɛy kɔak, ɣän kɔnɛ nɛɛkä, kɛ ɣöö ba kɔ däk, ba kɔ näk kä ba kɔ luc. Mi ca kɔak ni kɔ baaŋ ɛla kuaany, män kɛnɛ wutni, mi thilɛ lia̱a̱ mi di̱i̱t dɔ̱diɛn, kä ɣän dëë biɛt. Duundɛ ɣöö da̱k in bi kuäärɛ jek kɛ lia̱a̱ nɛɛnikä /ca jɛ bi luäŋ kɛ cul jɛ kɛ yio̱w ɛ gua̱n tɛ̈r.”

⁵ Kä cu Kuäär ni Ä-ɣɛ̈c-we-roc ruac Ciëk Kua̱r ni Ɛth-ter loc wëë i̱, “Kä ɛŋa, kä jɛn ani? Kä ɛŋa mi go̱o̱r lätni kä mi ce̱tkɛ nɛ?”

⁶ Cu Ɛth-ter ɛ loc wëë i̱, “Ɛ jɛn gua̱n tɛ̈ra kä gua̱n gaakda ni Ɣa-man ɛmɛ!” Kä ɛ jɛn, cuɛ Ɣa-man lath kɛ dual nhiam kua̱r kɛnɛ Ɛth-ter.

⁷ Cu kuäär rɔ jiɛc kɛ ŋɛ̈ɛ̈ny guäth mi̱eth kä cuɛ wä rɛy kakä walkɛ, kuɛla ɣöö cu Ɣa-man duɔth lipɛ Ɛth-ter kɛ kui̱ teekädɛ kɛ kui̱ kä ɣöö cɛ kuäär nɛn a cɛ ŋɛ̈ɛ̈ny ɛlɔ̱ŋ.

⁸ Mëë ci kuäär luny jɔk rɛy kakä walkɛ, a locɛ duëël in te mi̱eth thi̱n, cuɛ Ɣa-man nɛn cɛ rɔ yuɔr wi̱i̱ kɔam in te Ɛth-ter nyuurä thi̱n läŋɛ jɛ. Kä cu kuäär wee i̱, “Ɛ kuɛ buɔ̱ŋ ciëkdä go̱r ɛ ta̱a̱ ni thi̱n, ni cieeŋdä bä?” Kä ɛ ni̱n thuk kuäär kɛ riet, cu jio̱wni nhiam Ɣa-man kum ɛ dur.

⁹ Inɔ, cu ram kɛl kä jio̱wni kua̱r tin la la̱tkɛ kuäär ikä mi cɔalkɛ i̱ Ɣar-bo-na wee i̱, “Nɛ̈nɛ jɛ, tëë kɛ gua̱a̱th ŋäpä mi ci Ɣa-man ɛ la̱t kɛ ɣöö ba Mɔr-da-kay ëë ci ruacdɛ kuäär kɔn luäk ŋap thi̱n, mi te bärɛ nhial kɛ jua̱th tetni ti jiɛn da̱ŋ dhieec.” Kä cu kuäär wee i̱, “A jɛ ŋapkɛ thi̱n ɛn ŋääp ɔ.”

¹⁰ Kä cu kɛ Ɣa-man ŋap guäth ŋääpä min cɛ la̱t kɛ kui̱ Mɔr-da-kay. Ɛ jɛn cu ŋɛ̈ɛ̈ny kua̱r cu luäär.